SHAKAWN KUNGDAWN 123 - Jinghpaw Common Language Bible 2009

Matsan Dum La Na Matu Akyu Hpyi Ai Ga.

¹ Madu e, nang up hkang nga ai Sumsing lamu de ngai mada yu nngai.

² Shangun ma wa gaw shi a madu a ntsa e mung, shangun ma numsha gaw shi a nta madu jan a ntsa e mung shamyet shanat nga ai zawn, anhte a Madu Karai Kasang a matsan dum ai chyeju hpe hkam la lu ai aten du hkra, anhte mung nang hpe a mada yu nga na ga ai.

³ Madu e, anhte hpe matsan dum la mi, anhte hpe matsan dum la mi law! Anhte gaw n kaw n law re ai hte kaya kahpa nau wa hkrum sha nga saga ai.

⁴ Anhte gaw lu su ai ni a asawng asang re ai hte gumrawng gumtawng hte dip gamyet sha ai ni a shatan nhkan hpe hkam sha ai aten mung nau wa na mat wa saga ai.