SHAKAWN KUNGDAWN 131 - Jinghpaw Common Language Bible 2009

Shagrit Shanem Let Madu Hpe Kam Hpa Nga Ai Wa A Akyu Hpyi Ga

¹ Madu e, ngai gaw nye a gumrawng gumtawng ai myit hpe kau da ni ai; nye a myit tsaw myit dap rawng ai akyang kaw nna mung kayin kau da ni ai. Ngai gaw kaba la ai amu ni hta na mung, nye a matu chye na na, nau wa yak la ai amu lamang ni hpe mung ngai myit n lawm nga nngai.

² Shing rai na malai, ngwi pyaw sim sa ai lam hta ngai myit dik myit hkut nga nngai. Chyu chyu ai ma gaw shi kanu a lahpyen hta atsin sha yup galeng taw nga ai zawn, nye a myit masin mung atsin sha nga nga li ai.

³ Israela e, ya kaw nna htani htana prat dingsa, dai Madu hpe kam hpa nga mu law!