2 SAMUELA 3 - Jinghpaw Common Language Bible 2009

¹ Shawlu a dinghku hpe karum shadaw ai ni hte Dawi hpe karum ai ni a lapran e na na wa majan gasat nga ma ai. Dawi mahtang grau grau nna n-gun ja wa nhtawm shi hpe ninghkap ai ni mahtang grau grau nna yawm mat wa nga ma ai.

Dawi A Shadang Sha Ni

² Hebron mare e shangai ai Dawi a kasha kru hte gaw shanhte a shangai nhtoi hku hkan yang, Yezrela mare na kanu Ahinoam a kasha Amon;

³ Hkarmela mare na Nabala a gaida jan kanu Abigala a kasha Hkilab, Geshura Hkawhkam Talamai a shayi sha kanu Mahka a kasha Absalom;

⁴ kanu Hagit kaw na kasha Adoniya; kanu Abitala a kasha Shehpati;

⁵ Egla kanu kaw na Itream hte rai ma ai. Ndai hte gaw Hebron mare e shangai ai shadang sha ni rai ma ai.

Abna Gaw Dawi Hte Matut Ai

⁶ Dawi a masha ni hte Shawlu a dinghku hta sadi dung ai masha ni a lapran e gasat gala lam naw byin nga ai rai nna, Shawlu kaw hkan nang ai masha ni hta Abna gaw grau grau nna n-gun rawng wa nga ai.

⁷ Lani mi na aten hta, Shawlu a kasha Ishboshet gaw Abna hpe Shawlu a lashi num Rizpa ngu ai Aia a shayi sha hte rau yup ai ngu nna mara shagun wu ai.

⁸ Dai lam a majaw Abna hpe masin kahtet shangun wu ai rai nna shi gaw, “Shawlu hpe ngai gumlau kau nga nngai, ngu nang myit nawn da wu ni? Yuda a matu ngai teng teng ap nawng nga nngai ngu nang myit nawn da wu ni? Ngai gaw shawng nnan kaw nna na nwa Shawlu hte shi a kahpu kanau ni hte manaw manang makyin jinghku ni hta sadi dung lai wa ni ai rai nna Dawi a lata hta n sum mat hkra ngai nang hpe hkye mawai la ni ai; rai ti mung ya dai ni, ndai numsha langai a majaw sha nang ngai hpe mara tam nga n hka i!

^9-10 Dawi gaw Shawlu hte shi a amyu matu mara ni a lata na mungdan hpe la kau nhtawm mungdan htum ai shara mi kaw nna maga mi de hkren dam ai Israela hte Yuda mungdan lahkawng yan a hkawhkam tai shangun na lam, dai Madu Dawi hpe ga sadi jaw tawn nu ai. Ya chyawm gaw ndai lam teng wa hkra n shabyin taw gaw, Karai Kasang ngai hpe adup sat kau nu ga law!,” ngu nna jahtau tsun wu ai.

¹¹ Ishboshet chyawm gaw Abna hpe grai hkrit nga ai majaw ga hkaw mi mung n htan lu wu ai.

¹² Abna gaw dai aten e Hebron mare e nga ai Dawi hpang de kasa ni hpe dat dat nna, “Ndai mungdan hpe kadai wa up hkang na rai nga a ta? Ngai hte myit hkrum lam galaw tawn da ga, shaloi nang hpang maga de Israela ni yawng kayin mat wa hkra ngai karum ya na de ai,” ngu nna tsun shangun dat wu ai.

¹³ Dawi gaw, “Kaja nga ai! Rai ti mung masa lam langai hta lakap nna ngai nang hte myit hkrum lam galaw da na nngai: nang ngai hpe sa hkrum ai shaloi Shawlu a shayi sha Mihkala hpe ngai hpang de woi sa wa lu na rai ndai,” ngu nna htan wu ai.

¹⁴ Dawi mung Ishboshet hpang de kasa shangun dat nhtawm, “Nye a madu jan Mihkala hpe ap ya mi. Shi hpe hkungran la na matu Hpilisti masha ni a hpyi matu latsa hte ngai mari la ni ai,” ngu nna tsun shangun dat wu ai.

¹⁵ Dai rai nna Ishboshet gaw Mihkala hpe shi a madu wa rai nga ai Laisha a kasha Patiela kaw na woi mat wa ya wu ai.

¹⁶ Patiela mung Bahurim mare du hkra lam dingyang hkrap let hkan nang wu ai. Rai ti mung Abna gaw shi hpe, “Nta de nhtang wa su,” ngu jang shi nhtang mat wa wu ai.

¹⁷ Abna gaw Israela ningbaw ni kaw sa nna shanhte hpe, “Nanhte gaw aten na na kaw nna pyi Dawi hpe nanhte a hkawhkam shatai mayu myit dai re.

¹⁸ Ya chyawm gaw ndai aten e nanhte a matu ahkaw ahkang nan rai nga manit dai. Dai Madu gaw, ‘Nye a amyu masha Israela ni hpe Hpilisti masha ni a lata kaw na mung, kaga gumlau hpyen ni yawng a lata kaw na mung hkrang shaw la na nye a shangun ma Dawi hpe ngai lang na we ai hpe dum nga mu,’” ngu nna tsun ai.

¹⁹ Abna gaw Benyamin amyu bawsang hta na masha ni hpe tsun dan nhtawm Benyamin masha ni hte Israela masha ni myit hkrum daw dan ai lam Dawi hpe sa tsun dan na nga, Hebron mare de sa wa wu ai.

²⁰ Abna hte masha hkun hte gaw Hebron mare e nga ai Dawi hpang de sa du ma ai. Dawi mung shanhte hpe lusha poi hkap galaw daw wu ai.

²¹ Abna gaw Dawi hpe, “Ya ngai sa nna Israela masha ni yawng hpe madu hkawhkam a man de woi shang wa na nngai. Shanhte mung nang hpe hkawhkam zawn hkap la na mara ai; dai hpang nang ra ai lam nang lu la nhtawm, dai mungdan ting hpe up hkang lu na rai ndai,” ngu nna tsun wu ai. Shing rai Dawi mung Abna a shim lam a matu pahkam jaw ya let shi a lam de sa wa shangun wu ai.

Abna sat Kau Hkrum Sai

²² Dai hpang Yoab hte kaga Dawi a du salang ni gaw masha hpyen dawwa hpe hkan shachyut ai kaw na nhtang wa ma ai rai nna, lanep law law magawn wa ma ai. Abna chyawm gaw Dawi e shim lam pahkam hkam ya ai hte shangun dat ai majaw Dawi hte rau Hebron mare hta shi n nga nga ai.

²³ Yoab hte shi kaw hkan ai shi a masha ni du wa ma yang, Abna gaw Hkawhkam Dawi kaw sa nna, shim lam pahkam hte hpawn shi hpe shangun dat kau sai lam Yoab hpe hkap tsun dan ma ai.

²⁴ Dai rai nna Yoab gaw hkawhkam wa kaw shang nna shi hpe, “Nang hpa galaw kau sata? Abna mung nang kaw sa ai da aw! Shi hpe hpa majaw dai zawn sha dat dat kau wu ni?

²⁵ Shi ndai shara de sa ai gaw nang hpe hkalem kau nna nang galaw ai lam magup hte nang hkawm sa ai shara shagu hpe hkan chye kau na matu rai nga wu ai. Dai lam hpe nang hkrak sha chye da ang ai gaw re mi!,” ngu nna tsun wu ai.

²⁶ Dawi kaw nna pru mat wa ai hpang, Yoab gaw Abna hpe shaga wa na matu kasa ni hpe shangun dat wu ai. Shanhte gaw shi hpe Sira hka htung kaw nna woi nhtang wa ma ai; rai ti mung Dawi chyawm gaw dai lam hpa mung n chye da wu ai.

²⁷ Abna gaw Hebron mare de bai du jang, shi hpe shaga mayu ai majaw dinghkrai la nna mare chyinghka lam makau de woi sa nhtawm dai yang e shi a kan hpe nhkyi hte galun ya wu ai. Abna gaw Yoab a kanau Asahela hpe sat kau wu ai majaw shi mung sat kau ai hkrum nga wu ai.

²⁸ Dai shiga hpe Dawi na jang, shi gaw, “Dai Madu gaw nye a daw dan ai lam ni hte Abna sat kau hkrum ai lam hta ngai hte nye a mungdan hta tsep kawp mara shagun shara n nga ai gaw chye nga u ga.

²⁹ Dai amu a ari ahpri gaw Yoab hte shi a dinghku masha ni yawng hta hkrat bun nu ga! Shi a dinghku kata hta na masha nkau mi hta ban shagu galang gyi maksa ana mung, hkrit hpa manggang ana mung, n-gun kaba n dat lu ai mung, majan ginra hta sat kau hkrum ai mung, kawsi hpang gara ai mung anga nga nu ga law!,” ngu nna tsun wu ai.

³⁰ Shing rai Yoab hte shi a kanau Abishai yan gaw Gibeon mare na majan hta shan a kanau Asahela hpe sat kau ya ai majaw Abna hpe matai dawp la nga ma ai.

Abna Hpe Makoi Mayang Ai

³¹ Dawi gaw Yoab hte shi a masha ni hpe shanhte a bu hpun palawng ni gang je kau nhtawm lachyit nba lawai let Abna a matu sharung shayawt na lam hkang dat wu ai. Dai moi mang makoi mayang ai shaloi, Hkawhkam Dawi mung shi hkum nan moi mang shingdu kaw nna hkan sa nang wu ai.

³² Abna hpe Hebron mare e lup makoi ma ai rai nna, hkawhkam wa mung lup e ja ja jahtau hkrap wu ai; amyu masha ni yawng mung hkrap ngu hkrap ngoi nga ma ai.

³³ Dawi mung Abna a matu ndai sharung shayawt ga hte mahkawn mangoi wu ai: “Abna gaw Masha angawk langai zawn hpa majaw si mat nga a ni?

³⁴ Shi a lata ni hpe gyit da ai n rai; Shi a lagaw ni hpe sumri hte hkang da ai n rai. N hkru ai wa a lata hte sat kau hkrum ai wa zawn shi si mat nga sahka!.” Amyu masha ni mung shi a matu kalang mi bai hkrap ngu hkrap ngoi nga ma ai.

³⁵ Amyu masha ni gaw Dawi hpe lama ma sha na matu, shani tup shagwi shakut ma ai, rai ti mung shi gaw, “Jan garai n shang yang, lama ma ngai sha kau hkrup ai rai yang, Karai Kasang ngai hpe adup sat kau u ga!,” ngu nna dagam shaka wu ai.

³⁶ Dai amu masha nlang mu matsing nna yu sharawng ma ai; kaja wa hkawhkam wa galaw ai lam magup hpe amyu masha ni yu sharawng nga ma ai.

³⁷ Dawi a masha ni yawng hte Israela amyu masha ni yawng chyawm gaw hkawhkam wa ndai Abna sat kau hkrum ai amu hta daw chyen mi sha pyi n lawm nga ai hpe chye na hkawn hkrang nga ma ai.

³⁸ Shaloi hkawhkam wa gaw shi a du salang ni hpe, “Dai Israela mung hta ningbaw kaba langai si mat sai hpe nanhte dum chye nga myit ni?

³⁹ Ngai gaw Karai Kasang e lata san da sai hkawhkam rai nga tim pyi, dai ni ngai gawng kya nga nngai. Ndai Zeruia a kasha ni gaw nye a matu nau wa ja la nga masai. Ndai ru hka amu galaw shapraw ai majaw shanhte hkam la ging ai hte maren dai Madu ari jaw ya u ga law!,” ngu nna tsun wu ai.