Shawlumon A Mahkawn Ga 8 - Jinghpaw Common Language Bible 2009

¹ Nye a nu nang hpe chyu shachyu nna bau maka dat ai ngai yung zawn nang tai nga na ngai ra sharawng nngai. Dai hpang, ngai gaw nang hpe lam e hkrum nna nang hpe pup yang, kadai mung hpa nga na ma ai n rai.

² Nang ngai hpe tsaw ra myit sharin ya lu ai shara ngu ai nye nu a nta de ngai nang hpe woi wa na nngai. Ngai gaw manam pyaw ai sabyi ntsin hte nye a hkainu si ntsin nang hpe jaw lu na nngai.

³ Na a pai lata gaw nye a baw npu e tawn nna, na a hkra lata gaw ngai hpe ahpum na ra ai.

⁴ Yerusalem numsha ni e, nanhte an a tsaw ra myit hpe ginjang n shawn myit ga, ngai hpe ga sadi jaw mi.

Kru Ngu Na Mahkawn Numsha Ni

⁵ Shi tsaw ra ai wa hte lahpum hte lahpum jum let nam mali de na pru wa ai num gaw kadai rai ta? Nang shangai wa ai shara ngu ai ja magaw si hpun nhpang e ngai nang hpe jasu ni ai.

Numsha

⁶ Ngai hta lai nna na a tsaw ra myit masin kadai hpe mung hkum hpaw ya et; ngai hta lai kadai hpe mung hkum ahpum et. Tsaw ra myit gaw si hkrung si htan zawn n-gun ja nga ai; masin pawt ai gaw si hkrung si htan zawn n-gun ja nga ai. Dai gaw wan numli zawn kapaw ayai nna grung nga ai wan zawn hkru nga ai.

⁷ Hka gaw dai hpe sat kau lu ai n rai; hka mawru pyi dai hpe n lim kau lu nga ai. Rai ti mung, tsaw ra myit hpe sut gan hte mari la lu ai wa kadai mung n kaw n law re ai hkrai di hkrum na ra ai.

Numsha A Kahpu Ni

⁸ Anhte kajan kaji langai lu ga ai; shi a chyu ni grai naw kaji nga ai. Shabrang langai shi hpe sa gaswi ai rai yang, anhte shi a matu kaning di na rai ta?

⁹ Shi lama bunghku rai yang, anhte gaw shi a ntsa e gumhpraw langchyi langai gap da na ga ai. Rai ti mung, shi lama chyinghka rai yang, anhte shi hpe arit hpunpyen ni hte makawp maga na ga ai.

Numsha

¹⁰ Ngai gaw bunghku rai nga nngai, nye a madoi chyu hpang ni gaw de a langchyi ni rai nga ai. Nye a tsaw ra wa gaw shi hta ngai myit dik ai hte ngwi pyaw sim sa ai lam lu la nga ai hpe chye nga ai.

Lasha

¹¹ Shawlumon gaw Bala Hamon mying ai shara hta sabyi sun langai lu ai. Shi kaw na sun shap galaw ai ni nga nga ma ai; dai ni langai hte langai gaw gumhpraw ahkying hkying jaw ma ai.

¹² Shawlumon gaw gumhpraw hkying hkying hkap la nna, hkauna galaw sha ai ni mahtang lahkawng tsa tsa shanhte a gambum hku lu la ma ai. Ngai gaw nye a sabyi sun majing lu nga a hka!

¹³ Nye a nja jan e, sun kata kaw na na a nsen ngai na lu n-ga; nang tsun ai ga hpe nye a manang ni na mayu nga ma ai.

Numsha

¹⁴ Ngai tsaw ra ai wa e, manam pyaw ai namji namya ni tu ai bum ni kaw nna shannga hte chyahkyi hkalung zawn ngai hpang de sa wa rit.