Yowaho daidi 2 - Deoso-ka Yama Hani

Deoso‑ya ai tamine‑ya Kirisito kaminatene

¹ Dai oka dao onamaro, dai‑ka yama hani‑bone okanahanowahineni, dai ene amosabonehe. Dai ene amosaraya, ai tamine‑ya ka‑kamina ai‑ka Abi eyehe itarine. Ai tamine‑ya Yeso Kirisito ene amose hinama kaminatene.

² Yeso ai manakone‑ya nanahabemari, Yeso ati ene Deoso ai‑ya yawamaterebonane. Ai nafi manakone‑ya Yeso nanahabemarine.

³ Deoso ati ai tokadaba, Deoso‑ka ai toha, ai watowahebonane.

⁴ “Deoso owatoni.” Ati ne, Deoso ati‑ya tokadabare, keyehe‑ya hirine. Deoso‑ya watoterene.

⁵ Deoso ati‑ya tokadabe, Deoso‑ya nofatene. Deoso ati‑ya ai tokadabiya, Deoso‑ka ai toha ai watone.

⁶ “Yeso‑ka oda amani.” Ai ati na, Yeso Kirisito ene‑mari‑nima ai ene nahi.

Ai owa ai kaka, yama soki‑ya ai winasa teni

⁷ Owati bara tohi awirani. Hibati‑ka mai ati ni‑maro‑nima owati nineni. Hibati‑ya mai ati dai mitamaro, fara mai ati‑nima owati nineni.

⁸ Owati bara tohawaha, keyehe‑ya hiri·ora, dai‑ka yama soki fawani yanatona, dai‑ka yama wahi yokana‑bone yanatona, hibati‑ya yama‑ya dai watora, yama soki‑nima dai namaro, hibayata Yeso ene yama‑ya dai watowaha, yama wahabisari‑nima dai nawahani.

⁹ “Yama tehe‑ka ama·oni.” Dai ati na, Dai one‑ya dai kako, yama tehe‑ka dai tohi awisara, yama soki‑ya dai winasa nineni.

¹⁰ Yama tehe‑ya ai wina, ai ibi nofa, ai ene amosa, ai ene mai taratokaraboneni.

¹¹ Mai ibi ka‑kako, yama soki‑ya mai winateni. Yama soki‑ya mai wi‑wina mai toki‑ya mai watora. Yama soki ihi yama‑ya mai awaterani.

¹² Madehe dai toha, dai‑ka yama hani‑bone okanahanoneni, Yeso dai manakone‑ya nanahabe ene Deoso ati somawamane.

¹³ Bote dai toha, dai‑ka yama hani‑bone okanahanoneni. Yeso yama nafi‑ya wamanemata dai watoneni. Yetene dai toha, dai‑ka yama hani‑bone okanahanoneni, Satanasi ati‑ya dai nofarabonehe. Madehe dai toha, dai‑ka yama hani‑bone okanahanoneni, ai‑ka abi dai watabonehe.

¹⁴ Bote dai toha, dai‑ka yama hani‑bone okanahano, Yeso yama nafi‑ya wamanemata dai watoneni. Yetene dai toha, dai‑ka yama hani‑bone okanahano, dai kita, Deoso ati‑ya dai wata, Satanasi ati‑ya dai nofarani.

Deoso‑ya ai kahiyarabisahi

¹⁵ Yama dama dai nokotoniriyahi. Yama dama dai nokotoniya, Deoso‑ya dai nofi nafiraboneni.

¹⁶ Mai fanawi‑ya mai nokotinihe, yama nafi‑ya mai awa, mai atibodi kobona, yama‑ya mai kiha, hini mai‑ya mai kahiyara, Deoso ene tohaterene. Satanasi ati‑ya mai no‑nofa, haa‑nima yama na‑ya mai nokotoniteni.

¹⁷ Mai‑ka no‑nokotoni abawahaboneni. Deoso‑ta ai nokotonihe, ai abateraboneni.

Dai noko wadahi. Kirisito tohi awire mai ati naboneni

¹⁸ Oka dao dai toha, owati dai mitahi. Ai amoni fa‑famaraba ni‑ya Yeso kamebonane. Kirisito‑ya ka‑kako kakibona tamine dai mitemarine. Hibayata Kirisito‑ya mai dama mai kakoneni. Kirisito‑ya mai kaka, mai ai awa, Yeso kami nahore ai watoboneni.

¹⁹ Mai one Yeso‑ka mai‑mone mai ati na, Yeso‑ka mai tohaterani. Oda‑ya mai sawemaro, oda‑ya mai sawimi awira, Yeso‑ka mai toha‑mani, oda‑ya mai sawe neni. Yeso‑ka mai‑ya mai sawira, Yeso‑ka mai tohara, mai‑ya mai dami watowahaboneni.

²⁰ Yeso‑ka ai toha, Deoso‑ka Doni ai‑ya sawitene. Deoso‑ka Doni ai‑ya sawi, Deoso ati ai watoteni.

²¹ Deoso ati‑ya dai wa‑wato, dai‑ka yama hani‑bone okanahanoneni. Deoso ati‑ya dai watora‑mani, dai‑ka yama hani‑ba okanahanora neni. Deoso keyehe‑ya hiriterene. Keyehe‑ya mai hirina, Deoso ati‑ya mai hiyaraterani.

²² Ebeni‑ka keyehe‑ya mai hiri? Yeso Deoso Bidi tohi awire mai ati na, fara keyehe‑ya mai hirina, Kirisito‑ya mai ka‑kako mai tohani. Deoso‑ya mai nofarihi, Deoso Bidi‑ya mai nofarihi, mai teni.

²³ Deoso Bidi‑ya mai nofara, Deoso‑ya mai nofaterani. Deoso Bidi‑ya ai nofa, Deoso‑ya ai nofahari teni.

²⁴ Hibati‑ya Yeso tamine dai mitamaro, dai kadamoriyahi. Dai kadamora, Deoso dai‑ya sawi, Bidi dai‑ya sawihari nebonane.

²⁵ Deoso Bidi i‑di Kirisito ai‑ya sawi, ai abaterabone ati nane.

²⁶ Owati dai kadikiya, Deoso ati dai watabone, keyehe‑ya mai hirina, mai ati dai nofaraboneni.

²⁷ Kirisito ati ene Deoso‑ka Doni dai atibodi‑ya sawine, dai‑ya kanawatobonaha. Dai‑ya mai kanawatora, Deoso‑ka Doni dai‑ya kanawatobisebonane. Yama nafi‑ya Deoso‑ka Doni kanawato, keyehe‑ya hiriterene. Ai‑ka Abi i‑di Deoso ati‑nima ati tene. Deoso‑ka Doni ati‑nima ai na, Yeso‑ka ai tohateni.

²⁸ Oka madehe‑nima dai na, owati dai mitahi. Kirisito ati‑nima dai ene na, makobote kamataseya, dai ya‑yainaboneni. Yeso ati‑nima mai ihi ra, Kirisito kamataseya, mai kananaboneni, mai habi siitonaro.

²⁹ Yeso Kirisito ene amose hinama tohemari, mai ihi amosa, Deoso bidi mai toha, mai ihi dai awiya, mai ihi amosa, Deoso bidi mai toha, mai dai watowahaboneni.