Mateo 26 - Deoso-ka Yama Hani

Yeso‑ya mai watabone

¹ Yama nabone tamine‑ya hiyari hawa tohe, Yeso‑ya oda da‑daba oda‑ya hiyaramatase,

² “Ai amoni fami‑ya ka‑kariwa‑ya ai marinabone, dai‑ka Ayo neme‑ke‑ya mai daanaboneni, mai baahikanebonaha.” Ati nemarine.

³ Kaifo Deoso‑ka yama‑bone‑ya mai da‑daa mai‑ka hidi webote amane. Deoso‑ka yama‑bone‑ya mai da‑daa mai‑ka hidi mai toha, Yodeo mai‑ka hidi mai bi‑bidi na mai toha na, Kaifo‑ka yobe fowari barikane doro‑ya mai yorotokanamaroni.

⁴ Yeso‑ya mai kaka, mai awiri‑kaya Yeso‑ya mai wataboneni, Yeso‑ya mai nanahababonehe.

⁵ “Ai marinasa niya Yeso‑ya ai watiya, mai dama mai yawaba awineni. Ai marini hawa tohiya, Yeso ai wataboneni.” Mai ati namaroni.

Yeso tati‑ya fana sorokare

⁶ Simaho hibati‑ya mese towe tohemari, kitamemarine. Betaniya‑kaya Simaho‑ka yobe‑ya mai tafiya,

⁷ yama mahi amosa‑ya fana damakana, kamakemaroni. Yama mahi amosa manakone nafe, yati amosa wamani‑ya wiye toha, Yeso tati‑ya sorohikanaremaroni.

⁸ Yama mahi amosa sorokari‑ya oda awa, oda yawa, “Hini yamata‑bone yama mahi amosa‑ya Yeso tati‑ya fana sorokariti? Yama mahi amosa manakone fotateni.” Oda ati namaroni.

⁹ “Yama mahi amosa manakone fota, Yeso tati‑ya sorotikanarira‑mani, oda‑ya daatibisiya, mai one‑ya oda daaniya, manakone oda waratokaniya, yinero‑ya mai kihara mai‑ya yinero oda daaniya, yama sibabisara neni.” Oda ati namaroni.

¹⁰ Oda ati‑ya Yeso mite, “Dai ati fawanahi. Fana ihi amosineni.

¹¹ Yamata mai kihara dai‑ya mai sawiteni. Dai‑ya mai sawe, mai sawi fawateraboneni. Owa‑ta owa sawi yaboraboneni.

¹² Ai abiya, ai abo‑ya yama mahi amosa‑ya dai sorokariteni. O·ababone, owa‑ya fana sorokari dai tohineni.

¹³ Owati amosa dai mitahi. Yama nafi‑kaya Deoso ati amosabote tamine‑ya mai hiyariya, fana ihi amosa tamine‑ya mai hiyarahareboneni.” Yeso ati nemarine.

Yeso manakone‑bone‑ya Yoda kayafe

¹⁴ Yeso‑ka oda 12 kana oda‑ka owa i‑di Yoda Isikari·oti amane. Deoso‑ka yama‑bone‑ya mai da‑daa mai‑ka hidi mai‑ya i‑di Yoda Isikari·oti tokematane.

¹⁵ “Yeso dai‑ya daa·onibone, hini yamata‑ya owa‑ya dai daanibati?” Yoda ati nematane. Barata wamani 30 kane‑ya mai kadika, Yoda‑ya mai daahinematane.

¹⁶ Yoda toke, “Mai dama mai awiri‑kaya Yeso daa·onaboneni.” Yoda atibodi ati nematane.

Yeso tafi faina‑bona

¹⁷ Ka‑kariwa‑ka semana‑ya baho femeto‑ya ketehera‑ya Yodeo mai kabateni. Ka‑kariwa‑ka mahi daidi‑ya Yeso‑ya oda da‑daba oda one ati yanana, “Ebeni‑kaya ai marinibati? Ai tefe‑ba oda aninabonehe.” Mai ati namaroni.

¹⁸ Yeso ati yanane, “Maki dai awiya, hika yobe‑ya dai tokiya, ‘Ai‑ya ka‑kanawato‑ka mahi kobonemona ati nene. Tika yobe‑ya ai‑ya ka‑kanawato oda eyehe tafebona, kaneiro bidi oda tabasinaboneni.’ Dai ati nahi.” Yeso ati nemarine.

¹⁹ Yeso ati‑nima mai na, ka‑kariwa‑ka yamata‑bone‑ya mai aninamaroni.

²⁰ Mahi bidi‑ya oda 12 kana oda eyehe Yeso tafemarine.

²¹ Oda tafiya, Yeso ati yanane, “Owati amosa dai mitahi. Owa‑ya dai‑ka owa daanebonane.” Yeso ati nemarine.

²² Yeso ati‑ya oda mita, oda atibodi a‑arira, oda ati yanana, “Ayo, owa tohi awiraba awineni.” Oda nafi ati namaroni.

²³ “Dai‑ka owa ohari owa‑ya daanebona, yama wiye ohare‑ya owa eyehe tafane.

²⁴ Dai‑ka Ayo neme‑ke abebona yama hani ati na, fara yama hani ati‑nima abebonane. Owa‑ya kahabane‑ka ene towe manakone nafi bonane. Ka! Wadare‑mana, yama amosabisa neni.” Yeso ati nemarine.

²⁵ Yoda Isikari·oti Yeso‑ya kahabanebona, ati yanane, “Ai‑ka Ka‑kanawato webote amatini. Owa tamine tohi awiraba awineni.” Ati ne, “Fara tiwa amani.” Yeso ati nemarine.

²⁶ Mai tafa, baho‑ya Yeso damane, Deoso‑ya hiyare, baho‑ya bakanakose, Yeso‑ya oda da‑daba oda‑ya baho‑ya daane, ati yanane, “Dai kabahi, owa abano tamine‑bone amani.” Yeso ati nemarine.

²⁷ Makobote keneko‑ya fino‑ya Yeso damakane, Deoso‑ya hiyare, hiyari hawa tohe, keneko‑ka fino‑ya oda‑ya daakane, “Dai nafi hifihi.

²⁸ Owa emene tamine‑bone amani. Owa emene tokabone, o·ababone, mai dama mai ihi manakone onahababoneni.” Yeso ati nemarine.

²⁹ Yeso ati yananamatase, “Owati dai mitahi. Okobi ai nafi‑ka hidi kitabote tohawahebona, yanani awisareya, awa bono fahi ofimaterabone, yananeya, awa bono fahi wamani yati dai eyehe ofimatasaboneni.” Yeso ati nemarine.

³⁰ Deoso‑ka wayoma ohare‑ya oda hirina, makobote Orifera adami‑kaya oda tokawahamaroni.

“Yeso owatorini.” Bedoro ati nebona

³¹ “Owa‑ya kobonabone dai awiya, dai kananaboneni. Owa‑ya dai dabamaraboneni. Deoso‑ka yama hani ati‑nima yama nabone, ‘Kaneiro mai‑ya na‑nawada onahabiya, kaneiro mai kananaboneni.’ Deoso‑ka yama hani ati nineni.

³² Okitamiya, Karireya‑kaya okabone, owa‑kaya dai tokomakiyahi.” Yeso ati nemarine.

³³ “Ayo, mai kananibisaba awineni. Owa‑ta kana·oteraboneni.” Bedoro ati nemarine.

³⁴ “Bedoro, owati amosa timitahi. Owa‑ya tiwatoramone tinabone, tiwati yanani 3 kanabone, makobote arakawa haanebonane.” Yeso ati nemarine.

³⁵ “Ai fama, ai ababa awineni. O·abi‑ya yama sibaraboneni. ‘Yeso owatorini.’ Oteraboneni.” Bedoro ati nemarine. Haa‑nima oda nafi ati namaroni.

Kesemani‑kaya Deoso‑ya Yeso hiyare

³⁶ Kesemani‑kaya oda toka, Yeso‑ya oda da‑daba oda‑ya hiyare, “A‑ahi‑ya dai nahohi. Ahiyata‑ya okaboneni, Deoso‑ya ohiyarabonehe.” Yeso ati nemarine.

³⁷ Bedoro, Sebedeo bidi mai fama, mai na, mai‑ya Yeso himane, ahiyata‑ya mai tokamaroni. Yeso atibodi a‑arire, atibodi ohini kitawahemarine.

³⁸ Mai‑ya Yeso hiyare, “Owatibodi yawi kitini, fara yawa ihi o·abi yanatoneni. A‑ahi‑ya dai naha, dai noko wadahi.” Yeso ati nemarine.

³⁹ Ahiyata‑ya Yeso toke, hini home‑ya hini tamine‑ya Deoso‑ya hiyare, “Abi, yama towe yananabone, yama kobonabone onofarini. Owati‑nima yama riyahi. Hini tiwati‑nima yama nibisiyahi.” Yeso ati nemarine.

⁴⁰ Yeso waamisame, kame, hika mai amona, Bedoro‑ya hiyare, “‘Dai noko wadahi.’ Ona, hiniya dai amoneni. Ora ohari awisareya, hiniya dai amoneni.

⁴¹ Dai noko wadahi. Deoso‑ya dai hiyarahi, Satanasi ati‑ya dai tokadabarabonehe. Dai atibodi amosa, dai abano kitarani.” Yeso ati nemarine.

⁴² Ahiyata‑ya Yeso tokomatase, Deoso‑ya hiyare, “Abi, mai ihi manakone owa nanahabi awiriya, mai ihi manakone fawaterabone tiniya, Tiwati‑nima onaboneni.” Yeso ati nemarine.

⁴³ Yeso kamatase, nokobisa ihi mai amonamatasamaroni.

⁴⁴ Yeso tokomatase, yama abiya nofare, hini tamine‑ya Deoso‑ya hiyaramatasemarine.

^45-46 Yeso kamatase, mai amonasa na, “Dai nahomisamahi. Ai tokomahi. Yama one‑ya dai amonaboneni. Hibayata Deoso ati‑ya mai tokadabara mai‑ya owa‑ya daanebona kamane, ahiyata‑ya.” Yeso ati nemarine.

Yeso‑ya mai wata

⁴⁷ Yeso hiyaranasa neya, oda 12 kana oda‑ka owa i‑di Yoda‑ya mai dama mai eyehe kamemarine. Deoso‑ka yama‑bone‑ya mai da‑daa mai‑ka hidi mai toha, Yodeo mai‑ka hidi mai bi‑bidi na mai toha na, mai ati ihi Yoda‑ya mai dami sawemaroni. Yima‑ya mai one aka, awa‑ya mai one aka namaroni.

⁴⁸ Hibati‑ya Yoda mai‑ya hiyare, “Yeso‑ya dai‑ya yofi·okanabone, Yeso toma·onabone, fare dai waratonayaho.” Yoda ati nematane.

⁴⁹ Yeso‑ya Yoda kame, “Ayo, kobo·onamini.” Ati ne, fai‑ya tomanemarine.

⁵⁰ “Naki, tiwa ene‑bone tina kanibote tinahi.” Yeso ati nemarine. Yeso‑ya mai waratonamaroni, fai‑ya mai towakamabonehe.

⁵¹ Yeso‑ya oda daba, oda‑ka ohari yima‑ya nawaane, yima‑ya sobanaki, Deoso‑ka yama‑bone‑ya mai da‑daa mai‑ka hidi webote‑ya na‑narifa narabo‑ya tarinabasemarine.

⁵² “Tika yima foyamahi, hini bori‑ya. Mai one‑ya yima‑ya mai nanahabiya, yima ihi mai abahariteni.

⁵³ Tiwa habo siitoriyahi. Okobi haa·ona‑mani, hika yo‑yose 6.000 mai yorotokana, mai one 6.000 mai yorotokana, mai one 6.000 mai yorotokana, mai yorotokana 12 mai kana owa‑ya mai kasoma neni.

⁵⁴ Owa‑ya mai watabone, Deoso‑ka yama hani ati na, fara ihi owa‑ya mai watineni.” Yeso ati nemarine.

⁵⁵ Mai dama, mai sawe, mai‑ya Yeso hiyare, “Yima‑ya dai aka, awa‑ya dai aka nineni, owa‑ya dai watabonehe. Yama‑ya mai bo‑boti mai wati‑nima owa‑ya dai watineni. Hibati‑ya mahi‑nima Deoso‑ka yobe‑ya owitare, mai okanawata, owa‑ya dai wataramaroni.

⁵⁶ Deoso‑ka yama hani ati‑nima yama nawahabone, owa‑ya dai watineni.” Yeso ati nemarine. Yeso‑ya oda da‑daba oda habo siitona, oda kananamaroni.

Yeso‑ya mai weena

⁵⁷ Yeso‑ya mai waratona, Yeso‑ya mai towakamameteni, Kaifo‑ya. Kaifo Deoso‑ka yama‑bone‑ya mai da‑daa mai‑ka hidi webote amane. Kaifo tabaro‑ya Deoso‑ka yama‑bone‑ya mai da‑daa mai‑ka hidi mai toha, Mose‑ka yama hani ati‑ya mai ka‑kamina mai toha, Yodeo mai‑ka hidi mai bi‑bidi na mai toha na, mai‑ka hidi webote tabaro‑ya mai yorotokanameteni.

⁵⁸ Yama yaki‑ya Bedoro yoto, Deoso‑ka yama‑bone‑ya mai da‑daa mai‑ka hidi webote‑ka yobe fowari barikane doro‑ya tokomaki, sekorasa eyehe itabase, Yeso tamine‑ya mitebona, “Hini yamata‑nima mai naba, Yeso‑ya mai wata?” Bedoro atibodi ati nematane.

⁵⁹ Deoso‑ka yama‑bone‑ya mai da‑daa mai‑ka hidi mai toha, Yodeo mai‑ka hidi mai one nafi toha na, mai yorotokanameteni. Yeso tamine‑mona‑ya keyehe‑ya mai hirinabone, hidi hini mai one‑ya mai keyehebone, mai one‑ya mai sibanameteni, Yeso‑ya mai nanahababonehe.

⁶⁰ Yeso tamine‑mona‑ya mai dama keyehe‑ya mai hirina, owa ati bare toha, owa ati bare toha, owa ati bare toha, mai nameteni, keyehe‑ya mai hirinaro. Makobote mai one fama keyehe‑ya mai hirinamake,

⁶¹ “‘Deoso‑ka yobe‑ya onahabiya, mahi 3 kane‑ya yobe wama·onamatasaboneni.’ Yeso ati nene.” Mai ati nameteni.

⁶² Deoso‑ka yama‑bone‑ya mai da‑daa mai‑ka hidi webote waamise, “Yeso, mai ati timitineni? Hini yamata‑nima tiwati nibati?” Ati ne,

⁶³ Yeso ati yanare, “Yeso, Deoso yokana tiwa‑ya watone, tiwati yananahi. Deoso‑ka Ka‑kadika amatiraniha? Deoso Bidi amatini?” Mai‑ka hidi webote ati nematane.

⁶⁴ “Hehe, tiwati‑nima, fara ama·oni. Deoso mano kanika‑ya owitariya, kitabote ohawahiya, owa‑ya dai awa kanibote naboneni.” Yeso ati nematane.

⁶⁵ Yeso ati‑ya mai‑ka hidi webote mite, yawe, hika bora namidi‑ya sibikari, ati yanane, “Yeso hini ati ene abaho. Mai one ati hini tohiya, Deoso Bidi‑mona ati ne, keyehe‑ya hirinane. Haa‑nima mai ati na, mai‑ya ai nanahabateni.

⁶⁶ Hini yamata‑nima dai ati niti?” Mai‑ka hidi webote ati ne, “Yeso towe amane. Abaho!” Mai ati nameteni.

⁶⁷ Yeso noko‑ya mai firo, noko mai bata, mai one koohinisa hinematane.

⁶⁸ “Deoso‑ka Ka‑kadika amatini. Yama nafi tiwata, ebeni‑ke tiwa‑ya koonisa?” Mai ati nameteni.

“Yeso owatorini.” Bedoro ati ne

⁶⁹ Yobe fowari barikane doro‑ya mai one dama mai naha mai‑ya Bedoro waiya, hidi webote‑ya atona na‑narifa one kamake, “Yeso Karireya‑ke‑ya sa‑sawi amatiraniha?” Atona ati nameteni.

⁷⁰ Mai nafi narabi‑ya Bedoro ati yanane, “Maki‑ya osawiterani. Tiwati owatorini.” Bedoro ati nematane.

⁷¹ Yobe fowari barikane‑ka nokobi‑kaya toke, wai‑ya hidi webote‑ya na‑narifa one atona Bedoro‑ya awa, mai one‑ya hiyara, “Nokobi‑kaya wai Yeso Nasare‑ke‑ya sa‑sawi amane.” Atona ati nameteni.

⁷² “Keyehe‑ya hiri·oterani. Keyehe‑ya hiri·oniya, Deoso owa‑ya nanahabe awane. Yeso owatoterani.” Bedoro ati nematane.

⁷³ Mai naho bide tohiya, yobe fowari barikane doro‑ya mai naha Bedoro‑ya mai hiyara, “Yeso‑ya mai da‑daba mai‑ka owa amatini? Yeso ati yanani‑nima tiwati yananineni.” Mai ati nameteni.

⁷⁴ “Keyehe‑ya hiri·oterani. Keyehe‑ya hiri·oniya, Deoso owa‑ya nanahabeba awane. Maki owato awirini.” Bedoro ati nematane. Bedoro ati fawaneya, arakawa maki haanawahematane.

⁷⁵ Arakawa haani‑ya mite, Yeso ati‑ya Bedoro atibodi watinawame, “Arakawa haani awisareya, ‘Yeso owatorini.’ Tinaboneni. Tiwati yanani 3 kana boneni.” Yeso ati ne, ati‑ya Bedoro atibodi watinawame, toke, ohini kitawahematane.