TARA AGYI 12 - Jinghpaw Common Language Bible 2009

Yephta hte Ehprim Masha Ni

¹ Ehprim masha ni majan gasat na matu hkyen ma ai; shanhte gaw Yawdan hka rap nhtawm Zahpona de du jang Yephta hpe, “Nang gaw hpa majaw anhte hpe n shaga ai sha Amon masha ni hpe sa gasat na matu lamu ga jarit lai di mat wa n ta? Anhte gaw na a ntsa e, nta hte hpawn nat kau ya na ga ai!,” ngu nna tsun ma ai.

² Rai ti mung Yephta chyawm gaw shanhte hpe, “Nye a masha ni hte ngai gaw Amon masha ni hte grai sawng ai ga li ga law kaba rawng ga ai. Dai shaloi, nanhte hpe ngai shaga ti mung shanhte a lata kaw na nanhte ngai hpe n hkye la myit dai.

³ Nanhte ngai kaw n sa myit dai hpe ngai mu ai shaloi, ngai gaw nye a asak dan let shanhte hpe htim gasat na matu lamu ga jarit hpe lai di mat wa nngai; dai Madu mung shanhte hpe gasat dang kau na awng padang ngai hpe jaw ni ai. Shing re ai mi, ya nanhte ngai hpe gasat na matu hpa majaw sa wa nga myit ni?,” ngu nna tsun wu ai.

⁴ Dai hpang Yephta mung Gilead masha ni yawng hpe shaga shinggyin la nhtawm Ehprim masha ni hpe gasat dang kau wu ai. (Dai Ehprim masha ni chyawm gaw, “Ehprim hte Manashe lamu ga hta nga ai Gilead masha ni e, nanhte gaw Ehprim kaw na hpyen hprawng ni rai nga myit dai, ngu nna tsun yu myit dai!”)

⁵ Gilead masha ni gaw Ehprim masha ni n hprawng lawt lu hkra nga, Yawdan hka rap kawt lu ai shara ni hta hkap da ma ai. Shaloi hprawng lawt mat wa mayu nna rap di na matu ahkang hpyi ai Ehprim masha ni kadai hpe mung Gilead masha ni mahtang, “Nang Ehprim masha rai nga n ni?,” ngu nna hkap san ma ai. Lama rai nna shi mahtang, “N rai nngai,” nga jang,

⁶ shanhte gaw shi hpe, “Shibolet” ngu yu u, ngu na rai ma ai; rai ti mung dai wa mahtang ga dai hpe jaw hkra nsen n lu shapraw wu ai majaw, “Sibolet” ngu nna tsun na rai wu ai. Shaloi shanhte gaw shing nga ai wa hpe rim la nhtawm Yawdan hka rap ai shara langai ngai hta hkap sat kau kau di na rai ma ai. Dai aten hta sat kau hkrum ai Ehprim masha ni gaw mun mali e hkying lahkawng rai nga ai.

⁷ Yephta gaw Israela hpe kru ning tup woi awn wu ai. Dai hpang shi si mat nna Gilead mung shi a nta buga hta lup makoi da ma ai.

Ibzan, Elon Hte Abdon

⁸ Yephta a hpang e, Betlehem mare kaw na Ibzan, gaw Israela hpe woi awn nga ai.

⁹ Shi gaw shadang sha sumshi, shayi sha sumshi lu nga ai. Shi gaw shi a shayi sha ni hpe shinggan lakung lama ni hpe ya sha nhtawm shi a shadang sha ni a matu mung shinggan lakung lama kaw na numsha sumshi hpe la ya wu ai. Ibzan gaw Israela masha ni hpe sanit ning tup woi awn ya wu ai;

¹⁰ dai hpang shi si mat nna Betlehem mare e lup makoi da ma ai.

¹¹ Ibzan a hpang e, Zebulun amyu hta na Elon gaw Israela hpe shi ning tup woi awn wu ai.

¹² Dai hpang, shi si mat nna Zebulun a lamu ga hta na Aiyalon shara e lip makoi da ma ai.

¹³ Elon a hpang e, Pirahton shara na Hilela a kasha Abdon gaw Israela hpe woi awn wu ai.

¹⁴ Shi gaw shadang sha mali shi hte kashu sumshi lu nna shanhte gaw lawze sanit shi jawn ma ai. Abdon gaw Israela hpe matsat ning tup woi awn wu ai.

¹⁵ Dai hpang shi si mat nna Ehprim lamu ga, Amalek bum ga na Pirahton shara e shi hpe lup makoi da ma ai.