SHAKAWN KUNGDAWN 28 - Jinghpaw Common Language Bible 2009

Karum La Na Matu Akyu Hpyi Ai Ga

¹ Nye a dahpran shara rai nga ai Madu e, ngai nang hpe shaga nngai. Nye a hpyi jahtau ai nsen hpe madat ya e! Ngai shaga ai nsen hpe nang n htan ya ai rai yang, katsan ga e shang sa wa ai ni hta ngai lawm mat wa na nngai.

² Karum la na matu ngai nang hpe hpyi jahtau ai hte na a chyoi pra ai Htingnu maga de nye a lata ni hpe sharawt tawn ai shaloi, ngai hpyi ai nsen hpe na ya e.

³ Tara n lang ai ni hte mung, n hkru ai amu galaw ai ni hte mung, masha a n-gup aga ni gaw jinghku zawn hku hkau nga ti mung, shanhte a myit masin ni hta n ju n dawng ai myit rawng nga sai ni hte rau ngai hpe hkum daw dan et.

⁴ Shanhte hpa galaw sai lam hte shanhte shut hpyit kau sai n hkru n shawp ai amu a matu, shanhte hpe ari jaw u; shanhte a sat lawat yawng a matu shanhte hpe ari jaw u; shanhte hpe ang ai hte maren tai ya u!

⁵ Dai Madu gaw kaning re ai amu galaw sai shing n rai, shi hpa galaw tawn sai lam ni hpe, shanhte hpa zawn n nawn ya nga ma ai; dai majaw, shi shanhte hpe ari jaw na ra ai, shanhte hpe htani htana shamyit kau na ra ai.

⁶ Dai Madu hpe shakawn kungdawn nga mu; shi gaw karum la na matu nye a hpyi jahtau ai nsen hpe na ya ni ai.

⁷ Dai Madu gaw ngai hpe makawp maga ai hte ninggang tai ya nga ai; ngai shi hpe kam hpa nga nngai. Shi gaw ngai hpe karum la ai lam jaw ya ai hte ngai hpe kabu gara shangun nga ai; Ngai shi hpe kabu gara ai mahkawn ga ni hte shakawn nga nngai.

⁸ Dai Madu gaw shi a amyu masha ni hpe makawp maga nga ai; lata la hkrum ai shi a hkawhkam wa hpe makawp maga ai hte hkye hkrang la nga ai.

⁹ Madu e, na a amyu masha ni hpe hkye hkrang la u, na a amyu masha ni hpe shaman ya u. Shanhte hpe yu ai sagu rem wa tai nga nna, shanhte hpe htani htana lanu lahku nga u law.