NEHEMIA 6 - Jinghpaw Common Language Bible 2009

Nehemia Hpe Gumlau Ai

¹ Sanbalat, Tobia, Geshem hte naw ngam nga ai anhte a gumlau hpyen ni gaw chyinghka lam ni hta chyinghka ni hpe anhte garai n shakap lu ti mung, anhte bunghku kum ngut sai lam hte dai ni hta n gaw hkrup ai sha shangam da ai lam hpa mung n nga sai shiga hpe na ma ai.

² Dai rai nna Sanbalat hte Geshem yan gaw ngai hpang de shiga shana dat nna, shanhte hte ngai Ono pa layang na kahtawng langai ngai hta hkrum hkat na lam hpaji jaw dat ma ai. Dai gaw ngai hpe machyi shangun na matu maw mawn shakut ai shanhte a maw lanyet langai mi rai nga ai.

³ Ngai gaw shanhte hpang de kasa ni hpe shangun dat nhtawm, “Ngai gaw ahkyak ai amu galaw nga nngai majaw dai de n lu yu wa nngai. Nanhte kaw sa hkrum na hte sha nye a bungli hpe n jahkring da lu na nngai,” ngu nna tsun dat we ai.

⁴ Shanhte gaw dai shiga hpe sha ngai hpang de mali lang shana dat mu tim, lang shagu shawng na lang hte maren shanhte hpe htang dat nngai.

⁵ Dai hpang Sanbalat gaw shi a shangun ma langai mi hte manga lang ngu na ka ai laika hte rau shagun dat wu ai. Dai gaw dazik n kap ai laika rai nga ai.

⁶ Dai hta ning nga nna rawng nga ai: “Nang hte Yuda amyu masha ni gumlau rawt na maw mawn nga myit dai majaw nang bunghku bai gaw gap nga ndai nga nna grup yin na masha amyu ni ashi langai pru ai lam Geshem ngai hpe tsun dan nga ai. Shi gaw nang hkum nan hkawhkam tai na maw mawn ai hte,

⁷ nang gaw Yuda hkawhkam rai nga ai, nga nna Yerusalem hta tsun dan na matu myihtoi nkau mi hpe nang san da nga nit dai nga nna mung tsun dan ai. Ya shi a madu hkawhkam gaw dai lam hpe teng teng na mayu nga ai majaw dai mabyin hte seng nna nang hte ngai hkrum zup shaga na, ngai hpaji jaw nngai.”

⁸ Ngai gaw shi hpe ning ngu htang shana dat ni ai: “Nang tsun ai ga n teng nga lit dai. Dai yawng hpe nang nan pau tsun kau nga nit dai.”

⁹ Shanhte chyawm gaw bungli jahkring kau ya na matu anhte hpe jahkrit maw nga ma ai. Ngai gaw, “Karai Kasang e, ya rai tim, ngai hpe n-gun shaja ya e law!,” ngu nna hpyi we ai.

¹⁰ Dai aten daram hta, ngai gaw Mehetabela a kashu, Delaia a kasha Shemaia ngu ai, nta shinggan de n pru hkawm sa lu ai wa hpang de sa chyai nngai. Shi gaw ngai hpe, “Nang hte ngai rau sha Nawku Htingnu a chyoi pra ai shara hta sa makoi gyem nna chyinghka ni hpe la da ga. Hpa majaw nga yang, shanhte nang hpe sa sat na mara ai; shanhte gaw nang hpe galoi shana rai tim sa sat kau na mara ai,” ngu nna tsun wu ai.

¹¹ Ngai gaw, “Ngai gaw dai zawn hprawng makoi ai baw masha n rai nngai. Nye a asak hpe Nawku Htingnu kata hta makoi let hkye mawai la shakut na zawn nang myit nawn da wu ni? Ngai gaw dai zawn n galaw na nngai,” ngu nna htan wu ai.

¹² Ngai gaw dai lam hpe myit sawn yu yang, Karai Kasang gaw Shemaia hpe tsun ai n rai; ngai hpe mahtang ndai sadi jaw na matu Tobia hte Sanbalat yan mahtang shi hpe mayun kumhpa jaw da nga ai majaw rai nga ai hpe ngai dum chye we ai.

¹³ Shan gaw nye a arawng sadang jahten ya nna shagrit shanem kau lu hkra nga, ngai hpe jahkrit let yubak kap wa na matu shan gaw shi hpe saw la nga ma ai.

¹⁴ Ngai gaw, “Karai Kasang e, Tobia hte Sanbalat yan hpa galaw kau masai hpe dum let shan hpe ari jaw u. Ngai hpe jahkrit mayu nga ai Nodia numsha hte kaga myihtoi ni yawng hpe mung adum nga u law,” ngu nna hpyi we ai.

Bungli Hpungdim

¹⁵ Bungli galaw ai nhtoi manga shi lahkawng ya na ai hpang, bunghku mahkra hpe Elula shata hkun manga ya shani e shangut da lu sai.

¹⁶ Ndai lam hpe grup yin amyu baw ni hkan nga ai anhte a gumlau hpyen ni na mu yang, Karai Kasang karum la ai a jaw e, bungli galaw la sai hpe masha shagu chye wa ma ai; shanhte myi man sum mat nga masai hpe dum chye wa ma ai.

¹⁷ Dai aten laman hte tup hta e, Yuda ningbaw ni gaw Tobia hte laika matut mahkai hkat ma ai.

¹⁸ Dai sha n-ga, Ara a kasha Shehkania ngu ai shi a Yuda katsa wa a majaw Yuda mung na amyu masha ni shi a hpang maga de nga nga ma ai. Dai sha n-ga, shi a kasha Yehohanan mung Berehkia a kasha Meshulam a shayi sha hpe hkungran la nga ai.

¹⁹ Ya amyu masha ni gaw Tobia galaw sai mai kaja lam hte seng nna nye a man tsun na rai ma ai, ngai tsun ai lam magup shi hpe tsun dan na ma ai. Shi chyawm gaw ngai hpe jahkrit na nga, ngai hpe ayan ka shagun nga ai.