SHAKAWN KUNGDAWN 129 - Jinghpaw Common Language Bible 2009

Israela A Hpyen Ni Hkrat sum Na Matu Akyu Hpyi Ai Ga

¹ Israela e, nang gaw naw kaji nga ai aten kaw nna, na a gumlau hpyen ni nang hpe kaning rai zingri zingrat di lai wa sai lam, anhte hpe tsun dan mi.

² “Ngai naw kaji nga ai aten kaw nna, nye a gumlau hpyen ni ngai hpe mazut ai hku zingri nga ma ti mung, shanhte ngai hpe n dang lu ma ai.

³ Shanhte gaw nye a shingma hta sung ai nma jahkang ya nna; dai gaw shawt tawn da ai hkauna pa zawn rai nga ai.

⁴ Rai ti mung, ding man ai wa ngu ai dai Madu gaw, mayam yam ai kaw nna, ngai hpe shalawt la nu ai.

⁵ Ziun hpe n dawng n yawt nga ai ni nlang hte gaw, kaya kahpa hte sum mat nna, jahtaw kau ai hkrum nga mu ga.

⁶ Shanhte yawng hte gaw nta numgaw e tu nna, dai ni pyi garai n tu kaba wa lu yang, hkraw si mat ai tsingdu ni zawn rai mat mu ga,

⁷ dai hpe kadai mung hkan lahkawn shinggyin ai n rai; dai hpe shabawn hpai mat wa ai wa mung kadai n nga nga ai.

⁸ “Dai Madu gaw nanhte hpe shaman ya nga u ga, dai Madu a mying nsang hte anhte nanhte hpe shaman ya ga ai,” nga nna lai hprang masha ni kadai mung n tsun na mara ai.