RUHTA 3 - Jinghpaw Common Language Bible 2009

Ruhta Gaw Ningrum Ningtau Mu Tam Ai

¹ Aten mi na ai hpang, Naomi gaw Ruhta hpe, “Na a matu ningrum ningtau langai ngai tam lajang ya na re; shing rai na a matu dinghku langai de la lu na rin dai.

² Nang hte rau magam amu galaw ai manang numsha ni a Madu Bua gaw ndai nta ni a nta chyen mi rai nga ai, amyu dap a jinghku rai nga ai hpe dum u. Ya madat u, dai na de shi gaw chyarang ntsa e muk-yaw mam kabye nga na ra ai.

³ Dai rai nna, nang hka shin, manam pyaw ai sau ni chya ai hte kaja reng ai bu hpun palawng ni hte sumli da u. Dai hpang shi mam kabye nga ai chyarang de sa wa su; rai ti mung, shi lu ngut, sha ngut ai aten du hkra nang dai shara hta du nga ai lam shi hpe hkum chye shangun et.

⁴ Shi yup ai shara hpe atsawm sha matsing da u; shi yup ra shang ai hpang nba ka-aw nna hkan shang wa nhtawm shi a lagaw nhpang e kaleng taw nga u. Shaloi nang gara hku galaw kaning rai na gaw shi tsun na ra ai,” ngu nna htan wu ai.

⁵ Ruhta gaw, “Nang matsun ai lam yawng mayawng ngai hkan shatup na nngai,” ngu nna htan wu ai.

⁶ Dai rai nna Ruhta gaw chyarang pa de sa mat wa nhtawm, shi a kamoi shi hpe tsun matsun dat ai hte maren hkan galaw wu ai.

⁷ Bua gaw lusha sha ngut ai hpang, myit pyaw ai hte nga nga wu ai. Shi gaw muk-yaw mam sumpum de sa wa nhtawm sa yup nga ai. Ruhta mung atsin sha sit sa wa nhtawm nba ka-aw nna shi a lagaw nhpang e shang kaleng taw nga ai.

⁸ Shana aten hta, shi gaw akajawng sha hprang wa nna kayin dat yang shi a lagaw nhpang e numsha langai mi kaleng taw nga ai hpe mu nna mau nga ai.

⁹ Shi gaw, “Nang kadai rai nga n ta?,” ngu nna san dat wu ai. Shi gaw, “Madu e, Ruhta rai nngai. Nang gaw ngai hpe hta ang ai ni htum ai nta chyen rai nga ndai majaw, ngai hpe yu lanu lahku na lit lu nga ndai. Dai re ai majaw, chyeju hte ngai hpe hkungran la rit,” ngu nna htan wu ai.

¹⁰ Shi gaw, “Dai Madu gaw nang hpe shaman ya u ga. Na a kamoi hpe nang galaw daw ai hta, dinghku sadi dung ai lam grau kaba nga ai hpe nang madun dan nga ndai. Matsan, lu su n nga, shabrang kadai hpe mung nang mai tam nga tim nang kadai hpe mung n myit ndai.

¹¹ Ruhta e, ya nang hpa mung hkum tsang et. Nang sari sadang hte hpring nga ai num rai nga ai gaw, mare masha shagu chye nga ma ai zawn, nang hpyi mahpyi lam shagu hpe ngai galaw na nngai.

¹² Ngai gaw nang hte ni dik ai nta chyen rai nga ai hte, na a matu lit nga ai masha rai nngai rai tim, ngai hta grau ni ai hpu nau langai naw nga nga ai.

¹³ Dai na gaw, nang ndai shara hta naw nga u; hpawt de na aten hta na a matu shi lit la na, n la na lam ni hpe anhte san sagawn yu na ga ai. Shi lit la na rai jang mung rai nu ga; dai gaw kaja nga ai. Shi lama lit n la mayu ai rai yang, ahkrung nga ai Karai Kasang hta ga shaka la nhtawm ngai nang hpe lit la lanu lahku na nngai. Ya gaw, nang ndai shara hta jahpawt du hkra naw yup nga u,” ngu nna tsun wu ai.

¹⁴ Dai rai nna, shi gaw dai shara, shi a lagaw nhpang e yup nga nna shi a matu nhtoi garai n pra yang, shi rawt wu ai; hpa majaw nga yang, Bua gaw shi ndai shara de sa sai lam kadai hpe mung n chye shangun mayu ai majaw rai nga ai.

¹⁵ Bua gaw shi hpe, “Na a ntsa palawng raw nna, ndai shara e hpyan da u,” ngu nna tsun wu ai. Dai hte maren, shi galaw nhtawm muk-yaw mam ganoi pawng manga shi ru bang ya nna dai hpe shi a lahpa hta ka-aw shagun dat ya wu ai. Dai hpang shi gaw dai arai hte rau mare de bai nhtang mat wa wu ai.

¹⁶ Shi gaw dum nta de bai du wa ai shaloi, shi a kamoi gaw shi hpe, “Ngai nam e, gara hku rai nga n ni?,” ngu nna hkap san wu ai. Ruhta mung Bua shi hpe galaw ai lam azin ayang bai wa tsun dan wu ai.

¹⁷ Shi gaw jat nna, “Na a nmoi hpang de kaman hkum nhtang wa, shi gaw ngai hpe ndai muk-yaw mam yawng jaw dat ai,” ngu nna kamoi hpe tsun dan wu ai.

¹⁸ Naomi gaw kanam hpe, “Ruhta e, ndai lam yawng kaning rai byin wa na lam, nang mu lu ai aten du hkra la madat yu ga. Bua gaw dai ni ndai amu lajang ngut ai aten du hkra shi jahkring da na ra ai n rai,” ngu nna tsun wu ai.