ESAIA 32 - Jinghpaw Common Language Bible 2009

Ding Hpring Ai Myit Hte Hpring Ai Hkawhkam

¹ Lani mi na nhtoi hta ding hpring ai myit hte up na hkawhkam langai hte teng man rap ra ai tara hte up hkang na ningbaw ni paw pru wa na mara ai.

² Shanhte langai hte langai gaw nbung shingbyi shara hte nbung laru kaw na makoi shingbyi lu ai shara langai zawn tai na mara ai. Shanhte gaw zaibru jang e lwi nga ai hka shi ni zawn, akrin akraw re ai lamu ga hta nga ai kaba ai lunghkrung langai a shingnip zawn tai na mara ai.

³ Shanhte a myi hte na ni gaw hpaw wa nna amyu masha ni a ra kadawn lam ni hpe mu wa na mara ai.

⁴ Shanhte gaw galoi mung n hkam sharang lu ai ni n rai ma ai, rai ti mung shanhte gaw chye na hkawn hkrang ai nyan hte amu galaw nna shanhte tsun dan mayu ai lachyum hpe tsun dan na mara ai.

⁵ Angawk ai wa gaw shagrau ging nga ai shing n rai gumbyak masha gaw myit malang nga ai nga nna kadai mung myit yu na ma ai n rai.

⁶ Angawk ai wa gaw angawk ai hku shaga nga ai, n hkru ai amu galaw na matu myit shapraw nga ai. Shi galaw ai amu hte tsun ai ga ni gaw dai Madu hpe n kaw n law di nga ai, shi gaw kawsi kyet ai wa hpe galoi mung n jaw sha, hpang gara ai ni hpe lu na ntsin n jaw nga ai.

⁷ Myit n su ai wa gaw n hkru nga ai rai nna n hkru ai amu ni galaw nga ai; shi gaw matsan mayan masha ni hpe masu magaw ga hte jahten sharun na hte shanhte a ahkaw ahkang ni hpe hkum shingdang na matu maw mawn chye nga ai.

⁸ Rai ti mung shagrau ging ai wa chyawm gaw myit malang ai hku amu galaw nna ding man ai amu a matu ngang ngang tsap nga ai.

Tara Jeyang Ai Hte Bai Gram Lajang Ai

⁹ Apyaw sha nga nna tsin-yam tsindam kaw na lawt ai numsha ni e, ngai tsun nga ai ga hpe madat mu.

¹⁰ Ya chyawm gaw nanhte myit dik mai nga myit dai, rai ti mung htaning ndai aten hta nanhte a matu sabyi si shinggyin la na hpa n nga na ra ai majaw nanhte myit htum mat na marin dai.

¹¹ Nanhte gaw apyaw sha hte tsin-yam tsindam kaw na lawt ai hte nga yu manit dai; rai ti mung ya chyawm gaw hkrit gari nga manu! nanhte a hpun palawng ni raw sharun kau mu! Nanhte a nshang grup grup hta tsupni gyit da mu.

¹² Namhpun rawng ai yi hkauna ni hte sabyi sun ni hten za mat sai majaw sharung shayawt ai hte nanhte a sinda ni hpe adup mu,

¹³ ju sumwum ni hte tsing ni nye a amyu masha ni a lamu ga hta tu nga ai. Amyu masha ni kabu gara rawng lai wa sai dum nta ni yawng a matu mung, ngwi pyaw ai asak hkrung lam hte hpring ai mare a matu mung hkrap mu.

¹⁴ Hkawhkam htingnu pyi kabai kau hkrum na ra ai, mare daju gaw tsep kawp katsi katsang shara tai mat na ra ai. Dum nta ni hte shanhte hpe makawp maga ya ai hpyen dap ni htani htana hten run mat na ra ai. Lawze shazai ni dai hkan e brak hkawm nna sagu ni dai yang e udat shara mu na mara ai.

¹⁵ Rai ti mung Karai Kasang gaw kalang mi bai anhte a ntsa e shi a wenyi ru bang ya na ra ai. Jahkam da ai lamu ga gaw ga sau kaja wa na ra ai, yi hkauna ni ja kat ai nsi naisi ni hpe shapraw ya na ra ai.

¹⁶ Mungdan shara shagu hkan ding man ai hte teng man rap ra ai lam hpring wa na ra ai.

¹⁷ Masha hkum shagu gaw jaw ai amu galaw wa na mara ai majaw dai mung e ngwi pyaw sim sa lam hte shim lum lam htani htana nga nga na ra ai.

¹⁸ Karai Kasang a amyu masha ni gaw tsin-yam tsindam kaw na shalawt hkrum na mara ai, shanhte a dum nta ni ngwi pyaw sim sa ai hte shim nga na mara ai.

¹⁹ (Rai ti mung sin marang gaw maling htinggram ni a ntsa e hkrat na ra ai, mare mung shamyit kau hkrum na ra ai.)

²⁰ Masha shagu hte gaw nsi naisi ni a matu hka alaw alam lu lang ai hte lawze ni hte dumsu ni a matu shara shagu hkan shim ai udat shara nga nga na ra ai gaw kade sha kabu gara mai nga ai.