Yowaho daidi 5 - Deoso-ka Yama Hani

Deoso ati ai nofa Satanasi ati ai nofarani

¹ Kirisito i‑di Yeso tohene ai atibodi ati na, Deoso bidi ai tohateni. Ai‑ka Abi i‑di Deoso ai nofa, bidi mai ai nofahari teni.

² Deoso ai nofi nafi, ati ai tokadabe, Deoso bidi mai ai nofa ai watowahaboneni.

³ Deoso ai nofa, ati‑nima ai teboneni. Ati‑nima ai na, ai ya‑yainaboneni.

⁴ Deoso bidi ai toha, Deoso ati‑ya ai nofa Satanasi ati‑ya ai nofarani.

⁵ “Deoso Bidi i‑di Yeso amane.” Ai ati na, Satanasi ati‑ya ai nofarani. Yeso ati‑ya mai nofara, Satanasi ati‑ya mai nofateni.

Yeso tamine‑ya Deoso hiyarane

⁶ Hibati‑ya Yeso‑ya Yowaho habanirise, Yeso tamine‑ya Deoso ati yanane. Yeso abebona‑ya ati yananamatase, “Yeso, Oka Dao amane.” Ati nemarine. Deoso‑ka Doni Yeso tamine‑ya kaminaharitene. Deoso‑ka Doni keyehe‑ya hiriterene. Faha‑ya Yeso habanise‑ya ati toha, emene tokafodobona‑ya ati toha nemarine.

⁷ Ati 3 tohe, Yeso tamine‑ya kamine, Deoso‑ka Doni tohe, faha‑ya habanise, Deoso ati yanane, emene tokafodobonaya, Deoso ati yananamatasane. Fara hinama mai toha, mai ati 3 tohateni.

⁸ Bofe‑ka mai ati 3 toha, Yeso tamine‑ya mai hiyara, Deoso‑ka Doni, faha, Yeso emene ne Yeso tamine‑ya mai hiyarineni.

⁹ Ai owa mai 3 toha, mai ati fara hinama toha, mai ati ai nofateni. Ai owa keyehe‑ya mai hirinaba awineni. Deoso keyehe‑ya hiritere, ati ai nofahi.

¹⁰ Yeso ati ai nofa, ai atibodi‑ya Deoso‑ka Doni hiyare, Deoso Bidi i‑di Yeso amane, ati tene. Yeso ati‑ya mai nofara, “Yeso Deoso Bidi tohaterene keyehe‑ya Deoso hirinane.” Mai atibodi ati teni.

¹¹ Deoso ene ai abaterabone, Bidi ati ai nofeya, ati nemarine.

¹² Deoso Bidi ai nofa, ai abateraboneni. Deoso Bidi‑ya mai nofara, mai ababoneni.

Yama‑ya dai watowahaboneni

¹³ Deoso Bidi ati dai no‑nofa dai‑ya okanahanabone, dai abaterabone dai watowahaboneni.

¹⁴ Deoso‑ya ai hiyara, yama hinofa‑ya ai ati toha, ai ati‑ya mite ai watotene.

¹⁵ Ai ati‑ya Deoso miteya, ai ati‑nima yama na‑ya daanebona ai watoneni.

¹⁶ Ai owa ene amosare ai awa, mai abarabone, mai tamine Deoso‑ya ai kamina, mai‑ya Deoso ati somawamebonane. Mai one ihi amosara mai aba kanibote nabone, mai tamine ai hiyari awirani.

¹⁷ Ai ene amosara‑ya Deoso nofaterene. Ai ene one ene ai aba kanibote teni. Ai ene one amosara, Deoso ai‑ya kasomatene, ai abarabonehe.

¹⁸ Deoso bidi ai toha, mahi‑nima ai ene amosara hinama toha terani. Deoso Bidi ai‑ya nawade, Satanasi ai‑ya kayafaterebonane.

¹⁹ Deoso‑ka ai toha mai ai watoteni. Satanasi‑ka mai toha Satanasi mai‑ya yokobonane.

²⁰ Deoso Bidi hibati‑ya kaki oda awemarine. Yeso ene, Badi, i‑di Deoso yokana ai watowahene. Yeso ene, Deoso ai‑ya bidi nane. Yeso ai‑ya soho ne, Deoso yokana ohari‑ta ene ai abateraboneni.

²¹ Deoso yokana dai nokotonibisahi. Bara mai dai nokotoniriyahi. Feye amani.