Mateo 9 - Deoso-ka Yama Hani

Ka‑kakone‑ya Yeso kasome

¹ Kanawa‑ya mai foyama, mai berekawama, Yeso tabaro‑kaya mai tokomatasameteni.

² Mai‑ka owa ka‑kakone fori‑ya mai kakamameteni, Yeso hinakitamebonaha. Mai ihi‑ya Yeso awe, ka‑kakone‑ya hiyare, “Soho, ya‑yaitinahi. Tiwa ene towe manakone wadamarini.” Yeso ati nematane.

³ Mose‑ka yama hani ati‑ya mai ka‑kamina, Yeso ati‑ya mai mita, mai yawawaha, “‘Deoso‑nima ona ama·oni.’ Ati ne awane. Hini ati ene abaho.” Mai atibodi ati nameteni.

⁴ Mai atibodi ati‑ya Yeso wato, ati yanane, “Hini yamata ihi dai atibodi yawiti?

⁵ Bofe‑ka mai ati ihi ai ene towe manakone fawarihi, bofe‑ka mai ati ihi ai owa kitamarihi tene.

⁶ Owati ihi ai owa ene towe manakone wadamare, dai awaboneni.” Yeso ati nematane. Maki kiyane‑ya hiyare, “Tiwaamisahi. Tika fo‑fori‑ka yama diwatikaniya, tikamahi, tika yobe‑ya.” Yeso ati nematane.

⁷ Waamise, hini tabaro‑ya tokomematane.

⁸ Yeso ene‑ya mai awa, mai habi siitona, “Deoso ene amose, ati ene ai owa yama‑ya wato nafine.” Mai ati nameteni.

Mateo‑ya Yeso himane

⁹ Yeso yananamatase, owa‑ya awe, owa‑ya himanemarine. Mateo ama·oni. Kofeno‑ka yinero‑bona‑ya ha‑haa ohamaroni. Kofeno‑ka yobe bidi‑ya owitare, Yeso owa‑ya haane, “Owa‑ya tisawihi.” Yeso ati ne, ati omita, Yeso‑ya osawiwahamaroni.

¹⁰ Makobote owa tabaro‑ya oda marinamaroni. Kofeno‑ka yinero‑bona‑ya mai ha‑haa mai dama, mai ihi amosara mai dama, mai na, Yeso hika mai da‑daba mai eyehe mai marinamaroni.

¹¹ Yeso ene‑ya fariseo mai awa, Yeso‑ya mai da‑daba mai‑ya mai hiyara, “Hini yamata‑bone towe mai eyehe Yeso tafati? Kofeno‑ka yinero‑bona‑ya mai ha‑haa mai eyehe oda tafarihi, mai ihi amosara mai eyehe oda tafarihi, oda teni.” Fariseo mai ati namaroni.

¹² Mai ati‑ya Yeso mite, ati yanane, “Mai kiyara mediko mai‑ya kasomaterene. Mai kiyana‑ta mediko mai‑ya kasomatene.

¹³ Yama hani ati dai mitahi, ‘Oka bani‑bona mai daana mai ihi ya‑yai·oni nafira, mai ati soma mai ihi ya‑yai·obisaboneni.’ Yama hani ati neni. Mai ihi amosamone mai ati na, mai hima·orani. Mai ihi amosara mai hima·onabone okemaroni.” Yeso ati nemarine.

Mai tafamarabone tamine

¹⁴ Makobote i‑di Yowaho Batita‑ya mai da‑daba mai kamake, “Mahi owa‑ya oda tafarihi, fariseo mai‑ya mai da‑daba mahi owa‑ya mai tafarihi teni. Tiwa‑ya mai da‑daba mahi‑nima mai tafateni.” Yowaho‑ya mai da‑daba mai ati namaroni.

¹⁵ “Mai‑ka owa fanebona sawi ene mai ya‑yaina, mai ohiterani. Yama one‑kaya maki mai hiwakebona, tabora bara‑ya tokeya, mai tonokosa, yawa ihi mai tafi fawanaboneni.” Yeso ati nemarine.

¹⁶ “Ai‑ka bora bote hodeya, bora ibe yati ai nawaana, bora ai sokonawaha, bora ibe yati bi‑bidi nawama ihi bora bote nafi sibitonaboneni. Haa‑nima yama na towe tohateni.

¹⁷ Bani ataro wamani yama wiye toha, wamani yati‑ya fino yati ai soronisiya, wiye taokiterani. Yama wiye bote‑ya fino yati ai soronisa terani. Yama wiye bote‑ya fino yati ai soronisiya, taokana, yama wiye aba, fino aba teni. Fino yati wiye yati‑ya ai soronibisateni, abarabonehe.” Yeso ati nemarine.

Fana mai fama mai‑ya Yeso kasome

¹⁸ Yeso mai‑ya hiyareya, mai‑ka hidi owa kamaki, Yeso yowi‑ya yobati tati‑kaya ite, “Yeso, okoto hibayata abani. Oka yobe‑ya tikamakihi. Okoto tati‑ya tiwa yehe foriya, okoto kitamaboneni.” Mai‑ka hidi ati nemarine.

¹⁹ Yeso waamisame, hika mai da‑daba mai eyehe tokomakimarine.

²⁰ Mai yakana, mai nowati‑ya fana tokomake, Yeso‑ka bora ifi‑ya boyonamaroni. Fana‑ka ama fawani watora, faha fowe 12 kana‑ya hika ama fawani awiramaroni.

²¹ “Yeso borone‑ya boyo·oniya, okitamaboneni.” Fana atibodi ati namaroni.

²² Yeso kiinawame, fana‑ya awe, “Sima, ya‑yaitinahi. ‘Yeso‑ka bora boyo·oniya, oka ama fawanawahaboneni.’ Tiwatibodi ati na, fara ihi tiwa onakitamineni.” Yeso ati nemarine. Fana kitamawahamaroni.

²³ Mai‑ka hidi tabora‑ya Yeso kobone, tokiyome, hidi‑ka yobe‑ya mai dama kaida‑ya mai one afo, mai ati kita na, mai‑ya Yeso awemarine.

²⁴ “Dai tokahi. Atona abi awirini, hiniya amoneni.” Yeso ati ne, ati‑ya mai hahakanamaroni. “Yama tiwato awirini.” Mai ati namaroni.

²⁵ Mai toka, mai nowati‑ya Yeso tokiyamaki, atona aboi yahi‑ya waratone, atona waamisamamaroni.

²⁶ Yeso ene atona kitama, tamine‑ya mai dama mai mitamaroni.

Mai noki‑ya Yeso kasome

²⁷ Makobote Yeso toke, mai noki wadara mai fama, Yeso nowati‑ya mai towakamake, “Yeso, oda‑ka hidi amatini. I‑di Dafi‑ka nodi amatini. Oda tikasomahi.” Maki mai ati namaroni.

²⁸ Mai one‑ka yobe‑ya Yeso tokiyome, nowati‑ya mai towakamakitasa, “‘Yeso kitabote, oda noko‑ya kasomebonane.’ Dai atibodi ati neni?” Yeso ati ne, “Hehe, kitabote amatini. Oda noko tikasomabone oda ati neni.” Mai ati namaroni.

²⁹ Mai noki‑ya boyone, “Dai ati‑nima yama naboneni.” Yeso ati nemarine.

³⁰ Mai noki amosawama, yama‑ya mai awawahamaroni. “Owa ene tamine dai hiyarariyahi.” Yeso ati nemarine.

³¹ Mai towaka, Yeso ene tamine‑ya mai hiyaramaroni, mai nafi‑ya.

Maki ati fawane‑ya Yeso nakitame

³² Tabora one‑kaya Yeso toke, madi towe ai owa‑ya foye, madi towe ene maki ati wadamaremarine.

³³ Yeso ati ene madi towe kanane, maki ati yananawahemarine. Yeso ene‑ya mai dama mai awa, mai ya‑yaina, mai atibodi yama‑ya kadika, “Haa‑nima ai ene na, ai awaterani.” Mai ati namaroni.

³⁴ Fariseo mai‑ta mai yawabisa, “Madi towe mai‑ka hidi ati ene mai kananineni.” Fariseo mai ati namaroni.

Ai nafi‑ka hidi kitabote tohawahebona tamine

³⁵ Mai‑ka sidadi dami‑ya Yeso toke, mai tabori bide dama‑ya toka ne, Deoso‑ya mai hi‑hiyara‑ke yobe‑ya tokiyome, mai‑ya kanawatomarine. Neme‑ke ai nafi‑ka hidi kitabote tohawahebona tamine‑ya hiyara, mai kiyana mai‑ya nakitama nemarine.

³⁶ Mai dama mai‑ya Yeso awe, “Kaneiro mai‑ya mai na‑nawada mai awiriya, kaneiro mai kakomehe, mai‑ya bani hame wakanebonane. Kaneiro mai‑ka hidi wadamare mai‑nima mai na, mai okasomaboneni.” Yeso atibodi ati nemarine.

³⁷ “Deoso‑ka yamata dama marafakana, yamata‑ya mai tonaka mai damara,

³⁸ Deoso dai hiyarahi, mai one tokomakibakaro, Deoso‑ka yamata‑ya mai kakamabonehe.” Yeso ati nemarine.