SHAKAWN KUNGDAWN 91 - Jinghpaw Common Language Bible 2009

Anhte Hpe Makawp Maga Ai Karai Kasang

¹ Shim nga lu na matu, Madu hpang de du sa wa ai wa kadai rai ti mung; Chyahtum Chyalai n-gun rawng ai Wa a makawp maga ai npu hta shanu nga ai wa kadai rai ti mung,

² “Nang gaw nye a dahpran shara hte ngai hpe makawp maga ai wa rai nga ndai; nang gaw nye a Karai Kasang rai nga ndai, nang hta ngai kam hpa nga nngai,” nga nna shi hpe tsun lu nga ai.

³ Shi gaw n mu lu ai hkrithpa tsin-yam yawng hte hte, si shangun lu ai ana ahkya ni yawng kaw nna; nang hpe shim hkra makawp maga la na ra ai.

⁴ Shi gaw shi a singkaw ni hte nang hpe magap da na ra ai, shi a lanu lahku mada mara ai hta nang shim nga lu na ra ai; shi a sadi sahka gaw nang hpe makawp maga ya ai hte, bau sin ya na ra ai.

⁵ Shana e hkrum chye ai kaning re ai hkrithpa tsin-yam rai tim, shani e akajawng sha byin wa ai gasat gala lam hpe rai tim;

⁶ nsin e byin ai ana zinli ni hpe rai tim, shani e, n hkru ai ni sat wa ti mung, dai ni hpe nang n hkrit ra nga ndai.

⁷ Na a makau e masha hkying mi, na a grup yin e mun mi si taw nga ti mung; nang hta machyi hkrum lu na n rai.

⁸ Tara n lang ai ni, kaning rai ari hkrum sha nga ma ai hpe nang mu mada lu na ra ai.

⁹ Nang gaw Madu hpe na a makawp maga shara hte Tsaw Htum ai Wa hpe na a shingbyi shara nang shatai nit dai.

¹⁰ Dai majaw tsin-yam tsindam hpe nang hkrum lu na n rai; kashun kashe du daw sai hkaw lam mung na a nta hta ni wa lu na n rai.

¹¹ Nang hkawm sa ai shara shagu hta nang hpe makawp maga na hte; nang hpe bau sin na matu, Karai Kasang gaw shi a lamu kasa ni hpe hkang da na ra ai.

¹² Nlung ni hta na a lagaw n ahtu u ga, shanhte a lata ni hte nang hpe pawn la na mara ai.

¹³ Hkanghkyi ni hte lapu ni, matse ai hkanghkyi ni hte tuk rawng ai lapu ni a ntsa e, nang kabye hkawm lu na ra ai.

¹⁴ Karai Kasang gaw, “Ngai hpe tsaw ra ai ni hpe, ngai hkye la na ring ngai; ngai hpe Madu zawn yin la ai ni hpe ngai makawp maga na ring ngai.

¹⁵ Shanhte ngai hpe shaga yang, ngai shanhte hpe htan ya na nngai; shanhte ru tsang hkrum yang, ngai shanhte hte rau nga nga na nngai. Ngai shanhte hpe mawai la nna; shagrau sha-a na mawe ai.

¹⁶ Ngai shanhte hpe asak galu shangun na nngai, ngai shanhte hpe hkye hkrang la na nngai,” nga nna tsun ai.