Bedoro daidi 3 - Deoso-ka Yama Hani

Ai fana tamine

¹ Mai fanawi, owati dai mitahi. Dai faniya, dai‑ka yibote mai ati dai tokadabahi. Deoso ati‑ya dai‑ka yibote nofare, Deoso ati dai tokadaba, Deoso ati‑ya mai nofaba awineni. Dai ati ene toharaboneni. Dai ene amosa‑ya mai awa, Deoso ati‑ya mai nofawahaba awineni.

² Mai ati dai tokadaba, dai ene amosa, dai ene‑ya mai awaboneni.

³ Dai amosi yokana tohabone dai ati na, dai mese‑ka ato ihi toharaboneni. Oro, ato, bora amosa toha na, dai mese‑ta‑ya namosateni.

⁴ Dai amosi yokana tohabone, dai atibodi amosahi. Dai mese‑ka ato bote tohawahiya, amosi fawateni. Mai dai kasoma, dai ati soma na, dai atibodi‑ya Deoso awe, dai manakone nafimone ati tene. Dai atibodi amosi fawateraboneni.

⁵ Hibati‑ya mai fanawi amosabone, Deoso‑ya mai kahiyara, mai‑ka yibote mai ati‑ya mai tokadaba na, fara mai atibodi amosameteni.

⁶ I‑di Sara‑nima dai nahi. I‑di Sara i‑di Abaraho ati‑ya tokadaba, “Abaraho, oka hidi amatini. Owa‑ya tiyose, tiwati okadababoneni.” Sara ati nameteni. Dai ene amosa, dai habo siitora, Sara bide dai tohani.

⁷ Mai makidi dai toha, owati dai mitahi. Dai faniya, dai‑ka yibote mai dai kasomiyahi. Yama‑ya mai weyeniya, mai‑ka yama kote dai weyekana, yama‑ya mai anina, mai dai kasoma nahi. Dai‑ka yibote mai dai weera, mai tamine dai hiyara, mai dai kahiyarabisahi. Dai kiti na‑nafi na, mai fanawi kiti bi‑bidi na, mai dai kasomahi. Mai dai kasomara, Deoso‑ya yama‑ya dai haaniya, dai ati‑ya mitarebonane. Deoso‑ka dai toha, Deoso‑ka dai‑ka yibote toha nineni.

Dai ene amosa, dai‑ya mai bisina, dai yawariyahi

⁸ Owati hawa tohi yanatoneni. Owati dai nafi mitahi. Dai nafi atibodi ati fara hinama tohahi. Ai‑ka ayo ai nofi‑nima dai ibi nofiyahi. Mai atibodi koma mai dai kasomahi. “Yama dai watora, owa‑ta yama owatobisineni.” Dai ati riyahi.

⁹ Dai‑ya mai we‑wee mai dai weerihi, dai‑ya mai ka‑kako mai dai kakorihi na, hiniya mai dai kasomahi. Haa‑nima dai nabone Deoso ati ne, dai‑ya haanemarine. Haa‑nima dai niya, Deoso dai‑ya kasomebonane.

¹⁰ Deoso ati dai mite, “Dai ya‑yainabone, dai amosawahabone dai ati na, mai dai tairihi, keyehe‑ya dai hiririhi, dai nahi.

¹¹ Dai ya‑yainabone dai ati na, dai ene‑maro‑nima dai ene namara, dai ene amosawaha, mai ibi weena, dai ati ene mai ibi ati somawamahi.

¹² Dai ene amosa, dai ene‑ya Deoso awe, dai‑ya kasomatene. Yama dai haana‑ya dai‑ya daanebonane. Mai ihi amosara Deoso ati‑ya mai tokadabara, yama‑ya mai haana, mai ati‑ya Deoso mitare mai‑ya kasomarebonane.” Deoso‑ka yama hani ati nineni.

¹³ Dai ene amosabone dai nokotonihe, ebeni‑ke dai‑ya bisinabonati?

¹⁴ Dai ene amosa, dai‑ya mai bisina, dai yawarihi, dai habo siitorihi na, Deoso dai‑ya kasomebonane.

¹⁵ “Yeso Kirisito oka Hidi amosabote amane.” Dai atibodi ati nahi. “Hini yamata ihi Yeso koboni dai nimaniti?” Mai ati na, mai dai hiyariya, yama‑ya mai watowahaboneni.

¹⁶ Dai ati yananiya, dai ati yawara, dai ati somabisahi, dai atibodi dai‑ya weerabonehe. “Yeso Kirisito‑ka mai‑mone mai ati kasiroteni.” Mai ati na, Dai ene‑ya mai awiya, mai ati fawanabone, hini mai atibodi mai‑ya weenaboneni.

¹⁷ Dai ene amosa, Deoso mai‑ya ati barini awire‑mana, dai‑ya mai bisina, sibarabone, Deoso dai‑ya kasomebonane. Dai ene amosara, dai‑ya mai bisiniya, Deoso dai‑ya kasomarebonane.

¹⁸ I‑di Yeso Kirisito ene amose hinama tohe, abe, dai manakone‑ya nanahabe, dai‑ya Deoso ati somawamebonaha. Hibati‑ya ai ene amosara, Kirisito amosabote abe, ai abarabonehe. Deoso‑ka Doni ene Yeso kitamemarine.

¹⁹ Kirisito abeya, korimari tokane, madi i‑di Deoso mai barihikanamete mai‑ya toke, mai‑ya hiyarane.

²⁰ Hibati‑ya madi mai ihi amosara mai‑ya Deoso barikanematane. I‑di Nowe kanawa‑ya wamaneya, Deoso nimane. I‑di Nowe‑ka kanawa hawa tohiya, mai‑ya Deoso barikane. Makobote Yeso abe, mai‑ya hiyare, i‑di Nowe‑ka kanawa‑ka ai 8 kana mai hasina, mai one nafi abameteni, faha ihi. Mai 8 kana kanawa dori‑ya faha mese‑ya mai kawina, mai abarameteni.

²¹ Ai‑ya mai habanirisa ihi ai besene fawara, Deoso‑ya ai tamine ai kamina ai‑ya ati somawame, ai atibodi besene fawateni. Ai‑ya mai habanirisa, ai‑ya mai one awiya, Deoso ati ai nofa ai‑ya mai watowahaboneni. “Owati‑ya dai nofa, dai‑ya mai habanirisahi faha‑ya.” Deoso ati nematane. Dai atibodi dai‑ya weerabone, dai‑ya mai habanirisahi. Yeso Kirisito kitamemari‑nima ai kitamahareboneni.

²² Yeso kitame, neme‑ya toke, Badi i‑di Deoso‑ka kanika‑ya itariwahe, Yeso kitabote tohe, neme‑ya mai wi‑wina, Deoso‑ka yo‑yose, mai na, mai‑ka hidi tohanane.