SHAKAWN KUNGDAWN 133 - Jinghpaw Common Language Bible 2009

Ngwi Pyaw Sim Sa Ai Hte Hkrung Nga Lu Ai Hpe Shakawn Ai Ga

¹ Karai Kasang a amyu masha ni myit hkrum rap ra nna, rau hpawng nga lu ai gaw, kade wa mauhpa rai nga a hka, dai gaw kade wa ngwi pyaw nga a hka!

² Dai gaw, Arun a baw hte nhka mun kaw nna, shi a palawng du hkawp du hkra, byawng hkrat mat wa ai manu dan ai namman sau zawn rai nga ai.

³ Dai gaw Hermon bum ntsa hte Ziun bum ni a ntsa e, hkrat ai numri ni zawn rai nga ai. Dai gaw galoi mung htum ngu n nga ai asak, dai Madu ga sadi jaw ya sai shi a shaman chyeju rai nga ai.