SHAKAWN KUNGDAWN 26 - Jinghpaw Common Language Bible 2009

Mai Kaja Ai Masha Langai Mi A Akyu Hpyi Ga

¹ O Madu e, teng man ai lam hpe ngai galaw nna nang hta tsep kawp kam hpa nga nngai majaw ngai hpe mara n kap ai wa ngu nna htawn shana ya e.

² Madu e, ngai hpe dinglik yu nna chyam yu et, nye a myit ra ai lam ni hte myit sawn ai lam hpe san jep ya e.

³ Na a dinggrin tsaw ra myit gaw nye a lam woi ningshawng rai nga ai; na a sadi sahka ai myit mung ngai hpe tut nawng e, lam woi ya nga ai.

⁴ Manu n dan ai masha ni hte ngai rau hpawng nga nngai n rai; sawt ai masha ni hte ngai hpa n seng nga nngai.

⁵ N hkru ai masha ni a hpawng hpe ngai n dawng nga nngai, tara n lang ai ni hpe ngai koi yen nga nngai.

⁶ Madu e, ngai mara n kap nga nngai hpe madun lu na matu, nye a lata hpe ngai kashin nngai; nawku daw jau na matu na a tawn hkungri hpe shinggrup hkawm nngai.

⁷ Chyeju dum ai mahkawn mangoi ga langai ngai mahkawn nna na a mauhpa magam amu ni yawng hpe tsun dan nngai.

⁸ O Madu e, nang nga ai nta hte, na a hpung shingkang shanu nga ai shara hpe ngai tsaw ra nga nngai.

⁹ Yubak kap ai ni hte rau ngai hpe hkum jahten kau et; masha sat ai ni hkrum na ari kaw na ngai hpe jahti tawn da e;

¹⁰ shanhte gaw n hkru n shawp ai lam hpe aten shagu galaw nga ma ai, mayun kumhpa hpe hkap la na matu, tut nawng e, jin jin rai ma ai.

¹¹ Nye a matu chyawm gaw, tara ai lam hpe ngai galaw nga nngai; ngai hpe matsan dum ai hte hkye hkrang la e law!

¹² Hkrit hpa shara yawng hte kaw na, ngai shim lum nga nngai; shi a amyu masha ni a shawa hpawng hta Ngai gaw dai Madu hpe shakawn nngai.