Mateo 5 - Deoso-ka Yama Hani

Adami‑kaya mai‑ya hiyare

^1-2 Mai dama mai‑ya awe, adami‑ya tokomorose, itari, hika mai da‑daba fai yowi‑ya mai nahoremaroni. Mai‑ya kanawatobona, ati yanane,

³ “‘Towe ama·oni.’ Dai ati niya, Deoso dai‑ya kasomebona, Neme‑ke ai nafi‑ka hidi kitabote tohawahe‑ya dai sawiwahaboneni.

⁴ Dai o‑ohi Deoso dai‑ya kasomebona, dai ya‑yainibisaboneni.

⁵ ‘Yama owato nafira, Deoso‑ta yama nafi‑ya watotene.’ Dai atibodi ati na, Deoso dai‑ya kasomebona, wami nafi‑ya dai kayafaboneni.

⁶ ‘Owatibodi amosawamaboneni.’ Dai atibodi ati na, Deoso dai‑ya kasomebona, dai atibodi‑ya namosi nafibonane.

⁷ Dai one ene amosara, dai ati hamara, Deoso dai‑ya kasomebona, dai ene kote towe toha, manakone‑ya Deoso haarebonane.

⁸ Deoso ati dai nokotoniyahi. Yama bara dai nokotoniriya, Deoso dai‑ya kasomebona, Deoso‑ya dai awawahaboneni.

⁹ Mai ibi weena mai dai kasomahi, mai yawi fawanabonehe. Haa‑nima dai ene niya, Deoso dai‑ya kasomebona, Deoso bidi dai tohawahaboneni.

¹⁰ Deoso ati‑ya dai nofa, Deoso‑ya mai nofara dai‑ya mai bisiniya, Deoso dai‑ya kasomebona, Neme‑ke ai nafi‑ka hidi kitabote tohawahe‑ya dai sawiwahaboneni.

¹¹ Owati‑ya dai nofa dai‑ya mai nofaraboneni. Dai‑ya mai wee, dai‑ya mai bisi, dai tamine‑ya keyehe‑ya mai hiri, mai naboneni.

¹² Deoso ati‑ya mai mi‑mita‑mete mai‑nima dai na, fara hibati‑ya mai‑ya mai bisinaharemeteni. Dai ya‑yainahi. Deoso dai‑ya kasomebona, neme‑ya dai ene manakone nafe dai kayafaboneni.” Yeso ati nemarine.

Sao‑nima dai nahi

¹³ “Bofe‑ka mai‑ka sao dai tohateni. Sao ihi ai tefe kabi amosateni. Dai ene amosahi. Deoso ati‑ya mai nofara mai ihi‑nima dai ene riyahi. Dai ene amosa dai maakariyahi. Faha ihi sao abiya, amosawamaterani. Sao towe ai weretowititeni.

¹⁴ Bofe‑ka mai‑ka yama wahi‑nima na dai tohateni. Dai ene‑ya mai awiya, Deoso ati‑ya mai nofawahaboneni. Adami tati‑ya ai tabaro ita, ai tabaro‑ya mai nafi awateni.

¹⁵ Nabarina ai botokana, nabarina wahi ai barikiterani. Nabarina ai kanawaarikosa, nabarina wahi ihi yama ai awateni.

¹⁶ Yama wahi‑nima dai ene nahi. Dai ene amosa, dai ene‑ya mai awiya, dai‑ka Abi neme‑ke‑ya mai kahiyarawahaboneni.” Yeso ati nemarine.

Mose‑ka yama hani tamine

¹⁷ “Mose‑ka yama hani ati, Deoso ati‑ya mai ka‑kamina‑mete mai‑ka yama hani ati na, ati fawateraboneni. Mai ati‑nima onaboneni.

¹⁸ Owati amosa dai mitahi. Neme aba, bofe aba naboneni. I‑di Mose‑ka yama hani ati kote fawaterabone, ati‑nima yama nawahaboneni.

¹⁹ ‘Deoso ati kote onofa, fara owa‑nima dai nahi. Deoso ati kote dai nofiya, dai sibaraboneni.’ Mai one ati na, Mai ati‑ya Deoso nofarebonane. Mai ati‑nima dai riyahi. Deoso ati nafi‑ya mai tokadaba, ati mai hikamine, mai ati‑ya Deoso nofabisebonane.

²⁰ Mose‑ka yama hani ati‑ya mai ka‑kamina mai toha, fariseo mai toha na, mai atibodi‑nima dai atibodi na Neme‑ke ai nafi‑ka hidi kitabote tohawahe‑ya dai sawiraboneni.” Yeso ati nemarine.

Hibati‑ka mai ati‑nima Yeso ati re

²¹ “Hibati‑ka mai ati dai mita, ‘Ai owa‑ya dai nanahabariyahi. Ai owa‑ya tinahabiya tiwa‑ya mai wataboneni.’ Mai ati nametemoneni.

²² Owati dai mitahi. Mai atibodi ati okadikaboneni. Mai one‑ya mai ka‑kako mai atibodi owataboneni. Mai atibodi amosara wara hirini‑ya mai‑ya onasawiteboneni.

²³ Deoso‑ka yama‑bone‑ya dai daanabone, dai ati niya, ‘Se! Oka naki owa ene yawewahane.’ Tiwatibodi ati niya,

²⁴ Deoso‑ka yama‑bone tinawadakosiya, tikiya, ‘Naki, towebisa ama·oni. Owa‑ya tiwati somawamahi. Tiwa onofini.’ Tiniya. Makobote Deoso‑ka yama‑bone daatibisahi.

²⁵ Kofeno‑ya tiwa ene towe‑ya ai owa kaminebona, dai kobokani awisariya, tiwati somawama kanibote nahi. Tiwati somawama kanibote ni awiriya, sekorasa tiwa‑ya mai waratoniya, kadeya‑ya tiwa‑ya mai nafoyaba awineni.

²⁶ Owati amosa dai mitahi. Yama manakone nafi abi awisariya, tiwa‑ya mai seekani awiraboneni.” Yeso ati nemarine.

Ai atibodi ati‑ya Deoso mite

²⁷ “Hibati‑ka mai ati dai mita, ‘Hini tika yibote dai famabisahi.’ Mai ati teni.

²⁸ Owati dai mitahi. Fana‑ya dai atibodi kadika, ‘Se! Oahamata.’ Dai atibodi ati niya, dai atibodi ati‑ya Deoso miteya, yawebonane.

²⁹ Tiwa nokobodi sayo‑ka ene yama towe nokotinihe, tiwa noko sayo‑ka sobatinakihi. Tiwa noko abahi, yama hirini‑kaya tisawirabonehe. Tiwa noko ohari‑ya Deoso tabaro‑ya tiwinabisiya, yama amosabisaboneni.

³⁰ Tiwa yehe sayo‑ka ene yama towe nokotinihe, tiwa yehe sayo‑ka wisitinakosahi. Tiwa yehe abahi, yama hirini‑kaya tisawirabonehe. Tiwa yehe ohari‑ya Deoso tabaro‑ya tiwinabisiya, yama amosabisaboneni.

³¹ ‘Tiwa honita wahawamabone tiwatibodi ati niya, tika yibote‑ka yama hani‑ba daatiniya, tiwa honita wahawamahi.’ Hibati‑ka mai ati nametemoneni.

³² Owati dai mitahi. Tifana, hini tiwa ene tika yibote honita wahawamiya, maki bare‑ya tika yibote famawahaba awineni. ‘Tiwa ene toha, tika yibote ihi toha, maki owa ene toha nane.’ Deoso ati nebonane. Dai nafi‑ya weenebonane. Tika yibote tikako awiriya, hini atibodi ihi maki bare‑ya famawahiya, tiwa‑ta tiwa‑ya Deoso kakorebonane.” Yeso ati nemarine.

Dai ati‑nima dai nahi

³³ “Hibati‑ka mai ati dai mita, ‘—Keyehe hiri·otera, keyehe‑ya hiri·oniya, Deoso owa‑ya bisinebonane.— Dai ati niya, fara Deoso oni dai hirina, hini dai ati‑nima dai nahi. Deoso dai‑ya bisirayaho.’ Mai ati nametemoneni.

³⁴ Owati dai mitahi. Dai ati‑nima dai nahi. Haa‑nima dai one ati teni. ‘Keyehe‑ya hiri·oniya, Deoso tabaro fawanebonane.’ Dai one ati na, Mai ati‑nima dai ati riyahi. Deoso tabaro‑ya Deoso‑ka kadera amosa kawateni.

³⁵ Wami oni dai hiririyahi, wami‑ya Deoso teme kawatene. Yerosare oni dai hiririyahi, Yerosare‑ya Deoso kayawatene.

³⁶ Haa‑nima dai one ati teni. ‘Keyehe‑ya hiri·oniya, owa namidi‑ya mai tiinakosaboneni.’ Mai ati na, Mai ati‑nima dai ati riyahi. Dai tati kone soki toha, hini dai ati ene dai tati kone sa‑sawanawamaterani. Dai wiyona, hini dai ati ene dai tati kone so‑sokinawamaterani.

³⁷ Dai ati amosa hinama tohahi. Keyehe‑ya dai hiririyahi. Satanasi ati ene keyehe‑ya dai hiriteni. Satanasi ati‑nima dai ati riyahi.” Yeso ati nemarine.

Mai nafi dai nofahi

³⁸ “Hibati‑ka mai ati dai mita, ‘Tiwa noko‑ya bositokanihi, noko bositikanihariho. Tiwa ino‑ya bakatonihi, ino bakatinihariho.’ Mai ati nametemoneni.

³⁹ Owati dai mitamatasahi. Dai ati somahi. Dai ebete‑ya batanariya, dai ebete beheri dai benawamakihi, batahirimakebonehe.

⁴⁰ Dai‑ka owa kofeno‑ya hiyare, ati ene kofeno dai‑ya haaneya, ‘Hika bora isi‑ba daatinahi.’ Kofeno ati neya, bora isi, bora nemehe na, fama dai daanibisahi.

⁴¹ Sodado dai‑ya yoseya, ‘Oka yama weyetiniya, tika yama weyeni‑ke ora ohariho.’ Sodado ati neya, yama dai weyeniya, dai‑ka ora famabisaho.

⁴² ‘Oka yama‑ba daatiniya, yama one‑ya tika yama‑ba daa·onamatasaboneni.’ Ati neya, hika yama‑ba dai daanahi. ‘Oka yama honita‑ba daatinahi.’ Ati neya, hika yama‑ba dai daanaharihi.” Yeso ati nemarine.

⁴³ “Hibati‑ka mai ati dai mita, ‘Tiwa‑ya mai no‑nofa mai tinofaharihi. Tiwa‑ya mai kaka mai tikakoharihi.’ Mai ati nametemoneni.

⁴⁴ Owati dai mitahi. Dai‑ya mai nofara mai dai nofiyahi. Dai‑ya mai bisina mai tamine dai hiyarahi, Deoso mai‑ya kasomebonaha.

⁴⁵ Deoso bidi ama·oni dai ati na, Deoso ene‑nima dai ene nahi. Mai ati kasira mai toha, mai ati soma mai toha na, Deoso mai‑ya kasomatene. Deoso ene mahi wehene‑ya mai nafi awateni. Deoso ene mai tabori dami‑nima faha kakiteni.

⁴⁶ Dai‑ya mai no‑nofa mai‑ya dai nofa, mai one‑ya dai nofariya, Deoso ya‑yaiterene. Kofeno‑ka yinero‑bona‑ya mai ha‑haa hini mai one‑ya mai nofateni.

⁴⁷ Hini tika mai tihiyariya, mai one‑ya tihiyari awiriya, Deoso ya‑yaiterene. Bara hini mai one‑ya mai hiyarateni.

⁴⁸ Tiwa ene amosa hinama tohahi. Ai‑ka Abi neme‑ke ene amose hinama tohatene. Ai‑ka Abi ene‑nima dai ene nahi.” Yeso ati nemarine.