JAW JAU 1 - Jinghpaw Common Language Bible 2009

Hkum Ting Nat Nawng Ai Shagu Hkungga Ni

¹ Dai Madu gaw Mawshe hpe dai Madu a hpung shingkang shanu nga ai Sum kaw nna shaga la nhtawm, Israela masha ni shagu hkungga ni nawng jau ai shaloi,

² kaning rai hkan sa galaw na tara ni tsun matsun wu ai. Kadai rai ti mung yam nga hkungga nawng jau ai shaloi, dumsu langai ngai, shing n rai sagu langai ngai, shing n rai bainam langai ngai nawng ya na rai myit dai.

³ Dai wa gaw shi a dumsu hpe wan nat hkungga nawng jau ai rai yang, ra n rawng ai usu langai la sa na rai wu ai. Dai hpe dai Madu a hpung shingkang shanu nga ai Sum a shang wa chyinghka lam hta tawn da lu na rai nga ai. Dai Madu gaw dai wa hpe hkap la na ra ai.

⁴ Dai wa gaw de a baw ntsa e shi a lata mara da na rai wu ai; dai gaw na a yubak mara ni la kau ya na matu nawng ya ai hkungga tai na ra ai.

⁵ Dai wa gaw dai yang e usu sat nna, Arun a shadang sha hkinjawng ni mahtang de a asai hpe dai Madu hpang de la nawng nhtawm Sum a shang wa chyinghka lam e nga ai tawn hkungri a man mali grup grup yawng de dai hpe ru hkaw bun na rai nga ai.

⁶ Dai hpang dai wa gaw yam nga ahpyi hpe gaw kau nna, dai hpe kahtam hpya na rai wu ai.

⁷ Hkinjawng ni gaw tawn hkungri ntsa e hpun lajang mara nna wan shachyi na rai ma ai.

⁸ Shanhte gaw dai wan ntsa hta hkungga shan tawng ni hte hpawn abaw hte asau ni hpe mara da na rai ma ai.

⁹ Dai wa gaw pu sin hte hpang lagaw ni hpe kashin nhtawm san da hkrum ai hkinjawng ni mahtang tawn hkungri ntsa e hkum ting nat nawng na rai ma ai. Dai lusha a manam pyaw ai shangau hpe dai Madu awng sharawng nga ai.

¹⁰ Sagu hte bainam langai ngai nawng jau ai rai yang, dai hta lang ai hkungga gaw ra n rawng ai ala rai lu na rai nga ai.

¹¹ Dai wa gaw dai hpe tawn hkungri a dingdung maga e sat na rai wu ai. Hkinjawng ni gaw de a asai hpe tawn hkungri ntsa man mali shagu de lapri na rai ma ai.

¹² Dai wa gaw dai ashan hpe kahtam hpya ngut ai hpang san da hkrum ai hkinjawng wa mahtang shan tawng ni yawng hte hpawn abaw, asau ni hpe wan ntsa hta mara tawn da na rai wu ai.

¹³ Dai wa gaw kata na pu sin hte hpang lagaw ni kashin nhtawm, hkinjawng wa gaw dai Madu hpang de shagu hkungga di na nawng jau ai hte dai ni yawng hpe tawn hkungri ntsa e mara nna nat na rai wu ai. Dai lusha a manam pyaw ai sangau hpe dai Madu awng sharawng nga ai.

¹⁴ U hte wan nat hkungga nawng jau ai rai yang, de a hkungga gaw hkrudu shing n rai ura rai na rai nga ai.

¹⁵ Hkinjawng wa gaw dai hpe tawn hkungri de la sa nna du manai di nhtawm de a baw hpe tawn hkungri ntsa e nat na rai wu ai. Dai asai hpe chyawm gaw tawn hkungri makau e hkyen kau na rai wu ai.

¹⁶ Shi gaw de a ma-u hte dai hta rawng ai arai ni hpe shaw kau nna tawn hkungri a sinpraw maga na dap sumpum hta kabai kau na rai wu ai.

¹⁷ Shi gaw u singkaw jum da nna, n gang je kau ai sha, singkaw hte nawng hkum hpe ga kahpyan nna tawn hkungri hta hkum ting nat na rai wu ai. Dai lusha a manam pyaw ai sangau hpe dai Madu awng sharawng nga ai.