Karatiya 1 - Deoso-ka Yama Hani

¹ Baoro ama·oni. Dai‑ka yama hani‑bone okanahanowahaboneni. Yeso Kirisito‑ka yo‑yose ama·oni. Owa‑ya mai one yoseramaroni. Yeso Kirisito‑ta owa‑ya yosemarine. Yeso Kirisito abemari, Deoso hinakitamemari, makobote Yeso Kirisito Badi i‑di Deoso eyehe owa‑ya yosemarine.

² Karatiya‑kaya dai wi‑wina Yeso ati dai no‑nofa dai‑ka yama hani‑bone okanahanoneni. Yeso ati‑ya mai no‑nofa owa‑ya mai sa‑sawi, mai ati okanahanohari onaboneni. Dai tabaro nafi‑ka yama hani‑bone dai kadikahi.

³ Ai‑ka Abi i‑di Deoso, ai‑ka Ayo i‑di Yeso Kirisito ne, dai‑ya mai kasoma, dai atibodi ati dai‑ya somateni.

⁴ Ai ene amosara, tabora nafi‑nima ai ene towe namaro, ai manakone wada, ai ababoneni. Yeso ai manakone‑ya nanahabebona, ababisemarine. Hibati‑ya ai ene towe toha, Deoso ati ene ai manakone‑ya Yeso nanahabemari, Yeso ene ai ene amosawahaboneni.

⁵ Deoso‑ya ai kahiyarahi. Makobote Deoso tabaro‑ya ai winiya, Deoso‑ya ai kahiyara. Deoso‑ya ai kahiyari fawariyahi.

Deoso hawine ohari‑ta tohene

⁶ Hibati‑ya Kirisito ene Deoso dai‑ya haane, Ati Amosabote dai nofemari, ati dai nofami awire, mai one ati‑ta dai nofawahamoneni. Ka! Hini yamata‑bone mai ati dai nofawahiti? Mai ati amosabisa‑mone dai ati na awineni.

⁷ Yeso Ati Amosabote ohari‑ta tohe, ati bare‑ya mai kamina, Kirisito Ati Amosabote tohi awirene. Keyehe‑ya dai‑ya mai hirikanineni, mai ati dai nofabonehe.

⁸ Deoso hawine ohari‑ta tohabisane. Deoso hawine bare‑mona‑ya mai kamina, mai‑ya Deoso yawi fawaterebonane. Deoso hawine bare‑mona oda kamina‑mani, oda‑ya Deoso yawi fawarihi, hawine bare‑mona‑ya Deoso‑ka yo‑yose mai kamina‑mani, mai‑ya Deoso yawi fawarihi ne nane.

⁹ Hibati‑ka owati‑nima owati namatasaboneni. Deoso hawine bare‑mona‑ya mai hiyara, mai‑ya Deoso yawi fawaterebonane.

¹⁰ “Mai ya‑yai·onihebone, owati amani.” Dai ati na awineni. Deoso‑ta ya‑yai·onira‑mani, mai ya‑yai·onibisa‑mani, Yeso Kirisito‑ka yo‑yose ohara neni. Yeso Kirisito‑ka yo‑yose oha, Deoso‑ta ya‑yai·oniteni.

Baoro‑ya Deoso kadikemata ati hikaminebonaha

¹¹ Oka soho dai amani. Owati dai mitahi. Deoso Ati Amosabote dai‑ya okaminamaroni. Hini owati‑ya okamini awiramaroni. Oda owa ati tohi awirihi nemarine. Deoso ati‑ta okaminabisamaroni.

¹² Owa‑ya mai kanawato awiramaroni. Yeso Kirisito‑ta owa‑ya kanawatobisemarine.

¹³ Hibati‑ka owa tamine dai mita awineni. Deoso‑ka mai onofara, Yodeo mai ati‑ya onofa, Yodeo mai ihi‑nima owa ene na, Deoso‑ka mai‑ya okako, mai‑ya wee, mai‑ya bisi onamaroni, Yeso ati‑ya mai nofarabonehe.

¹⁴ Yodeo mai one, oda‑ka idi mai ati‑ya mai nofi bi‑bidi namaroni. Owa‑ta oda‑ka idi mai ati onofi nafe. Oda‑ka idi mai ati okadabamaroni.

¹⁵ Deoso owa‑ya nofe, owadi awisari‑ya owa‑ya kadikematane, ati okaminebonaha.

¹⁶ Deoso hini Bidi‑ya owa‑ya yofikanemarine. “Bara mai‑ya Oka dao tamine tikaminawahaboneni.” Deoso ati nemarine. Deoso ati‑ya omita, mai one ati omitaramaroni. Deoso ati‑ta omitabisamaroni.

¹⁷ Yerosare‑ya okara, Yeso Kirisito‑ka yo‑yose mai ati omitaramaroni. Yerosare‑ya mai winasa na, mai ati omiti awiramaroni. Arabiya‑ya okabisa, makobote wini·onamamaroni, Damaso‑ya owinabonehe.

¹⁸ Faha fowe 3 tohamakiya, Yerosare‑ya okawaha, Bedoro‑ka yobe‑ya kobo·ona, owa amoni 15 toha, Bedoro‑ya ohiyarineni.

¹⁹ Bedoro‑ka yobe‑ya owiniya, Yeso sori i‑di Tiyako‑ta oawa, Yeso‑ka yo‑yose mai one oawi awiramaroni.

²⁰ Owa‑ya mai kanawatora, Yeso ati‑ta okanahanobisa, keyehe‑ya hiri·ora, oka yama hani‑ya Deoso awe, oka yama hani‑ya watone.

²¹ Bedoro‑ka yobe‑ya owina, makobote Siriya‑kaya okomake, makobote Sirisiya‑kaya okomaki onamaroni.

²² Yodeya‑kaya i‑di Bedoro‑ka yobe waari, owa nowati‑ya Yodeya‑kaya Yeso Kirisito ati‑ya mai no‑nofa mai one mai yorotokana, mai ibi hiyara, “I‑di Baoro oda awi awisarani.” Mai ati nineni.

²³ Owa tamine‑ya mai mita, owa‑ya mai awi awisaramaroni. “Baoro Yeso ati‑ya kako, ai‑ya bisinemarine, Yeso ati ai nofarabonehe. Makobote Yeso ati‑ya tokadabawahe, Yeso ati‑ya kaminatene.” Mai ati namaroni.

²⁴ Owa tamine‑ya mai mita, mai ya‑yainamaroni. “Deoso, amosabote amatini, Baoro hamemari, tiwati ihi ati somawamane.” Mai ati namaroni.