PRU MAT 36 - Jinghpaw Common Language Bible 2009

¹ “Bezalela yan Aholiaba hte dai Madu e hpaji hparat, zai byeng-ya jahpring ya ai kaga lata sama masha ni yawng hte gaw dai Madu hkang da mada hte maren, dai Chyoi Pra ai Sum hpe gaw gap ai hta ra mara mahkra hpe galaw na rai ma ai.

Amyu Masha Ni Kumhpa Law Law La Sa Ma Ai

² Mawshe gaw Bezalela yan Aholiaba hte dai Madu jaw ya ai nyan marai hte karum na matu myit sharawng nga ai kaga kung kyang ai masha ni yawng hpe shaga la nhtawm bungli galaw hpang wa na matu shanhte hpe tsun wu ai.

³ Shanhte gaw dai Chyoi Pra ai Sum hpe gaw gap na matu Israela amyu masha ni la sa ai alu arai yawng hpe Mawshe a lata kaw na hkap la ma ai. Rai ti mung, dai hta kaga Israela amyu masha ni gaw shanhte a alu arai ni hpe Mawshe hpang de jahpawt shagu naw la sa nga ma ai.

⁴ Dai hpang amu galaw nga ai dai kung kyang ai masha ni gaw Mawshe kaw sa nhtawm,

⁵ “Ndai amyu masha ni mahtang amu galaw na matu dai Madu hkang da ai amu a matu ra ai hta jan hkra alu arai la sa shajang nga ma ai,” ngu nna tang madun ma ai.

⁶ Dai rai nna Mawshe gaw kadai mung Chyoi Pra ai Sum a matu ya kaw nna hkungga arung arai matut jaw lu na myit dai n rai, ngu nna dap ting hpe shana dat wu ai. Amyu masha ni mung hkungga arai loi mi mung n la sa mat ma ai.

⁷ Lu la da sai arai ni mung dai amu hpe shangut shakre la na matu law ai hte pyi jan nga sai.

Dai Madu A Hpung Shingkang Shanu Nga Ai Sum Hpe Galaw Ai

⁸ Dai Madu a hpung shingkang shanu nga ai Sum hpe galaw nga ai ni hta na grau kung kyang ai masha ni mahtang sawm tsit ai, shaba pu nsam rawng ai, hte hkyeng ai sagu ri ni hte da ai mani tsawm ai lachyit sumpan hta singkaw tu ai hkrung kanu ni a hkrang sumla hte maka ka tawn ai nba grang shi galaw da nga ma ai.

⁹ Nba grang shagu a shadawn shadang gaw maren rai nna galu de pe 42, nda de pe 6 hpra rai nga ai.

¹⁰ Shanhte gaw dai nba grang manga hpe langai mi tai mat hkra shada da chyi matut da nna kaga manga hte hpe mung dai hte maren galaw da nga ma ai.

¹¹ Shanhte gaw matut ai nba grang shagu a shakung hku sawm tsit ai ri hte shangwang hku shakau ma ai.

¹² Shanhte gaw nba grang langai mi hta shangwang manga shi, kaga langai mi a shakung hku shangwang manga shi di nna shada da hkrum hkrum di da nga ai.

¹³ Shanhte gaw ja kachyi manga shi hpe mung galaw nna dai chyinghkyi hte nba grang lahkawng yan hpe mahkai matut da ma ai rai nna, nba grang langai sha tai mat nga ai.

¹⁴ Dai hpang shanhte gaw Sum hpe galup na matu bainam mun hte nba grang shi langai galaw ma ai.

¹⁵ Shanhte gaw dai ni yawng hpe maren galaw ai rai nna galu de pe 45, nda de pe 6 rai nga ai.

¹⁶ Shanhte gaw nba grang manga hpe langai sha di nna chywi nhtawm kaga nba grang kru hpe mung dai hku chywi matut da nga ma ai.

¹⁷ Shanhte matut da ngut sai nba grang langai mi a shakung lam mi hta shangwang hku manga shi, bai langai mi a shakung lam mi hta shangwang hku manga shi di nna galaw ma ai.

¹⁸ Shanhte gaw magri mang chyinghkyi manga shi galaw nhtawm lahkawng yan hpe shangwang hku ni hta mahkai matut bang dat mu yang, galup sumpan gaw langai sha tai mat nga ai.

¹⁹ Shanhte gaw jaw jahkyeng da ai sagu la hpyi hte magap langai mi, shinggan e galup na matu mani tsawm ai shanhpyi hte galaw da nga ma ai.

²⁰ Shanhte gaw Sum shakum a matu hpunpyen shadun hpe mung shaji hpun hte galaw ma ai.

²¹ Hpunpyen shagu gaw tsaw de pe 15, nda de yungnu 27 rai nna,

²² bung ai dawhkai lahkawng hkawng galaw bang nga ai. Dai ni hpe shada da matut da lu nga ai. Hpunpyen ni yawng hta dawhkai ni bang da nga ai.

²³ Shanhte gaw dingda maga de na matu hpunpyen hkun galaw nna,

²⁴ de a htumpa de gumhpraw machyaw mali shi jaw da nga ma ai; hpunpyen langai mi hta na dawhkai lahkawng a matu machyaw lahkawng hkawng hte madi da nga ai.

²⁵ Shanhte gaw Sum a dingdung maga de na matu hpunpyen hkun galaw ma ai,

²⁶ hpunpyen shagu hte de a htumpa de gumhpraw machyaw mali shi jaw da nga ma ai; hpunpyen langai mi a matu machyaw lahkawng hkawng rai na rai nga ai.

²⁷ Shanhte gaw Sum a shingdu ngu na sinna maga de na matu mung hpunpyen kru hte galaw ma ai;

²⁸ de a jut lahkawng a matu mung, hpunpyen lahkawng rai na rai nga ai.

²⁹ Dai jut na hpunpyen ni hpe htumpa de kahtap bang nna ntsa de du hkra matut da nga ai. Dai hte maren hpunpyen lahkawng hte jut lahkawng mung galaw da nga ma ai.

³⁰ Dai rai nna hpunpyen matsat hte gumhpraw machyaw shi kru rai nga ai; hpunpyen shagu hta machyaw lahkawng hkawng rai nga ai.

³¹ Shanhte gaw shaji hpun hte htinggrang shi manga galaw nhtawm Sum a maga mi a matu manga,

³² sinna maga jahtum shingdu na hpunpyen ni a matu manga galaw bang ma ai.

³³ Ka-ang na htinggrang hpe chyawm gaw Sum a shingdu aman ka-ang hku dinghkren da nga ma ai.

³⁴ Dai hpunpyen ni hpe ja hte kayawp nna htinggrang dinghkren na matu shanghkawng mung galaw ma ai. Dai htinggrang ni hpe ja ni hte sup ma ai.

³⁵ Shanhte gaw sawm tsit ai, shaba pu nsam rawng ai hte hkyeng ai sagu ri ni hte mani tsawm ai lachyit sumpan da nhtawm dai hta singkaw tu ai hkrung kanu hkrang sumla ka shakap ai nba grang galaw ma ai.

³⁶ Shanhte gaw dai nba grang gran da na matu shadaw mali hpe shaji hpun hte galaw nhtawm dai ni hpe ja chyinghkyi ni hte mahkai da ma ai. Dai hpang shanhte gaw shadaw ni hpe shangang da lu na matu gumhpraw machyaw mali jaw bang da ma ai.

³⁷ Dai Sum chyinghka a matu sawm tsit ai, shaba pu nsam rawng ai hte hkyeng ai sagu ri ni hte mani tsawm ai lachyit sumpan hte da nna maka ka shatsawm da ai chyinghka grang langai hpe mung galaw ma ai.

³⁸ Dai chyinghka grang a matu shadaw manga hte chyinghkyi ni hpe galaw nna, shadaw matu ni hte ngaugran ni hpe aja hte kayawp ma ai; shadaw ni a matu mung magri mang machyaw manga hte galaw da nga ma ai.