SHAKAWN KUNGDAWN 47 - Jinghpaw Common Language Bible 2009

Tsaw Htum Ai Hkawhkam

¹ Masha amyu yawng hte e, kabu gara ai hte lahpawk dum mu! Nsen sharawt ai mahkawn mangoi ga ni hte Karai Kasang hpe shakawn mu!

² Tsaw Htum ai dai Madu gaw hkrithpa wa rai nga ai; shi gaw mungkan yawng hpe up hkang nga ai galu kaba ai hkawhkam wa rai nga ai.

³ Shi gaw anhte hpe masha amyu ni hpe dang lu ai, awng padang lam jaw ya nga ai; shi gaw anhte hpe masha amyu baw ni hpe up hkang shangun nga ai.

⁴ Dai Madu gaw anhte shanu nga na lamu ga hpe anhte a matu lata san ya nga sai; dai gaw shi tsaw ra ai shi a amyu masha ni a gumrawng mai ai sut gan rai nga ai.

⁵ Karai Kasang gaw shi a tingnyang de lung nga ai. Dai Madu lung wa yang, kabu gara jahtau garu ai nsen hte pahtau dum ai nsen ni hpe na lu nga ai.

⁶ Karai Kasang hpe mahkawn shakawn mu! Anhte a hkawhkam wa hpe mahkawn shakawn mu!

⁷ Karai Kasang gaw mungkan yawng hpe up ai hkawhkam wa rai nga ai; mahkawn mangoi ga ni hte shi hpe shakawn kungdawn mu!

⁸ Karai Kasang gaw shi a chyoi pra ai tingnyang hta dung nga ai; shi gaw amyu baw ni yawng hte hpe up hkang nga ai.

⁹ Masha amyu baw ni a du salang ni gaw Abraham a Karai Kasang a amyu masha ni hte rau hpawng nga ma ai. Hpyen dap ni yawng hta daru magam n-gun shi grau kaba nga ai; shi gaw tsaw htum ai hku up hkang nga ai.