HOSEA 7 - Jinghpaw Common Language Bible 2009

¹ “Ngai gaw nye a Israela amyu masha ni hpe shamai shatsai nna shanhte hpe bai ngamu ngamai shangun mayu ai aten shagu, ngai mu mada ai lam yawng gaw shanhte a n shawp n kap ai amu hte shanhte galaw ai n hkru lam hkrai rai nga ai. Shanhte shada da masu hkalem hkat ma ai; shanhte gaw nta shang hpya nna arai lagu la ma ai; shanhte gaw nmaw lam hkan nga ai masha ni hpe kashun kashe hpya sha nga ma ai.

² Shanhte gaw dai n hkru ai amu ni hpe hpa zawn n nawn ma ai, ngai gaw dai n hkru ai amu yawng hpe adum nga na nngai; rai ti mung shanhte a yubak mara gaw shanhte hpe shinggrup da nga ai, ngai gaw dai hpe n mu lu hkra koi yen lu nga nngai n rai.

Hkawhkam Htingnu Kata Na Mayun Maw Mawn Ai Lam

³ Dai Madu gaw ning nga nna tsun ai: “Masha ni gaw shanhte a n hkru ai maw mawn lam hte hkawhkam wa hte shi a du salang ni hpe masu hkalem ma ai.

⁴ Shanhte yawng gaw gumle gumlau re ai ni hte sadi n dung ai ni rai ma ai. Muk kabaw ai wa gaw muk shadung kabaw na matu jin jin galaw da ai aten du hkra wan htung na wan n shagrung ai zawn shanhte a n ju n dawng ai myit gaw kraw kata e hkru nga ai.

⁵ Shanhte gaw hkawhkam wa a poi shani hta hkawhkam wa hte shi a du salang ni hpe sabyi hte angawk angak rai mat hkra jaw shanang da nga ma ai.

⁶ Rai sa, shanhte gaw shanhte a maw mawn ai lam gaw wan htung zawn hkru nga ma ai. Shanhte a pawt sindawng ai gaw shana tup hkru nga nna jahpawt manap e wan shinglet zawn grung nga ai.

⁷ “Shanhte a pawt sindawng ai gaw kahtet kang nga ai rai nna, shanhte gaw shanhte a up hkang du ni hpe sat kau ma ai. Shanhte a hkawhkam ni langai hpang langai lagyim sat kau hkrum nga manu ai, rai ti mung kadai mung karum la na matu ngai kaw akyu n hpyi ma ai.”

Israela Hte Masha Amyu Baw Ni

⁸ Dai Madu gaw ning nga tsun ai: “Israela amyu masha ni gaw ka-ang hkup sha kabaw ai muk tawng langai hte bung nga ai. Shanhte gaw shanhte a grup yin masha amyu baw ni hta shamyet shanat nga ma ai rai nna,

⁹ dai zawn maigan masha ni hpe shamyet shanat ai gaw shanhte a n-gun hpe hpya sha kau ya na rai nga ma ai hpe n dum n chye nga ma ai. Shanhte a nhtoi hti hkum ni htum mat wa nga ti mung de a lam hpe pyi shanhte n chye nga ma ai.

¹⁰ Israela amyu masha ni a myit tsaw myit dap ai gaw shanhte a matu sari jahpoi hkrum na lam rai nga ai. Lam magup byin hkrum hkra nga ma tim, shanhte gaw dai Madu shanhte a Karai Kasang ngai hpang de n kayin wa ma ai.

¹¹ Israela gaw angawk ai hkrudu langai zawn shara mi kaw nna shara mi de htawt hkawm nga ma ai. Shi a amyu masha ni gaw shawng nnan karum hkam la lu na matu Egutu kaw karum hpyi ma ai; dai hpang shanhte gaw Asuri hpang de kagat sa nga ma hka!

¹² Rai ti mung shanhte sa wa ai shaloi, ngai gaw sumgawn kahpyan nna ntsa malen u ni hpe zawn shanhte hpe rim la na we ai. Ngai gaw shanhte galaw ai n hkru ai amu a matu ari jaw na nngai.

¹³ “Shanhte gaw dingnye hkrum nga ma hka! Shanhte gaw ngai hpe kau da ai hte ngai hpe gumlau ma ai. Shanhte gaw shamyit kau ai hkrum na rai ma ai. Ngai shanhte hpe hkye la mayu nngai, rai ti mung shanhte ngai hpe nawku ai lam gaw n jaw nga malu ai.

¹⁴ Shanhte gaw ngai kaw myit malang ai hte akyu n hpyi ma ai, rai ti mung shing rai na malai, shanhte gaw ga de gum dagup nhtawm tara maigan masha ni galaw ai zawn hkrap agru ma ai. Shanhte gaw nai mam nsi naisi hte sabyi hpyi ma ai shaloi, shanhte hkum hpe tara maigan ni zawn gadoi jahpye ma ai. Shanhte hpa baw gumlau nga ma hka!

¹⁵ Ngai gaw shanhte hpe pawn ba ai hte n-gun shaja ya ai wa rai tim pyi, shanhte ngai hpe gumlau ma ai.

¹⁶ Shanhte gaw ngai kaw nna kayin mat wa nhtawm daru magam n-gun n rawng ai karai hpang de sha kayin mat wa ma ai. Shanhte gaw n ding ai ndan zawn kam hpa mai nga ai n rai. Shanhte a ningbaw ni myit tsaw myit dap ai hte ga shaga ma ai majaw, shanhte gaw du daw sai hkaw hte si mat na mara ai, Egutu masha ni gaw mani asawng na mara ai.”