1 HKAWHKAM 7 - Jinghpaw Common Language Bible 2009

Shawlumon A Hkawhkam Htingnu

¹ Shawlumon gaw shi a matu hkawhkam htingnu langai mi hpe mung gap wu ai rai nna dai hpe shi masum ning tup aten la nhtawm shangut da nga ai.

^2-3 Dai Lebanon Maling a htingnu gaw galu de pe 150, nda de pe 75 hte tsaw de pe 45 rai nga ai. Arit hpun shadaw ni gaw yan masum mali rai nna, yan mi hta shadaw 15 rai nga ai; arit hpun dangbat ni shadaw ni hta htinggrang nga ai. Shadaw ni hta htinggrang nga ai dangbat mali shi manga a ntsa e arit hpunpyen ni nep da nga ai. Numgaw hpe arit hpun hte galaw nna arung arai bang da ai gawk maga de htawn dat nna shadaw ni hte madi da nga ai.

⁴ Shakum lahkawng maga de hkuwawt hku masum dingren da nga ai.

⁵ Chyinghka ni hte hkuwawt hku ni hta jut ding hkrang rawng nga ai; hkuwawt hku yan masum hte gaw man yawng ai kaga shakum maga de mung htawnglawng rai nga ai.

⁶ Dai htingnu a Gawknu gaw galu de pe 75, nda de pe 45 rai nga ai. Dai hta e npan jan langai rawng ai rai nna dai hpe dawhpum shadaw ni hte madi da nga ai.

⁷ Shawlumon amu daw dan hparan yang lang ai shara ngu na Tingnyang tawn da ai Gawk shing n rai Tara jeyang ai Gawknu ngu nna mung shamying ai gawk madang kaw nna numgaw hkren arit hpunpyen ni hte nep da nga ai.

⁸ Dai Tara jeyang ai Gawknu shingdu a wang kata e nga ai Shawlumon shi rawng nga na htingnu ni hpe mung kaga ni zawn galaw da nga ai. Shi gaw shi a madu jan ngu na Egutu hkawhkam a shayi sha nga na nta hpe mung dai zawn galaw da nga ai.

⁹ Ndai nta ni hte hkik hkam ai wang ni yawng hpe npawt nhpang kaw nna bwimung du hkra tawk shatsawm da ai nlung ni hte galaw da nga ai. Dai nlung ni hpe lahkawng maga zingret hte shadawn ret da ai nlung, nhkun hta shadawn nna tawk shatsawm da ai nlung ni hpe atsawm sha hkyen shatsawm da nga ai.

¹⁰ Npawt nhpang gaw ai nlung kaba ni gaw nlung maw e atsawm sha tawk la ai nlung kaba ni rai nga ai, dai nlung ni hta nkau mi gaw pe 12 galu nna nkau mi pe 15 galu nga ai.

¹¹ Dai ni yawng a ntsa e mung kaga nlung ni, shadawn tawk da ai nlung ni hte arit dangbat ni rai nga ai.

¹² Hkawhkam wang hta mung, Nawku Htingnu kata wang hta mung, Nawku Htingnu gawk de shang wa ai chyinghka lam hta mung tawk da ai nlung masum hta arit dangbat langai ngai gaw mara ai shakum ni nga nga ai.

Huram A Bungli

¹³ Hkawhkam Shawlumon gaw Turu mare e nga nna lata amu galaw sha ai Huram mying ai masha langai mi hpe shaga la wu ai; shi gaw magri mang hpaji amu hta kung kyang ai wa rai nga ai.

¹⁴ Shi a kawa gaw Turu mare na n nga mat wa sai magri mang janghkam amu hta kung kyang ai wa rai nga ai; shi a kanu mahtang Naphtali amyu bawsang hta na rai nga ai. Huram gaw chye chyang ai hpaji hte zai byeng-ya mahkrum madup law sai lata hpaji kung ai wa rai nga ai. Magri mang amu yawng mayawng hte seng ai hpe woi hpareng na matu hkawhkam Shawlumon saw shaga ai hpe hkap la ai wa rai nga ai.

Magri Mang Shadaw Lahkawng

¹⁵ Shi gaw tsaw de pe 27, kaba tinglum de pe 18 re ai magri mang shadaw lahkawng hpe jaw nna Nawku Htingnu a shang wa chyinghka lam e shadun da wu ai.

¹⁶ Shi gaw shadaw yan a ntsa e shadun na matu pe 7 chyen tsaw ai magri mang bandung lahkawng hpe jaw wu ai.

¹⁷ Shadaw lahkawng yan a ntsa e mung sumgawn zawn hkri ai saidawng maka kasi ni hte,

¹⁸ hkainu si zawn re ai magri mang sumbaw mung langai mi hta yan lahkawng hkawng di nna mawn sumli da wu ai.

¹⁹ Dai bandung yan gaw pe 6 galu nna hka law pan hkrang hte bung nga ai,

²⁰ shadaw matu yan hta sumgawn zawn hkri ai saidawng hte kayep ai ntsa e shadun da nga ai. Hkainu si nampan lahkawng tsa hpe mung dai bandung tinglum shadaw ntsa e yan lahkawng di nna galaw da nga ai.

²¹ Huram gaw dai magri mang shadaw lahkawng hpe Nawku Htingnu a shang wa chyinghka lam a man e shadun wu ai; langai mi hpe dingda maga de shadun nna Yahkin ngu nna shamying wu ai. Bai langai mi hpe mahtang dingdung maga de shadun da nhtawm dai hpe Bua ngu nna shamying wu ai.

²² Dai hpang hka law pan hkrang kasi hte bung ai magri mang bandung yan hpe magri mang shadaw lahkawng a ntsa e shadun da nga ai. Shing rai shadaw galaw ai amu shangut da nga ai.

Magri Mang Hka Lawng

²³ Huram gaw din din re ai magri mang hka lawng langai mi hpe galaw ai rai nna dai gaw sung de pe 7 chyen, shingdan pe 15, hte de a grup grup pe 45 rai nga ai.

²⁴ De a mahka grup yin na matu ni hta magri mang tauba si yan lahkawng hpe hka lawng hte rau jaw shalawm wu ai.

²⁵ Dai hka lawng hpe man maga mi de usu masum rai shinggan de man yawng nna man mali maga de tsap nga ai magri mang usu shi lahkawng a shingma ntsa e mara da nga ai.

²⁶ Hka lawng a shakum ngu na gaw letma masum htat nga ai. De a mahka gaw hka wan mahka zawn rai nna hka law pan a pu makawp zawn shinggan maga de kangwi da nga ai. Dai hka lawng hta ntsin galan 10,000 shang nga ai.

Magri Mang Leng Ni

²⁷ Huram gaw magri mang leng shi hpe mung galaw ai rai nna, leng shagu gaw galu de pe 6, nda de pe 6, tsaw de pe 4 chyen rai nga ai.

²⁸ Dai ni hpe man bung ai hpunpyen pa ni hte galaw nna hpunpyen kaji ni hte hkawp nhtawm dai hpunpyen pa ni hta

²⁹ hkanghkyi, usu hte singkaw tu ai hkrung kanu sumla ni hpe ka da nga ai. Hkawp da ai hpunpyen kaji ni a lawu lahta mahkra hta hkanghkyi hte usu sumla ni hpe mung ka da nga ai; manai ai shanghkawng sumla ni hpe tawk shakap da nga ai.

³⁰ Leng shagu hta magri mang leng dingsen mali hte magri mang htinggrang ni rawng nga ai. Jut mali hta angdung langai hpe madi da ai magri mang lagaw rawng nga ai; dai madi da ai magri mang lagaw mali hpe manai ai shanghkawng sumla ni hte mawn da nga ai.

³¹ Dai angdung a matu mahka kaw din din rai shakau da nga ai. Dai gaw leng a ntsa de letma 18 kra nna npu de letma 7 kra nga ai. De a grup grup e mung tawk da nga ai.

³² Dai leng dingsen ni gaw letma 25 tsaw nna, dai gaw leng jut npu e chyai nhtawm htinggrang ni gaw kra nga ai lagaw mali hta kap nga ai.

³³ Dai leng dingsen ni gaw gumra leng dingsen ni hte bung nga ai; de a htinggrang ni, matu hkawp ai ni, htingkan ni hte htingchyai ni yawng gaw magri mang hkrai rai nga ai.

³⁴ Leng shagu a njut htumpa hta lagaw mali mung nga nga ai; dai ni gaw leng hte langai sha di nna jaw da wu ai.

³⁵ Leng shagu a ntsa hta letma 9 re ai shingwang langai ngai rawng nga ai; de a lagaw ni hte hpunpyen pa ni gaw leng hte langai sha rai nga ai.

³⁶ Dai lagaw ni hte hpunpyen pa ni hta singkaw tu ai hkrung kanu ni, hkanghkyi ni hte namhtan hpun sumla ni hpe shang ai daram mawn sumli da nga ai; dai hta manai ai shanghkawng sumla ni hte grup hkra ka da nga ai.

³⁷ Dai gaw leng ni hpe kaning rai shachyaw da ai lam rai nga ai; shachyaw ai hkrang hte kasi kumla ni langai hte langai gaw maren rai nga ai.

³⁸ Huram gaw angdung shi hpe mung galaw nna leng langai mi hta langai ngai gu hkra mara da nga ai. Dai angdung shagu gaw shingdan pe 6 rai nna ntsin galan 200 shang nga ai.

³⁹ Shi gaw Nawku Htingnu a dingda maga de leng manga, dingdung maga de leng manga rai tawn da nga ai. Dai hka lawng hpe chyawm gaw sinpraw dingda jut e tawn da wu ai.

Nawku Htingnu Galaw Ai Hkinghku Jahpan Ginju

^40-45 Huram gaw di bu, shingban hte hka wan ni hpe mung galaw wu ai. Hkawhkam Shawlumon shi hpe galaw shangun ai dai Madu a Nawku Htingnu a matu amu yawng mayawng hpe shi shangut wu ai. Da ndai gaw shi galaw da sai magam bungli ni rai nga ai: Shadaw lahkawng Dai shadaw a ntsa na ban hkrang hte bung ai bandung lahkawng Bandung shagu a ntsa e sumgawn zawn hkri ai saidawng kasi Bandung shagu a ntsa e tawk ka da ai kasi grup grup hta magri mang hkainu si yan lahkawng grang nna yan mi hta latsa tsa rawng nga ai. Leng shi Angdung shi Hka lawng Hka lawng hpe madi da ai usu shi lahkawng Di bu, shingban hte hka wan ni Hkawhkam Shawlumon a matu Huram galaw ya sai ndai Nawku Htingnu na arung arai ni hpe kabrim ai magri mang hte galaw da nga ai.

⁴⁶ Hkawhkam wa gaw dai arai ni yawng hpe Yawdan Kadit na Suhkot hte Zarehtan lapran na shara hta jaw shangun wu ai.

⁴⁷ Shawlumon gaw magri mang arai ni nau law nga ai majaw n shen ai sha tawn da wu ai; dai magri mang gaw gade rai nga ai hpe galoi mung n daw dan lu nga ai.

⁴⁸ Shawlumon gaw Nawku Htingnu kata e nga ai arai yawng ngu na hkungri, Karai Kasang hpe sak nawng ya ai muk tawn na matu ku,

⁴⁹ Chyoi Pra Htum Ai Shara a man e dingdung maga de manga, dingda maga de manga tawn da ai pyengdin shadun shi, nampan ni, pyengdin ni hte lakap ni;

⁵⁰ gawm ni, wan lakap ni, hka wan ni, manam pyaw ai baw bang na ban ni, chyi nga ai wan n-ga hpai yang lang na wan ban pa ni, Chyoi Pra Htum Ai Shara a chyinghka hkanoi ni, Nawku Htingnu a shinggan chyinghka na hkanoi ni yawng hpe ja hte chya shatsawm da nga ai. Ndai shatsawm da ai arung arai ni yawng hpe ja hte galaw da nga ai.

⁵¹ Hkawhkam Shawlumon gaw Nawku Htingnu galaw ai magam amu yawng mayawng hpe galaw ngut jang shi a kawa Dawi dai Madu a matu ap nawng da sai aja, gumhpraw hte kaga arung arai yawng hte hpe htingnu sut gawk hta shi tawn da wu ai.