SHAKAWN KUNGDAWN 124 - Jinghpaw Common Language Bible 2009

Shi A Amyu Masha Ni Hpe Makawp Maga Ai Karai Kasang

¹ Lama wa, dai Madu anhte a hpang maga de n nga ai rai yang, hpa baw byin wa na rai nga ga ta? Israela amyu masha ni e, htan yu mu!

² “Anhte a gumlau hpyen ni anhte hpe gasat wa ai shaloi dai Madu anhte hpang maga de lama n nga ai rai yang;

³ shanhte hta masin kahtet ai gaw tung wa nna anhte hpe chyahkrung mayu kau na mu ai;

⁴ shing rai, hka mawru gaw anhte hpe magawn mat wa nna dai hka anhte hpe kaput kau na ru ai,

⁵ n-gun ja ai hka hpungla ni anhte hpe marit si shangun na sha rai mu ai.”

⁶ Anhte hpe anhte a gumlau hpyen ni a lata hta n jahtum kau shangun ai dai Madu hpe anhte chyeju dum nga ga.

⁷ Jau gawng wa a mahkam hta na lawt wa ai u zawn, anhte mung lawt mat wa lu saga ai; mahkam daw agrawp mat nna, anhte lawt lu saga ai!

⁸ Sumsing lamu hte ginding aga hpe hpan da ai dai Madu kaw nna, anhte hpe karum ai lam pru wa nga ai.