Maroko 14 - Deoso-ka Yama Hani

Mai‑ka feriado kobonabone

¹ Ai amoni fami‑ya ka‑kariwa kobonabone‑ka semana‑ya baho femeto‑ya ketehera‑ya Yodeo mai kabateni. Deoso‑ka yama‑bone‑ya mai da‑daa mai‑ka hidi mai toha, Mose‑ka yama hani ati‑ya mai ka‑kamina mai toha, mai na, mai yorotokana, Yeso‑ya mai kaka, mai awiri‑kaya Yeso‑ya mai wataboneni, Yeso‑ya mai nanahababonehe.

² Mai ibi hiyara, “Ai marinasa niya Yeso‑ya ai watiya, mai dama mai yawaba awineni. Ai marini hawa tohiya, Yeso ai wataboneni.” Mai ibi hiyara, mai ati namaroni.

Yeso tati‑ya fana ketehe

³ Simaho hibati‑ya mese towe tohemari, kitamemarine. Betaniya‑kaya Simaho‑ka yobe tohe, Simaho‑ka yobe‑ya mai tafiya, yama mahi amosa‑ya fana damakana, kamakemaroni. Yama mahi amosa oni narado toha, manakone nafe, yati amosa wamani‑ya wiye toha, noki tabori bakahinakosa, Yeso tati‑ya sorohikaremaroni.

⁴ Fana ihi‑ya mai awa, mai one yawawaha, fana‑ya mai weenabone, mai ibi hiyara, “Hini yamata‑bone yama mahi amosa‑ya Yeso tati‑ya fana sorokariti? Yama mahi amosa manakone fotateni.” Mai ibi hiyara, mai ati namaroni.

⁵ “Yama mahi amosa manakone fota, yama anini mahi 300 kane‑ka manakone‑nima manakone na, yama mahi amosa Yeso tati‑ya sorokarira‑mani, oda‑ya daatibisiya, oda daaniya, manakone oda waratokaniya, yinero‑ya mai kihara mai‑ya yinero oda daaniya, yama sibara neni.” Fana‑ya mai weena, mai ati namaroni.

⁶ Yeso mai ati‑ya mite, ati yanane, “Dai ati fawanahi. Fana ihi amosineni.

⁷ Yama mai kihara dai‑ya mai dabateboneni. Mai dai ati kasoma, mai‑ya dai kasomaba awineni. Owa‑ta owa sawi yaboraboneni.

⁸ Mai abiya, mai abo‑ya yama mahi amosa‑ya dai sorokariteni. O·ababone, owa‑ya fana sorokari dai toha, ihi amosineni.

⁹ Owati amosa dai mitahi. Yama nafi‑kaya Deoso ati amosabote tamine‑ya mai hiyariya, fana ihi amosa tamine‑ya mai hiyarahareboneni.” Yeso ati nemarine.

Yeso‑ya Yoda daanebona

¹⁰ Yeso‑ka mai 12 kana mai‑ka owa i‑di Yoda Isikari·oti Deoso‑ka yama‑bone‑ya mai da‑daa mai‑ka hidi mai‑ya toke, mai‑ya hiyarematane, Yeso‑ya kahabanebonaha.

¹¹ Yoda ati‑ya mai mita, mai ya‑yaina, “Hehe, tika yinero‑ba oda daanaboneni.” Mai ati nameteni. Yoda toke, “Mai awiri‑ya Yeso daa·onaboneni.” Atibodi ati nematane.

Yeso‑ka ka‑kariwa faina

¹² Ka‑kariwa yananiya, Yeso‑ya mai da‑daba mai ati yanana, “Ebeni‑kaya ai marinibati? Ai tefe‑ba oda aninabonehe.” Mai ati namaroni. Ka‑kariwa yananiya, kaneiro bidi‑ya Yodeo mai tabasiteni.

¹³ Yeso hika mai da‑daba mai fama mai‑ya yose, “Tabora‑ya dai towakahi, dai kobokaniya, maki faha‑ya damakane dai awaboneni. Faha‑ya damakane nowati‑ya dai towakamakiyahi.

¹⁴ Yobe‑ya dai kobokaniya, yobe hidi dai hiyariya, ‘Ebeni‑kaya oka mai da‑daba mai eyehe otafibati? Ai‑ya ka‑kanawato ati nene.’ Dai ati niyahi.

¹⁵ Hika yobe waari nemehe, neme‑ke kote honita tohe‑ya dai‑ya yofikanebonane. Yobe kote‑ya mesa kaware, fara‑ya ai tefe‑ba dai hawa tohiyahi.” Yeso ati nemarine.

¹⁶ Tabora‑ya mai towaka, Yeso ati‑nima yama na‑ya mai awa, ka‑kariwa‑ka yamata‑bone‑ya mai aninamaroni.

¹⁷ Mahi bidi‑ya Yeso hika mai 12 kana mai eyehe kobonamakimarine.

¹⁸ Mesa‑ya mai nahore, mai tafa, mai‑ya Yeso hiyare, “Owati amosa dai mitahi, owa‑ya dai‑ka owa daanebona, ai tafa ai‑ya sawine.” Ati nematane.

¹⁹ Yeso ati‑ya mai mita, mai atibodi a‑arira, “Owa tohi awiraba awineni.” Mai nafi ati nameteni.

²⁰ “Oka dai toha, dai 12 kana dai‑ka owa ohari owa‑ya daanebona, yama wiye ohare‑ya owa eyehe tafane.

²¹ Dai‑ka Ayo neme‑ke abebona, yama hani ati na, fara yama hani ati‑nima abebonane. Owa‑ya kahabane‑ka ene towe manakone nafeboneni. Ka! Wadare‑mana, yama amosabisa neni.” Yeso ati nematane.

²² Mai tafa, baho‑ya Yeso damane, Deoso‑ya hiyare, baho‑ya bakanakose, hika mai da‑daba mai‑ya baho‑ya daane, ati yanane, “Dai kabahi. Owa abano tamine‑bone amani.” Yeso ati nematane.

²³ Keneko‑ya fino‑ya Yeso damakane, Deoso‑ya hiyare, fino‑ya mai‑ya daane, fino mai nafi fawameteni.

²⁴ Fino‑ya mai fawiya, Yeso ati yanane, “Owa emene tamine‑bone amani. Owa emene tokabone, o·ababone, mai dama mai ihi manakone onahababoneni.

²⁵ Owati amosa dai mitahi. Deoso ai nafi‑ka hidi kitabote tohawahebona, yanani awisareya, awa bono fahi ofimaterabone, yananeya, awa bono fahi wamani yati ofimatasaboneni.” Yeso ati nematane.

²⁶ Deoso‑ka wayoma ohare‑ya mai hirina, makobote Orifera adami‑kaya mai tokameteni.

Yeso‑ka mai kananabone

²⁷ “Dai kananabone, owa‑ya dai dabamaraboneni. Deoso‑ka yama hani ati‑nima yama nabone, ‘Kaneiro mai‑ya na‑nawada onahabiya, kaneiro mai kananaboneni.’ Deoso‑ka yama hani ati nineni.

²⁸ Okitamiya, Karireya‑kaya okabone, owa‑kaya dai tokomakiyahi.” Yeso ati nematane.

²⁹ “Ayo, mai kananibisaba awineni. Owa‑ta kana·oraboneni.” Bedoro ati nematane.

³⁰ “Bedoro, owati timitahi. ‘Yeso owatorini.’ Tinabone, tiwati yanani 3 kaniya, arakawa haani famebonane.” Yeso ati nematane.

³¹ “Ai fama, ai ababa awineni. O·abi‑ya yama sibaraboneni. ‘Yeso owatorini.’ Oteraboneni.” Bedoro ati ne, ati kitematane. Haa‑nima mai nafi ati nameteni.

Kesemani‑ya mai toka

³² Kesemani‑kaya mai toka, Yeso hika mai da‑daba mai‑ya hiyare, “A‑ahi‑ya dai nahohi. Ahiyata‑ya Deoso ohiyaraboneni.” Yeso ati nematane.

³³ Bedoro, Tiyako, Yowaho mai na, mai‑ya Yeso himane, ahiyata‑ya mai toka, Yeso atibodi a‑arirematane.

³⁴ Mai 3 toha mai‑ya Yeso hiyare, “Owatibodi yawi kitini. Fara yawa ihi o·abi yanatoneni. A‑ahi‑ya dai naha, dai noko wadahi.” Yeso ati nematane.

³⁵ Ahiyata‑ya Yeso toke, yama kobonabone‑ya nofare, homeya, hini tamine‑ya Deoso‑ya hiyare,

³⁶ “Abi Deoso, kitabote amatini. Yama kobonabone onofarini. Owati‑nima yama riyahi. Hini tiwati‑nima yama nibisiyahi.” Yeso ati nematane.

³⁷ Yeso waamisame, kame, hika mai amona, Bedoro‑ya hiyare, “Simaho, amotiriyahi. ‘Dai noko wadahi.’ Ona, ora ohari awisareya hiniya amotineni.

³⁸ Dai noko wadahi. Deoso‑ya dai hiyarahi, Satanasi ati‑ya dai tokadabarabonehe. Dai atibodi amosa, dai abano kitarani.” Yeso ati nematane.

³⁹ Ahiyata‑ya Yeso tokomatase, Deoso‑ya hiyare, hini ati‑nima ati namatasematane.

⁴⁰ Yeso kamatase, nokobisa nafe ihi mai amonamatasa, mai‑ya hiyaramatasematane. Mai dodafiya, mai ati yanani awirameteni.

^41-42 Yeso tokomatase, kamatase, mai amonamatasameteni. “Dai dodafihi, dai amonaro. Hibayata Deoso ati‑ya mai tokadabara mai‑ya owa‑ya daanebona kamane, ahiyata‑ya. Dai nahomisamahi. Ai tokomahi.” Yeso ati nematane.

Yeso‑ya mai wata

⁴³ Yeso hiyaranasa neya, mai 12 kana mai‑ka owa i‑di Yoda mai dama mai eyehe kamemarine. Deoso‑ka yama‑bone‑ya mai da‑daa mai‑ka hidi mai toha, Mose‑ka yama hani ati‑ya mai ka‑kamina mai toha, Yodeo mai‑ka hidi mai bi‑bidi na mai toha, mai na, mai ati ihi Yoda‑ya mai dami sawemaroni. Yima‑ya mai one aka, awa‑ya mai one aka namaroni.

⁴⁴ Hibati‑ya Yoda mai‑ya hiyare, “Yeso‑ya dai‑ya yofi·okanabone, Yeso toma·onabone, fare dai waratoneya, sekorasa mai dai dabiya dai towakamayaho.” Ati nematane.

⁴⁵ Yeso‑ya Yoda kame, “Ayo” ati ne, fai‑ya tomanemarine.

⁴⁶ Yeso‑ya mai waratonamaroni, fai‑ya mai towakamabonehe.

⁴⁷ Maki yima‑ya nawaane sawi, yima‑ya sobanaki, Deoso‑ka yama‑bone‑ya mai da‑daa mai‑ka hidi webote‑ya na‑narifa narabo‑ya tarinabasemarine.

⁴⁸ Mai sawe mai‑ya Yeso hiyare, “Yima‑ya dai aka, awa‑ya dai aka nineni, owa‑ya dai watabonehe. Yama‑ya mai bo‑boti mai wati‑nima owa‑ya dai watinineni. Yama bo‑boti ohi awirini.

⁴⁹ Hibati‑ya mahi‑nima Deoso‑ka yobe‑ya mai okanawata, owa‑ya dai wataramaroni. Deoso‑ka yama hani ati‑nima yama nawahabone ihi owa‑ya dai watineni.” Yeso ati nemarine.

⁵⁰ Yeso‑ya mai da‑daba mai habi siitona, mai kananamaroni.

⁵¹ Maki yetene bora saya‑nima na‑ya weyene, hika bora famaramaroni. Yeso‑ya mai towakama mai nowati‑ya maki tokomakiya, sekorasa mai awa, mai hiwatemarine.

⁵² Maki bodi kanani toke, hika bora mai damahinakosamaroni.

Yeso‑ya mai weena

⁵³ Deoso‑ka yama‑bone‑ya mai da‑daa mai‑ka hidi webote‑ka yobe‑ya Yeso‑ya mai towakamameteni. Deoso‑ka yama‑bone‑ya mai da‑daa mai‑ka hidi mai toha, Mose‑ka yama hani ati‑ya mai ka‑kamina mai toha, Yodeo mai‑ka hidi mai bi‑bidi na mai toha, mai na, hidi webote tabaro‑ya mai yorotokanameteni.

⁵⁴ Yama yaki‑ya Bedoro yotomatane. Deoso‑ka yama‑bone‑ya mai da‑daa mai‑ka hidi webote‑ka yobe fowari barikane doro‑ya tokomaki, sekorasa eyehe itabase, yifo‑ya mai hiwanameteni.

⁵⁵ Deoso‑ka yama‑bone‑ya mai da‑daa mai‑ka hidi mai toha, Yodeo mai‑ka hidi mai one nafi toha na, mai yorotokanameteni, Yeso‑ya mai nanahababonehe. Yeso tamine‑mona‑ya keyehe‑ya mai hirinabone mai‑ya mai sibanameteni. Mai‑ka keyehe fara hinama kafamabone mai‑ya mai wasirameteni.

⁵⁶ Yeso tamine‑mona‑ya mai dama keyehe‑ya mai hirina, owa ati bare toha, owa ati bare toha, owa ati bare toha, mai nameteni, keyehe‑ya mai hirinaro.

⁵⁷ Mai one‑ya mai keyehebone mai nahomisa, mai ati yanana,

⁵⁸ “‘Deoso‑ka yobe maki mai wamahinemata onahabeya, amoni 3 kane‑ya wama·onamatasaboneni. Owati yananiya, yobe hawa tohebonane.’ Yeso ati nene.” Mai one ati nameteni.

⁵⁹ Mai ati fara hinama tohi awirameteni.

⁶⁰ Deoso‑ka yama‑bone‑ya mai da‑daa mai‑ka hidi webote waamise, ati yanane, “Yeso, mai ati timitineni? Hini yamata‑nima tiwati nibati?” Ati nematane.

⁶¹ Yeso ati yanani awire, mai‑ka hidi ati yananamatase, “Deoso‑ka Ka‑kadika amatiraniha? Deoso Bidi amatini?” Ati nematane.

⁶² Yeso ati yanane, “Fara ama·oni. Deoso mano kanika‑ya owitariya, owa‑ya dai awa, neme sabi‑ya okomatasiya, owa‑ya dai awa naboneni.” Yeso ati nematane.

⁶³ Yeso ati‑ya mai‑ka hidi webote mite, yawe, hika bora namidi‑ya sibikari, ati yanane, “Ati dai mitaho. Mai one ati tohiya, Yeso hini ati ene abaho.

⁶⁴ Deoso Bidi‑mona ati ne, keyehe‑ya hirine, haa‑nima mai ati na, mai‑ya ai nanahabateni. Hini yamata‑nima dai ati niti?” Mai‑ka hidi webote ati nematane. “Yeso towe amane. Abaho!” Mai nafi ati nameteni.

⁶⁵ Yeso‑ya mai firo, Yeso noko mai barihikane, mai one koohinisa hine, “Ebeni‑ke tiwa‑ya koonisa?” Mai ati nameteni. Sekorasa Yeso‑ya mai towakama, Yeso noko‑ya mai batanameteni.

“Yeso owatorini.” Bedoro ati ne

⁶⁶ Yobe fowari barikani nafi doro‑ya mai dama mai naha, mai‑ya Bedoro wai‑ya Deoso‑ka yama‑bone‑ya mai da‑daa mai‑ka hidi webote‑ya na‑narifa one atona kamakemeteni.

⁶⁷ Bedoro yifo‑ya hiwane‑ya atona awa, ati yanana, “Yeso Nasare‑ke‑ya sa‑sawi amatiraniha?” Atona ati na,

⁶⁸ “Maki‑ya osawiterani. Tiwati owatorini.” Bedoro ati ne, yobe fowari barikane‑ka nokobi‑kaya toke, waimatane.

⁶⁹ Mai one sawe, Bedoro tamine‑ya atona hiyara, “Nokobi‑kaya wai Yeso‑ya mai da‑daba mai‑ka owa amane.” Atona ati na,

⁷⁰ “Yeso‑ya osawiterani.” Bedoro ati namatasematane. Mai naho bide tohiya, Bedoro‑ya mai one hiyara, “Yeso‑ya mai da‑daba mai‑ka owa amatini. Karireya‑ya mai wi‑wina mai‑ka owa amatini.” Mai ati nameteni.

⁷¹ “Keyehe‑ya hiri·oterani. Keyehe‑ya hiri·oniya, Deoso owa‑ya nanahabeba awane. Maki owato awirini.” Bedoro ati nematane.

⁷² Bedoro ati fawaneya, arakawa haani yananamatasematane. Arakawa haani‑ya Bedoro mite, Yeso ati‑ya Bedoro atibodi watinawame, “Arakawa haani yanani fami awisareya, ‘Yeso owatorini.’ Tinaboneni. Tiwati yanani 3 kana boneni.” Yeso ati ne, ati‑ya Bedoro atibodi watinawame, ohinawahematane.