Maroko 9 - Deoso-ka Yama Hani

Yeso wehene wade

¹ Yeso mai‑ya hiyare, “Owati dai mitahi. Dai abi awisari‑ya Deoso ai nafi‑ka hidi kitabote tohawahebona dai one awawahaboneni.” Ati nematane.

² Mai amoni 6 kaniya, Bedoro, Tiyako, Yowaho, mai na, mai‑ya Yeso himane, adami nemehe tati‑ya mai tokomorosa, mai one sawi awiramaroni. Adami tati‑ya mai kobona, mai noki‑ya Yeso hini wehene‑ya yananihimatane.

³ Bora sa‑sawani kita, bofe‑ka bora haa‑nima na wadatera, bora wahi wadameteni.

⁴ I‑di Mose i‑di Eriya mai fama mai kobona, Yeso‑ya mai hiyarameteni.

⁵ Mai‑ya Bedoro awe, Yeso‑ya hiyare, “Ayo, tiwa‑ya oda sawe, yama sibarini. Dai‑ka wa‑wasa‑ba oda wamanaboneni. Tika ohari, Mose‑ka ohari, Eriya‑ka ohari nebonane.” Ati nematane.

⁶ Mai habi siitona ihi i‑di Bedoro ati yanane, atibodi yama‑ya watomarematane.

⁷ Makobote neme sabi mai‑ya barikanameteni. Neme sabi‑ya ati kaki, “Oka Dao amane. Onofi nafi, ati dai tokadabahi.” Ati nematane.

⁸ Mai kiinawama, Yeso ohari‑ta waimatane.

⁹ Makobote mai yanana, mai tokofawamiya, mai‑ya Yeso hiyare, “Adami tati‑ya yama dai awa tamine‑ya dai kaminariyahi. O·abiya, okitamiya, owa kitami hawa tohiya, yama dai awa tamine dai kaminabisaboneni.” Yeso ati nematane.

¹⁰ Yeso ati‑ya mai watora, Yeso kitamebona tamine‑ya mai ibi hiyarameteni.

¹¹ Makobote Yeso‑ya mai hiyara, “Mose‑ka yama hani ati‑ya mai ka‑kamina eya mai ati na, ‘I‑di Eriya koboni dai toheya, Deoso‑ka Ka‑kadika koboni yotobonane.’ Mai ati teni.” Mai ati nameteni.

¹² Mai ati‑ya Yeso mite, ati yanane, “Fara amani. Eriya koboni dai tohebona, yama‑ya namosebonane. Deoso‑ka yama hani ati one dai mitahi. ‘Dai‑ka Ayo neme‑ke‑ya mai nofi awirabone, mai weehinebonane.’ Yama hani ati nani.” Yeso ati nematane.

¹³ “Owati dai mitahi. Eriya koboni hawa tohe, mai weeni hikitemarine. Yama hani ati‑nima mai ihi namaroni.” Yeso ati nematane.

Madi towe yetene‑ya fatatowiti

¹⁴ Yeso‑ya mai da‑daba mai one sawi‑kaya mai kobonamatasa, mai one dama mai yorotokana mai‑ya mai awamaroni. Mai dama mai bai‑ya Mose‑ka yama hani ati‑ya mai ka‑kamina mai toha, Yeso‑ya mai da‑daba mai toha, mai na, mai ibi weenamaroni.

¹⁵ Mai dama Yeso‑ya mai awa, mai atibodi yama‑ya kadika, Yeso‑ya mai kanani tokamaroni.

¹⁶ Yeso mai‑ya hiyare, “Kobo·onama, hini yamata tamine dai hiyariti?” Ati nemarine.

¹⁷ Maki owa sawi, ati yanane, “Ayo, oka dao owakamani, tikasomebonaha. Oka dao‑ya madi towe foye, madi towe ene oka dao ati wadamarene.

¹⁸ Madi towe oka dao‑ya fatatowiti, oka dao wami‑ya sone, iridi sabone toka, ino‑ya wasakana, abano kitane, fare haa‑nima nofene. Tiwa‑ya mai da‑daba mai haa·ona, madi towe‑ya mai kananihebone, mai ati‑ya madi towe nofare, tokarene.” Maki ati nemarine.

¹⁹ Yeso ati yanane, “Ka! Owati dai nofara, dai narabo hawirani. Owati dai wato kanibote nahi. Dai‑ya owa sawi nafimaraboneni. Yetene dai kakamahi!” Yeso ati nemarine.

²⁰ Yetene‑ya mai kakama, Yeso‑ya madi towe awe, yetene‑ya fatatowiti, wami‑ya yetene sone, hini‑ya werene, iridi sabone toka nemarine.

²¹ Yetene badi‑ya Yeso hiyare, “Tika dao yanakana‑ke hika abariko emenihi?” Yeso ati ne, “Oka dao madehe tohe‑ya yanakanemarine.

²² Yifo, faha na‑ya oka dao‑ya madi towe fatatowiti damatene, fai‑ya nanahabebonaha. Tiwa kiti tohiya, oda tikasomahi!” Yetene badi ati nemarine.

²³ Yeso ati yanane, “Owa kiti nafiramone tiwatibodi ati riyahi. Owati tinofiya, yama tinofa‑nima yama naboneni.” Yeso ati nemarine.

²⁴ Yetene badi ati yananamatase, ati kite, “Tiwati onofani! Owatibodi tikasomahi. Tiwati onofi ba‑basi onabonehe!” Ati nemarine.

²⁵ Mai dama mai kobonamake, mai‑ya Yeso awe, madi towe‑ya hiyare, “Madi towe, tiwa ene yetene narabo hawirihi, ati wadarihi ne, tikahi! Yetene‑ya tifoyamariyahi!” Ati nemarine.

²⁶ Madi towe e‑erine, yetene‑ya wereni kite, tokemarine. Yetene home‑ya mai kakatoma, “Yetene abi oharine!” Mai one dama mai ati namaroni.

²⁷ Yetene yehe‑ya Yeso waratokane, yetene‑ya nawaamisame, yetene waimarine.

²⁸ Makobote yobe doro‑ya Yeso tokiyome, hika mai da‑daba mai ati yanana, “Madi towe oda weena, hini yamata ihi oda ene kitariti?” Mai ati namaroni.

²⁹ “Deoso‑ya dai hiyari awiriya, madi towe haa‑nima ne kanaterene.” Yeso ati nemarine.

Mai kiti ba‑basi na tamine

³⁰ Mai yananama, Karireya‑ya mai yakana, Yeso ati ene mai one noki‑ya mai toki awirameteni.

³¹ Yeso hika mai da‑daba mai‑ya kanawato, mai‑ya hiyare, “Dai‑ka Ayo neme‑ke‑ya ai owa daanebona, owa‑ya mai nanahababoneni. O·abiya, mahi 3 tohe‑ya okitamaboneni.” Yeso ati nematane.

³² Yeso ati‑ya mai watora, Yeso‑ya mai nayofina, mai ati yanarameteni.

³³ Kafanaho‑ya mai kobona, yobe‑ya mai tokiyoma, Yeso mai‑ya hiyare, “Hawi bai‑ya dai ibi hiyara, hini yamata tamine‑ya dai ibi hiyariti?” Ati nematane.

³⁴ Mai ati yanani awira, fara hawi bai‑ya mai ibi hiyara eya mai ati na, “Ebeni‑ke kiti ba‑basi nabati?” Mai ati na, mai ibi hiyarameteni.

³⁵ Yeso itari, mai 12 kana mai‑ya haane, mai‑ya hiyare, “Mai nafi‑ka hidi dai tohabone dai ati niya, mai dai kasoma, mai‑ka yo‑yose dai toha, dai nibisiyahi.” Ati nematane.

³⁶ Ewe owa‑ya Yeso idimise, ewe‑ya diwane, hika mai da‑daba mai 12 kana mai teberi‑ya wai, mai‑ya hiyaramatase,

³⁷ “‘Owa ene Yeso ya‑yainebonane.’ Dai atibodi ati na, ewe dai kasomiya, owa‑ya dai kasomahari, Okobi‑ya dai kasomahari neni.” Yeso ati nematane.

Yeso oni‑ya maki owa hirine

³⁸ Yowaho ati yanane, “Ayo, tiwa oni‑ya ai owa hirine, madi towe mai‑ya kananihi. Ai‑ya dabare, oda ati barihinene.” Yowaho ati nematane.

³⁹ Yeso ati yanane, “Maki‑ya dai ati baririyahi. Owa kiti yananabone ihi owa oni‑ya maki hirinane. Fara haa‑nima maki ati ne, owa‑ya kako kanibote rebonane.

⁴⁰ Ai‑ya mai kakora ai‑ya mai kasomabisateni.

⁴¹ Dai bako hoka, faha‑ya dai‑ya mai daana, ‘Yeso Kirisito‑ka mai amani. Mai okasomaboneni.’ Mai atibodi ati na, mai ihi amosa manakone‑ya Deoso daanebonane.” Yeso ati nemarine.

Ene towe manakone

⁴² “Dai one ati ene owati‑ya ewe nofamareya, hini ene towe manakone wadebonane. Hini ene towe awisareya, yati webote‑ya namidi mai yadihineya, faha webote‑ya mai korohifiya, yama sibarabone, komene bi‑bidi nibisebonane. Ene towe tohe, hini ene manakone komene nafibisebonane.

⁴³ Tiwa yehe one ene yama towe nokotiniya, tiwa yehe one wisitinakosahi, yama towe‑ya nokotinimarabonehe. Tiwa yehe ohari‑ya ti·abiya, tikitamiya, ti·abarabone‑kaya kobotiniya, yama sibabisaraboneni. Tiwa yehe fami‑ya ti·abiya, tikitamiya, wara hirini‑kaya yama hirini fawaterabone‑kaya tikiya, yama towe tohawahaboneni.

⁴⁴ Wara hirini‑ya mai naha, mai ime‑ya makatari mai kababoneni. Makatari mai abarihi, yifo hirini fawarihi naboneni.

⁴⁵ Tiwa teme one ene yama towe nokotiniya, tiwa teme one wisitinakosahi, yama towe‑ya nokotinimarabonehe. Tiwa teme ohari‑ya ti·abiya, tikitamiya, ti·abarabone‑kaya kobotiniya, yama sibabisaraboneni. Tiwa teme fami‑ya ti·abiya, tikitamiya, wara hirini‑kaya tikiya, yama towe tohawahaboneni.

⁴⁶ Wara hirini‑ya mai naha, mai ime‑ya makatari mai kababoneni. Makatari mai abarihi, yifo hirini fawarihi naboneni.

⁴⁷ Tiwa nokobodi one ene yama towe nokotiniya, tiwa noko one sobatinakihi, yama towe‑ya nokotinimarabonehe. Deoso ai nafi‑ka hidi kitabote tohawahe‑ya tiwa noko ohari‑ya tisawiya, yama sibabisaraboneni. Tiwa noko fami‑ya ti·abiya, tikitamiya, wara hirini‑kaya tikiya, yama towe tohaboneni.

⁴⁸ Wara hirini‑ya mai naha, mai ime‑ya makatari mai kababoneni. Makatari mai abarihi, yifo hirini fawarihi naboneni.

⁴⁹ Fara yifo hirini‑ya mai‑ya Deoso ketehebonane.

⁵⁰ Sao amosa. Faha ihi abiya, sao kabi‑nima kabinamaterani. Sao‑nima dai nahi. Dai ene amosahi. Dai ibi nofahi.” Yeso ati nemarine.