SHAKAWN KUNGDAWN 147 - Jinghpaw Common Language Bible 2009

Chyahtum Chyalai N-gun Rawng Ai Karai Kasang Hpe Shakawn Ai Ga

¹ Dai Madu hpe shakawn mu! Anhte a Karai Kasang hpe mahkawn shakawn na mai kaja nga ai; dai gaw sharawng awng ai lam rai nna, shi hpe shakawn kungdawn na mai nga ai.

² Dai Madu gaw Yerusalem mare hpe bai de da nna, bra hkawm mat wa sai Israela amyu masha ni hpe bai shinggyin la nga ai.

³ Shi gaw myit daw ai ni hpe shamai ya nna, shanhte a ningma ni hpe ahkyen kayawp ya wu ai.

⁴ Shi hpan da sai shagan ni a hti hkum ni hpe daw dan nna; langai hte langai hpe mying shamying da ya wu ai.

⁵ Anhte a Madu gaw galu kaba nga nna chyahtum chyalai n-gun hte hpring nga ai wa rai nga ai; shi a nyan hpaji hpe shadawn lu nga ai n rai.

⁶ Shi gaw shagrit shanem ai ni hpe sharawt la ti mung; tara n lang ai ni hpe ga de du hkra agrawp ayai kau wu ai.

⁷ Dai Madu hpe mahkawn mangoi ga hte mahkawn shakawn mu; anhte a Karai Kasang hpe tingse hte mahkawn shakawn mu.

⁸ Shi gaw lamu hta sumwi ni hpe kahpyan da nhtawm, lamu ga a matu marang hpe shi jahtu ya nga ai; shing rai, kawng ntsa hkan e mung, tsingdu ni hpe shatut da nu ai.

⁹ Shi gaw yam nga ni hpe shahpa jaw ya ai hte, u hka hkalung ni ngoi shaga ai shaloi, shat ni hpe jaw ya nga ai.

¹⁰ N-gun ja ai gumra ni hpe shi n ra sharawng nga ai hte share shagan ai hpyenla ni hpe shi yu kabu nga ai n rai.

¹¹ Rai ti mung, shi hpe shagrau sha-a ai ni hte shi a dinggrin tsaw ra myit hta kam hpa nga ai ni hpe shi ra sharawng nga ai.

¹² Yerusalem e, dai Madu hpe shakawn u! Ziun e, na a Karai Kasang hpe kungdawn u!

¹³ Shi gaw na a mare chyinghka ni hpe shangang da nna, na a amyu masha ni hpe, shi shaman ya nga ai.

¹⁴ Shi gaw na a lamu ga jarit ni hpe shim nga shangun nna; sau ai hkaulan mam hta nang hpe shakat ya nga ai.

¹⁵ Shi gaw ginding aga de, ga matsun shangun dat nna, dai mungga hte maren, tin tin byin wa nga ai.

¹⁶ Shi gaw hkyen hpe nba zawn hpyan jahkrat dat nna, hkyen gumdin ni hpe ga nhpu zawn, gat dat wu ai.

¹⁷ Shi gaw sin tawng ni hpe lung sha ni zawn jahkrat dat nna; shi dat dat ai kashung lagyi ai hpe kadai mung n hkam lu nga ai.

¹⁸ Dai hpang, shi a ga matsun dat dat nna, hkyen hpe shabyawng kau dat nu ai; nbung hpe shi dat dat nna, hka shi ni lwi wa nga ai.

¹⁹ Shi gaw shi a amyu masha ni hpang de, shi a mungga hte shi a sharin achyin ai matsun mungga hte tara ni hpe Israela amyu masha ni hpang de jaw ya nga ai.

²⁰ Shi gaw kaga amyu baw ni a matu, ndai zawn re ai lam n galaw ya wu ai rai nna; shanhte gaw shi a tara ni hpe n chye nga ma ai. Dai Madu hpe shakawn mu!