JAW JAU 21 - Jinghpaw Common Language Bible 2009

Hkinjawng Ni A Chyoi Pra Lam

¹ Dai Madu gaw Arun amyu hkinjawng ni hpe tsun na matu Mawshe hpe, “Hkinjawng kadai mung si mang makoi mayang poi ni hta shang lawm nna tinang hkum hpe n san n seng di shangun lu na ma ai n rai;

² rai ti mung tinang a dum nta hta nga ai kanu kawa, kahpu kanau, shayi shadang sha,

³ shing n rai num garai n wa ai kajan ni a majaw chyawm gaw n san n seng ai hpe hkam la na rai wu ai.

⁴ Shi gaw mayu dama daw hkrang ai makyin jinghku wa a si hkrung si htan hta shi hkum hpe awu asin hkam la shangun lu na n rai.

⁵ “Hkinjawng kadai mung tinang a baw shangun lu na n rai; tinang a nhka mun ahkut shara lu na n rai. Tinang a sharung shayawt lam madun dan na matu tinang hkum hpe gadoi jahpye lu na wu ai n rai.

⁶ Shi gaw chyoi pra nga lu na rai nna nye a mying ningsang hpe jahpoi lu na n rai. Shi gaw ngai hpe lusha hkungga nawng jau ai wa rai nna chyoi pra nga lu na rai wu ai.

⁷ Hkinjawng wa gaw chyoi pra nga ai majaw shawa num tai yu sai num hpe mung, mahkawn n jet ai num hpe mung, jahka kau sai num hpe mung la lu na n rai.

⁸ Ngai hpe lusha hkungga sak jaw nga ai hkinjawng re majaw amyu masha ni mung shi hpe chyoi pra ai hku myit nawn na rai ma ai. Ngai gaw dai Madu rai nna chyoi pra nga nngai majaw nye a amyu masha ni hpe chyoi pra shangun na mawe ai.

⁹ Hkinjawng wa a shayi sha shawa num tai mat ai rai yang, shi kawa a sari jahpoi ya nu ai majaw wan nat kau ai hkrum na rai wu ai.

¹⁰ “Hkinjawng kaba wa gaw shi a baw hta namman chya sai hte hkinjawng hpun palawng bu hpun nna ap nawng da sai majaw shi a sharung shayawt nga ai hpe madun dan na matu shi a kara hpe hpyan da lu na n rai; hpun palawng ni hpe gang je kau lu na wu ai n rai.

^11-12 Shi gaw nye a matu ap nawng da sai rai nna, shi hkum hpe ayuk jahtuk di ai mung, shi a kanu kawa ngu na si mang taw ai nta hta pru wa shang wa rai nna dai Chyoi Pra ai Sum hpe awu asin di lu na wu ai n rai.

¹³ Shi gaw hkawn jet hpe sha la lu na rai wu ai.

¹⁴ Shi gaw gaida jan hpe mung, la hte hka ai num hpe mung, shawa num galaw yu sai num hpe mung la lu na n rai. Shi gaw tinang a amyu matu hta na hkawn jet sha la lu na rai wu ai.

¹⁵ Shing n rai yang, chyoi pra ging ai shi a kashu kasha ni n san n seng na rai ma ai. Ngai gaw dai Madu rai nga nngai hte maren shi hpe Hkinjawng Kaba hku jahka san da ni ai,” ngu nna tsun wu ai.

^16-17 Dai Madu gaw Arun hpe tsun na matu Mawshe hpe ning ngu hkang da wu ai: “Hkum hkrang loi mi mung ra n rawng ai na a amyu matu ni kadai mung ngai hpe lusha hkungga nawng ya mai nga ai. Dai amu hpe prat mi hte prat mi agalaw nga na rai myit dai.

¹⁸ Hkum hkrang loi mi mung ra n rawng ai wa sha hkungga nawng ya mai nga ai. Myi kyaw ai, lagaw hten ai, hkum n tsawm ai,

¹⁹ hkum hkrang hten ai, lagaw lata daw nna hten htu ai;

²⁰ mashi marung htingkung ai, kadun akyi ai, myi machyi ai, maru ru ai hte unuk ni kadai mung sit sa lu na n rai.

²¹ Hkinjawng Arun a amyu hta na hkum hkrang loi mi ra rawng sai wa kadai mung ngai hpe lusha hkungga nawng ya mai nga ai n rai.

²² Dai zawn re ai wa gaw ngai hpe nawng ya ai dai chyoi pra ai hkungga hte chyoi pra htum ai lusha hkungga yan hpe sha mai nga ai.

²³ Rai ti mung shi gaw hkum hkrang hta ra rawng nga sai majaw chyoi pra ai nba grang hte tawn hkungri de shani sa wa lu na n rai. Ngai gaw shanhte hpe shachyoi shapra ai dai Madu rai nga nngai majaw ndai chyoi pra ai arai ni hpe awu asin di lu na n rai.”

²⁴ Ndai hte gaw Arun hpe mung, Arun a shadang sha ni hpe mung, amyu masha Israela ni yawng hpe mung Mawshe tsun ai ga rai nga ai.