KASA 25 - Jinghpaw Common Language Bible 2009

Hkawseng Wa Kaw Pawlu Hpyi Lajin Ai Lam

¹ Ya Hpestu gaw dai mungdaw de du ai masum ya na ai hpang Kesare mare kaw nna Yerusalem mare de lung wa ai.

² Hkinjawng agyi ni hte Yuda masha ni a agyi salang ni Pawlu gaw mara amyu myu tawt lai ai wa re ngu nna Hpestu hpe sa tsun ma ai.

³ Shanhte gaw Pawlu hpe lam e hkap gyam sat kau na matu makoi magap ai hku lajang da ma ai. Dai rai nna, shanhte hpe chyeju galaw ai hku nna, Pawlu hpe Yerusalem mare de sa dat ya na Hpestu kaw hpyi ma ai.

⁴ Rai ti mung Hpestu gaw, “Pawlu hpe Kesare mare e she sharen tawn nga ai rai nna, ngai nan mung dai mare de gade nna yang bai wa na rai nga ai.

⁵ Nanhte a ningbaw ningla ni ngai hte rau Kesare de yu wa nna Pawlu hta mara lama ma nga ai rai yang gaw, sa shagun mu,” ngu nna htan mu ai.

⁶ Shing rai munggyi Hpestu gaw, Yerusalem mare e nhtoi matsat ya, shing n rai shi ya daram shanhte hte rau hkring nga nhtawm Kesare mare de bai yu wa ai. Hpang shani e tara tingnyang hta dung let, Pawlu hpe shaga shashawn na hkang dat wu ai.

⁷ Pawlu du jang Yerusalem mare na yu wa ai Yuda masha ni gaw shi hpe tsap shinggrup da let shanhte sakse n madun lu ai mara kaba law law wa shi a ntsa e shagun mu ai.

⁸ Rai ti mung Pawlu gaw, “Yuda masha ni a jep ai Tara hpe mung, Nawku Htingnu hpe mung, Hkawhkam Kehta hpe mung, ngai hpa n shut n hpyit yu nngai,” ngu nna shi hkum hpe makawp maga ai ga tsun nga ai.

⁹ Hpestu gaw Yuda amyu masha ni kaw myiman pa mayu wa ai rai nna Pawlu hpe, “Nang Yerusalem mare de lung wa nna, dai yang e nye a man e ndai mara shagun da ai lam ni hte seng nna daw dan hkam na, nang hkraw nga n ni?,” ngu nna shi hpe san wu ai.

¹⁰ Pawlu gaw, “Ya ngai hkawseng Kehta a tara tingnyang man e nan tsap nga nngai rai nna, ndai kaw e daw dan hkam na hpyi nngai, nang nan atsawm sha chye nga ai hte maren Yuda masha ni hpe ngai hpa mung n shut nngai.

¹¹ Lama wa ngai tara hpe tawt lai nna si ging ai mara lama ma galaw kau ai rai yang ngai hpe shalawt dat na matu ngai hpyi nem na n rai. Rai ti mung, ndai ni ngai hpe shagun ai mara langai mi mung n teng yang gaw, shanhte a lata de ngai hpe kadai wa ap kau lu na n rai. Ngai hpe Hkawhkam Kehta hkum nan jeyang daw dan ya na matu hpyi lajin nngai” ngu nna htan wu ai.

¹² Dai shaloi Hpestu gaw, shi a mung bawng salang ni hte bawngban ngut jang, “Nang Kehta kaw sa na hpyi nit dai rai nna, Hkawseng kaw sa lu na re,” ngu nna htan wu ai.

Agripa Yan Bernike A Man E Pawlu Hpe Shachyen Ya Ai Lam

¹³ Dai hpang gade nna yang, Hkawhkam Agripa yan Hkawhkam jan Bernike gaw Kesare mare de Hpestu hpe shachyen shaga na matu du sa ma ai.

¹⁴ Dai yang e nhtoi tsawmra ya nga nga yang Hpestu gaw Pawlu a lam Hkawhkam Agripa hpe tsun dan wu ai gaw, “Ndai yang e Hpilik sharen kau da ai bawng masha langai mi nga ai.

¹⁵ Ngai Yerusalem mare de sa du ai ten hta Yuda hkinjawng agyi ni hte salang ni dai wa hpe mara shagun nna shi hpe mara jaw daw dan ya na matu hpyi ma ai.

¹⁶ Rai ti mung ngai gaw, mara shagun hkrum ai wa langai ngai, mara shagun ai ni hte myiman chyaw rai nna shanhte mara shagun da ai hpe tsun dan na ahkaw ahkang n jaw ai sha marai langai ngai hpe ap kau na gaw anhte Roma masha ni a htung lai n re ngu nna shanhte hpe tsun da mawe ai.

¹⁷ Dai rai nna shanhte ndai mare de sa du ma yang ngai mung n hkring ai sha hpang shani tara tingnyang e dung nna dai wa hpe woi wa ya na hkang dat we ai.

¹⁸ Shi hpe mara shagun ai maga na ni rawt nna mara tsun bun ma ai, rai ti mung shanhte shagun na zawn nawn ai mara lam mi mung n shagun tawn mu ai.

¹⁹ Shanhte tsun ai lam yawng gaw, shanhte a nawku htung lam hte si mat sai Yesu ngu ai masha langai mi a lam sha shi hte tsun dangrang hkat ma ai. Dai Yesu gaw si mat sai rai tim naw hkrung nga ai, nga nna Pawlu atsun nga ai.

²⁰ Dai lam shiga kaning di sagawn la na n chye we ai majaw, ndai mara shagun da ai lam ni hte seng nna Yerusalem de sa nhtawm dai kaw daw dan hkam na hkraw n hkraw Pawlu hpe ngai san yu we ai.

²¹ Rai ti mung Pawlu gaw shi a lam Kehta Hkawhkam she daw dan ya u ga, shi hpe naw sin da na hpyi nga ai. Dai majaw hkawseng hpang de shi hpe ngai sa dat lu ai aten du hkra sin da na shi a matu ngai hkang da ni ai,” ngu nna tsun da wu ai.

²² Shaloi Agripa gaw Hpestu hpe, “Ngai nan mung dai wa a ga na mayu nngai,” ngu wu ai. Hpestu gaw, “Hpawt de na lu na re ai,” ngu nna htan wu ai.

²³ Hpang shani e, Agripa yan Bernike gaw hkik hkam ai arawn asam shingkang dat nna, hpyen du kaba ni hte mare na arawng lu ai masha kaba ni hte rau sa nna shawa rung gawk kaba de shang wa ai. Dai shaloi Hpestu hkang dat ai hte maren Pawlu hpe shaga shashawn dat mu ai.

²⁴ Shaloi Hpestu tsun wu ai gaw, “Hkawhkam wa Agripa hte ya nang e anhte hte rau hpawng nga ai ni yawng hte e, Yerusalem mare hte ndai mare na Yuda masha ni yawng hte gaw, dai wa hpe jahkrung da n mai sai nga nna jahtau bu ai gaw, ya nanhte mu ai ndai wa hpe rai nga ai.

²⁵ Rai ti mung, ndai wa hta sat kau ging ai mara hpa mung ngai n mu we ai. Shi nan Hkawseng kaw du na hpyi ai majaw sa dat na ngai myit daw dan da se ai.

²⁶ Rai ti mung shi hte seng nna Hkawseng hpang de tup hkrak ka shana dat na hpa mung ngai n lu nngai. Dai rai nna ngai shi hpe nanhte a man e mung grau nna Hkawhkam Agripa a man de shaga shashawn ai lam gaw, shi hpe Hkawhkam wa jep san yu ngut jang, ngai ka shana dat na lam lama ma lu u ga matu rai nga ai.

²⁷ Hpa majaw nga yang shi hpe shagun ai mara ni hpe atsawm sha n madun dan ai bawng langai mi hpe sa dat na gaw n jaw nga ai ngu nna ngai myit nngai,” ngu mu ai.