SHAKAWN KUNGDAWN 57 - Jinghpaw Common Language Bible 2009

Karum La Na Matu Akyu Hpyi Ai Ga

¹ Ngai gaw nang hta shim nga lu na matu du sa nngai majaw; Karai Kasang e, ngai hpe matsan dum la e, matsan dum la e law. Laru kaba ni lai mat wa ai aten du hkra, na a singkaw ni a shingnip hta ngai shingwung nga na nngai.

² Tsaw Htum ai Karai Kasang ngu ai, nye a ra kadawn ai lam shagu hta karum la ai Karai Kasang hpe ngai shaga nngai.

³ Shi gaw sumsing lamu kaw nna htan ya ai hte ngai hpe hkye hkrang la na ra ai; ngai hpe dip gamyet sha ai ni hpe shi dang kau na ra ai. Karai Kasang gaw shi a dinggrin tsaw ra myit hte sadi sahka myit, ngai hpe madun dan na ra ai.

⁴ Masha shan sha ai hkanghkyi ni zawn, gumlau hpyen ni wang shinggrup da ai ngai hkrum nga nngai. Shanhte a wa ni gaw nri hte pala ni zawn rai nga ai, shanhte a shinglet ni dai ai nhtu ni zawn rai ma ai.

⁵ O Karai Kasang e, lamu hta na a hkik hkam ai lam hte ga ntsa ting hta mung, na a hpung shingkang dan hkung nga ai hpe madun dan u.

⁶ Nye a gumlau hpyen ni ngai hpe rim na matu nye a lam e, sumgawn jahkrat da nga ma ai; ngai gaw myit ru myit tsang hkrum nga nngai. Nye a lam hta shanhte nhkun htu tawn ma ai, rai tim shanhte mahtang dai kaw di hkrat bang ma ai.

⁷ Karai Kasang e, ngai tsep kawp kam hpa nga nngai; ngai nang hpe mahkawn mangoi hte shakawn na nngai!

⁸ Nye a wenyi e, dum hprang u! Nye a tingse hte sumpyi e, dum hprang u! Jan hpe mung ngai jasu na nngai!

⁹ O Madu e, amyu baw ni a ka-ang hta, nang hpe ngai chyeju dum nga na nngai. Amyu masha ni a man e, ngai nang hpe shakawn nga na nngai.

¹⁰ Na a dinggrin tsaw ra myit gaw sumsing lamu ni de dep nga ai; na a sadi sahka mung lamu kaw du hkra dep nga ai.

¹¹ Karai Kasang e, lamu hta na a galu kaba ai lam hte aga ntsa ting hta e mung, na a hpung shingkang dan hkung nga ai hpe madun dan nga u law.