Yowaho daidi 4 - Deoso-ka Yama Hani

Deoso ati‑mona mai ati na, mai ati dai kadikahi

¹ Soho, owati dai mitahi. Deoso‑ka yo‑yose mai ati‑mone mai ati na, mai ati dai kadika, mai ati dai wataboneni. Deoso ati yokana tohe dai wato, Deoso ati tohare dai wato, dai naboneni. Deoso‑ka yo‑yose ati‑mone mai dami ati na, ati bare‑ya mai kaminabisineni.

² “Deoso Bidi i‑di Yeso bofe‑ya kame, ai‑nima tohemarine.” Mai ati na, Deoso‑ka mai toha, Deoso‑ka Doni ati mai ka‑kamina ai watoteni.

³ “Yeso, Deoso Bidi tohi awire. Deoso Bidi ai tohaterene.” Kirisito‑ya mai ka‑kako mai‑ka hidi ati nane. Kirisito‑ya ka‑kako kakibona tamine‑ya dai mitamaro, hibayata Kirisito‑ya mai dami kakoneni.

⁴ Oka madehe‑nima dai na, Deoso‑ka dai toha, dai‑ya Satanasi‑ka mai nofara, Deoso‑ka Doni dai‑ya sawi, Deoso‑ka Doni ene kitabote toha, Satanasi mai‑ya sawi, Satanasi ene ki‑kita‑raba nibisane.

⁵ Satanasi‑ka mai toha, Satanasi ati‑nima mai ati teni. Satanasi‑ka mai toha hini mai one ati‑ya mai nofateni.

⁶ Deoso‑ka ai toha, Deoso‑ka mai one ai ati‑ya mai nofateni. Deoso‑ka mai tohara ai ati‑ya mai nofaterani. Ai ati‑ya mai nofa, Deoso‑ka mai toha mai ai wato. Ai ati‑ya mai nofara Satanasi‑ka mai toha, mai ai wato teni.

Deoso ai‑ya nofe, ai one ai nofahi

⁷ Oka dai toha, owati dai mitahi. Deoso ene ai ibi nofateni. Deoso bidi ai toha, ai ibi nofa, Deoso ati‑ya ai wato teni.

⁸ Mai ai nofara, Deoso ai watoterani. Deoso ai nafi‑ya nofatene.

⁹ Deoso ene ai wato, ai‑ya nofe ai wato ne. Ai‑ya nofi nafi Bidi ohari‑ya daanemarine, ai manakone‑ya nanahabe, ai abarabonehe.

¹⁰ Deoso ai‑ya nofi nafi dai awaho. Deoso‑ya ai nofi awisariya, ai‑ya nofe, Bidi‑ya yosemarine, ai manakone‑ya nanahabebonaha.

¹¹ Deoso ai‑ya nofe, ai ibi nofahariyahi.

¹² Deoso ai awaterani. Ai ibi nofa, Deoso ai atibodi‑ya winatene. Deoso ai atibodi‑ya wine, ai ibi nofi nafeboneni.

¹³ Deoso ene hika Doni ai atibodi‑ya sawi ene Deoso‑ka ai toha ai watone.

¹⁴ Oda ati dai mitahi. Deoso Bidi oda awamaroni. Deoso Bidi hiyose, ai manakone‑ya nanahabebona oda awemari, mai nafi‑ya tamine oda kaminebonane.

¹⁵ Deoso ati‑ya mai no‑nofa, “Yeso, Deoso Bidi amane.” Mai atibodi ati na, mai atibodi‑ya Deoso wine, Deoso‑ka mai tohateni.

¹⁶ Deoso ene oda awemari, oda nafi‑ya nofe oda watowahane. Ai nafi‑ya Deoso nofe, fare‑nima mai ai nofa, Deoso‑ka ai toha, ai atibodi‑ya sawitene.

¹⁷ Deoso ai atibodi‑ya sawi, mai ai nofa na, ai ene‑ya Deoso kadikeya, ai korikasaraboneni. Bofe‑ya ai wi‑wina Deoso ene‑nima ai ene na ai korikasaterani.

¹⁸ Ai‑ya nofe ene ai korikasara, ai‑ya nofe, ai‑ya ene amose‑bona ai watoteni. Ai korikasa‑mani, owa‑ya nofare ai atibodi ati teni. Ai‑ya nofe ai wato ai korikasaraboneni.

¹⁹ Deoso ai‑ya nofi bahe, makobote mai ai nofamakiteni.

²⁰ Deoso‑ya nofe‑mona ati ne, mai one‑ya nofare, keyehe‑ya hirine. Mai one ai nofara, Deoso ai nofahariterani. Mai ai awabisa, Deoso ai awaterani. Mai ai nofara, Deoso ai nofaterani.

²¹ Hibati‑ya Deoso ai‑ya hiyare, “Owa‑ya dai nofabone, dai one dai nofaharihi!” Deoso ati nematane.