Karatiya 4 - Deoso-ka Yama Hani

Deoso bidi mai ai toha, hika yama ai kayafaboneni

¹ Ai‑ka abi bofe‑ya hika yama ai kayafabone tamine‑ya dai kadikahi. Maki ohari‑ka yo‑yose mai dama, bidi‑ta oharibisatene. Hika yama dama, hika yo‑yose ohari‑ya hiyare, “Owati timitahi. O·abiya, oka dao oka yama nafi‑ya kayafatebonane. Oka dao nafire ene oka yamata tinawadamataboneni. Oka dao nafire yamata nawadi‑ya watorane. O·abiya, oka dao tinayanaboneni. Oka dao nafi‑mana, sibare nane. Oka dao hawa toheya, oka yama nafi‑ya oka dao kayafawahebonane.” Ati nemarine. Bidi nafire, badi‑ka yama‑ya kayafaterene. Badi‑ka yo‑yose‑nima bidi ne tohatene.

² Madehe tohasa neya, badi‑ka yo‑yose ati‑ya tokadabatene. Badi ati‑mari‑nima ne, hawa toheya, badi‑ka yama‑ya kayafawahatene.

³ Fara‑nima Kirisito koboni awisareya, madehe‑nima ai na, Mose ati‑ya ai one tokadaba, madi mai ati‑ya ai one tokadaba na, ai ene amosara ai‑ya mai yaditonamaroni. Mai‑ka yo‑yose mai‑nima ai namaroni.

⁴ Makobote yama nafi hawa tohiya, Deoso Bidi‑ya yosemarine ai tabaro‑ya. Bofe‑ya Yeso kobone, Yeso madi i‑di Mariya ai toha, Yeso ai tohahari ne. Ai‑nima Yeso ne, Mose ati‑ya tokadabebona Deoso ati nane.

⁵ Mose ati‑ya ai tokadababone Deoso ati ne, ati ai tokadabi awire ene ai ababoneni. Yeso‑ta ai manakone‑ya nanahabe, ati‑ya ai nofe, Deoso bidi hawa tohe, ai tohaboneni.

⁶ Deoso bidi ai tohawaha, Deoso‑ka Doni ai atibodi‑ya sawi ene Deoso ai Abi nineni. Deoso ai‑ya ewe tene. “Abi Deoso” ai ati teni.

⁷ Deoso dai‑ya ewe ne, mai‑ka yo‑yose dai tohami awiraboneni. Deoso bidi dai amani. Deoso dai‑ya kasomebonane. Yeso ene, Deoso‑ka yama dai kayafaboneni.

Dai‑ya onofa owa‑ya dai nofiyahi

⁸ Hibati‑ya Deoso yokana dai watora, madi mai ati dai nofamaro, deoso mai amanikani dai ati na, mai ati‑ya dai tokadabamaroni.

⁹ Deoso yokana dai watowaha, Deoso dai‑ya watoharine, hini yama‑bone madi mai‑ya dai ati hiyaramiti? Madi mai ati dai nofamatasiya, dai‑ya mai yosematasaboneni. Dai‑ka hidi mai tohawahaboneni. Madi mai kitara, dai‑ya mai kasomateraboneni.

¹⁰ Hibati‑ka mai ihi‑nima dai ene nawaha, mahi, abariko, faha kaki, faha sai na dai nokotonibisateni.

¹¹ Dai tamine omita, owa habo siitonineni. Dai‑ya ohiyaramaro, owati honita toha awineni.

¹² Oka soho dai amani. Owati dai mitahi. Yodeo mai ati‑nima onami awira, owa‑nima dai nahi. Owatibodi‑ya dai nakomara, dai‑ya mai yaditonamariyahi. Dai owa ama·oni.

¹³ Hibati‑ya dai tabaro‑ya kobo·ona, kiya·onamaroni. Kiya·ona, Deoso Ati Amosabote dai‑ya okaminamaroni.

¹⁴ Kiya·ona, owa‑ya dai weeni awira, owa‑ya dai natafa, dai tabaro‑ya owa‑ya dai nawina, dai namaroni. Deoso‑ka yo‑yose dai tabaro‑ya kobone‑nima, Yeso Kirisito dai tabaro‑ya kobone‑nima, owa‑ya dai nihemaroni.

¹⁵ Hibayata owati ihi dai ya‑yainamarani. Hibati‑ya owa‑ya dai nofi nafemaro, owa‑ya dai nofami awirabone dai ati na awineni. Hibati‑ya dai nokobodi‑ya owa‑ya dai ati daanamaroni, owa nokobodi yati tohawahabonehe. Hini yama‑bone owati ababone dai ati niti? Owati dai nofamaraba awineni. Bara mai ati dai nofawaharo owatibodi ati nineni.

¹⁶ Deoso ati yokana dai‑ya okaminabisa, keyehe‑ya hiri·oterani. Deoso ati‑ya dai‑ya okamina, “Baoro oda‑ya kakone.” Dai ati na awineni. Deoso ati yokana dai‑ya okamina, owa‑ya dai kakowaha awineni. Owatibodi ati nineni.

¹⁷ Dai‑ya keyehe‑ya mai hirikana, dai‑ya mai ati nofa, dai‑ya mai nofi awirani. “Oda ati‑ta dai nofabisahi. I‑di Baoro mai ati dai nofariyahi.” Mai ati na. Mai‑ya dai kahiyarabone mai atibodi nofabisineni.

¹⁸ Dai tabaro‑ya owina, oda‑ya dai nofi nafemaroni. Owa nowati‑ya oda‑ya dai nofasa na‑mani, yama amosa neni. Mai ati‑ya dai nofabisani.

¹⁹ Oka madehe‑nima dai na, dai tamine omita, owatibodi koma, owatibodi komene kitineni. Mai fanawi dori kome yanana, mai dori kome kitateni, dori wadabonehe. Fara‑nima owatibodi komene nineni. Dai ene owatibodi komineni. Yeso Kirisito ati dai nofi nafibona, ene‑nima dai ene nabone, dai tamine ene owatibodi komineni.

²⁰ Dai‑ya onofi nafe, dai tamine‑ya owatibodi kadikani. Dai‑ya osawira, dai atibodi ati owato awirani. Dai‑ya owatibodi foya, dai tabaro‑ya osawiya, owati amosawamaba awineni. Owati dai nofaba awineni. Onani. “Mai‑ya osawiya, hini yama‑nima onaba, ama·oniti?” Owatibodi ati teni.

I‑di Hekara, i‑di Sara mai tamine

²¹ I‑di Mose ati‑ya dai tokadababone dai ati na, i‑di Mose ati‑ya dai wata awineni.

²² I‑di Abaraho bidi mai fama, fadi yokana‑ka bidi ohari, fadi‑ka yo‑yose‑bone mai hikanikamete‑ya bidi owa toha nematane.

²³ I‑di Abaraho ene Hekara bidi wadabise, Sara bote toha, Deoso hikasome, Deoso ati‑nima Sara bidi wadawahane.

²⁴ Abaraho fadi mai fama, mai tamine‑ya Deoso hiyaremarine, ai‑ya kanawatobonaha. Hibati‑ya Abaraho‑ya Deoso hiyare, makobote Mose‑ya hiyarane. Ai‑ya kasomebona, hika mai hi‑hiyara mai famamaroni. Sinai adami toha, Arabiya‑ya waaya, hibati‑ya Sinai adami tati‑ya Mose wai‑ya Deoso hiyarematane. Deoso ati‑nima ai nabone ai‑ya Mose hiyaramatasane. Abaraho fadi kanika i‑di Hekara‑nima Mose‑ka yama hani nineni. Mose ati‑ya mai ati tokadaba, ai kanika‑nima mai nineni. Mose mai‑ya yosetene.

²⁵ Yerosare bofe‑kaya mai wi‑wina Sinai‑nima mai nihi, i‑di Hekara‑nima mai nihi, mai kanika mai yaditona mai‑nima mai nihi na, mai‑ka hidi mai‑ya yosetene.

²⁶ Sara yaditona‑nima ni awirini. Yerosare neme‑kaya mai wi‑wina Sara‑nima mai nineni. Ai yaditora‑nima mai nineni. Sara bidi ai toha, ai yaditorani. Abaraho‑nima ai na, Deoso ati ai nofineni.

²⁷ Hibati‑ya i‑di Isa·iya kanahanomatane. “Hibati‑ya naba tihara, Tika madehe wadaramaro, Hibayata ya‑yaitiwawahi. Hibati‑ya tikahiwara, Madehe kome‑ya titomiterani. Hibayata tikahiwawahabone ya‑yaitinahi. Tika nodi mai damawahaboneni. Fana one naba tohamaro‑ka nodi mai fa‑famaraba nibisaboneni.” Isa·iya‑ka yama hani ati neni.

²⁸ Deoso ati‑nima yama nabone‑ya Abaraho nofemari, Abaraho bidi i‑di Isaki wademarine. Fara‑nima Deoso ati ai nofa, Deoso bidi mai ai amani.

²⁹ I‑di Abaraho ene‑bisa i‑di Isima·eo wadematane. Abaraho, Sara mai fame, Deoso‑ka Doni mai hikasomara‑mani, mai‑ka ewe wadare nane. I‑di Isaki wadeya, i‑di Isima·eo kako, i‑di Isaki‑ya yasine, i‑di Isaki‑ya bisinematane. Fare Isima·eo‑nima Yodeo dai‑ya mai wee, dai‑ya mai kaka, dai‑ya mai bisi naboneni.

³⁰ I‑di Abaraho bidi tamine‑ya Deoso hini hika yama hani‑ya kanahano, “I‑di Hekara bidi‑ya fama, mai towakabisahi. I‑di Sara‑ta bidi‑ya fama mai winabisahi. I‑di Abaraho abeya, Abaraho‑ka yama‑ya Sara bidi kayafebonane. Abaraho‑ka yama‑ya i‑di Hekara bidi kayafi awirebonane.” Deoso‑ka yama hani ati nineni.

³¹ Isaki‑nima ai nineni. Isima·eo‑nima mai one nihi nineni. Isima·eo‑nima ai ni awirani.