SHAKAWN KUNGDAWN 136 - Jinghpaw Common Language Bible 2009

Chyeju Shakawn Ga

¹ Shi gaw mai kaja nga ai majaw, dai Madu hpe chyeju dum shakawn nga mu; shi a tsaw ra myit htani htana agrin nga ai.

² Hpara ni yawng hta kaba htum ai Karai Kasang hpe chyeju dum shakawn mu; shi a tsaw ra myit htani htana agrin nga ai.

³ Madu ni yawng hta chyahtum chyalai n-gun rawng htum ai dai Madu hpe chyeju dum shakawn nga mu; shi a tsaw ra myit htani htana agrin nga ai.

⁴ Shi chyu sha mauhpa lamik kumla kaba galaw lu nga ai; shi a tsaw ra myit htani htana agrin nga ai.

⁵ Shi a hpaji hte sumsing lamu hpe shi hpan da nu ai; shi a tsaw ra myit htani htana agrin nga ai.

⁶ Shi gaw sung ai hka ni a ntsa e, ginding aga hpe gaw da nga ai; shi a tsaw ra myit htani htana agrin nga ai.

⁷ Shi gaw jan hte shata hpe galaw da nu ai; shi a tsaw ra myit htani htana agrin nga ai.

⁸ Jan gaw nhtoi hpe up hkang na matu shi hpan da nu ai; shi a tsaw ra myit htani htana agrin nga ai.

⁹ Shata hte shagan ni hpe hpan ai gaw shana hpe up na matu rai nga ai; shi a tsaw ra myit htani htana agrin nga ai.

¹⁰ Egutu amyu masha ni a kasha alat ni hpe shi sat kau nu ai; shi a tsaw ra myit htani htana agrin nga ai.

¹¹ Israela amyu masha ni hpe Egutu mung kaw nna shi woi wa nu ai; shi a tsaw ra myit htani htana agrin nga ai.

¹² Shi a n-gun ja ai lata, daru magam n-gun hte hpring ai lahpum ni hte, shanhte hpe woi wa nu ai; shi a tsaw ra myit htani htana agrin nga ai.

¹³ Shi gaw Nawng hkyeng hpe lahkawng brang di nna ga garan kau nu ai; shi a tsaw ra myit htani htana agrin nga ai.

¹⁴ Shi a amyu masha ni hpe de a ka-ang hku shi woi lai mat wa nu ai; shi a tsaw ra myit htani htana agrin nga ai.

¹⁵ Rai ti mung, shi gaw Egutu hkawhkam hte shi a hpyen luksuk ni hpe dai nawng hta lup si shangun nu ai; shi a tsaw ra myit htani htana agrin nga ai.

¹⁶ Shi a amyu masha ni hpe nam mali hku shi woi wa nu ai; shi a tsaw ra myit htani htana agrin nga ai.

¹⁷ Shi gaw daru magam n-gun hte hpring nga ai hkawhkam ni hpe sat kau nu ai; shi a tsaw ra myit htani htana agrin nga ai.

¹⁸ Mying gumhkawng ai hkawhkam ni hpe sat kau nu ai; shi a tsaw ra myit htani htana agrin nga ai.

¹⁹ Shi gaw Amori hkawhkam Sihon hpe sat kau nu ai; shi a tsaw ra myit htani htana agrin nga ai.

²⁰ Bashan hkawhkam Oga hpe sat kau nu ai; shi a tsaw ra myit htani htana agrin nga ai.

²¹ Shi gaw shanhte a lamu ga hpe shi a amyu masha ni a lata hta ap ya nu ai; shi a tsaw ra myit htani htan agrin nga ai.

²² Shi gaw dai ni hpe shi a shangun ma rai nga ai Israela hpe jaw nu ai; shi a tsaw ra myit htani htana agrin nga ai.

²³ Anhte sum mat ga ai shaloi, anhte hpe shi malap kau mi ai n rai; shi a tsaw ra myit htani htana agrin nga ai.

²⁴ Shi anhte hpe anhte a gumlau hpyen ni a lata kaw nna shalawt dat mi ai; shi a tsaw ra myit htani htana agrin nga ai.

²⁵ Shi gaw hkrung mahkrung guji guyang yawng hte hpe lusha jaw sha nga ai; shi a tsaw ra myit htani htana agrin nga ai.

²⁶ Sumsing lamu na Karai Kasang hpe chyeju dum shakawn nga mu; shi a tsaw ra myit htani htana agrin nga ai.