Zefanaya 3 - BAYỊBURU Izii

G'ọo-dụru Jierúsalẹmu l'iphu

¹ Nshịo gụbe mkpụkpu ono, kwefuru Chileke ike; tẹme ị bụru mkpụkpu, mebyishiwaru onwiya emebyishi; mbụ gụbe mkpụkpu iwashị ono!

² Mkpụkpu ono ta anụjedu iphe lẹ nchị; ọphu ọ dụdu iphe, ookweje lẹ ya mesweru. Mkpụkpu ono ta akpọduru obu yeru Chipfu; ọphu ọo kpokubejedu Chileke iya ntse.

³ Ndu-ishi phẹ bẹ anọduje agbọ ụja g'oduma; ndu-ikpe lẹ mkpụkpu ono nọdu anọduje aba hanyịhanyi g'ẹjo-nkụta-ọswa, nchi jipfuru, bụ ọphu nchi ta abọ-pfujedu iphe, ọ hụmaru.

⁴ Ndu mpfuchiru iya ta adụdu iphe, ẹphe bụ; tẹme ẹphe bụkotaru ndu bụ nwoderu-oye. Ndu uke phẹ mebyishiwaru ẹka dụru Chileke nsọ; tẹme ẹphe mebyishiwaa ekemu Chileke.

⁵ Chipfu, bụ onye pfụberekoto nọkwanu l'echilabọ phẹ. Ọphu ọ dụdu iphe, apfụduru-ọto, oomeje. Mbọku-mbọku bẹ oomeje g'a maru lẹ ya ekpeje ikpe, pfụru ọto; ọphu ọ dụdu mbọku, nwụtaru anwụta, o too mejedu iya; ọphu iphere adụjekwapho ndu apfụbeduru ẹka ọto.

⁶ “Mu mewaru g'ọha, dụ igwerigwe chịhu; tsukpọshia iphe, ẹphe gude gbobuta onwophẹ. Etsuzọ etsuzọ, nọgbaa lẹ mkpụkpu phẹ bẹ mu mewaru; ọ dakọtaepho kẹ nyọnyoronyo. Ọphu ọ dụedu ọphu nemadzụ eshikwadu eshishi. Mkpụkpu phẹ bẹ e mebyishichaaru; ọphu ọ dụedu onye bu iya ebubu m'ililekpọo.

⁷ Mu pfuru nụ mkpụkpu ono sụ iya: ‘Tororo, mu egbuẹru iya phọ unu bụ l'unu aa-nọdukwa atsụ mu ebvu; kweje l'unu mesweru mu.’ Ọ bụ l'unu meru iya ẹgube ono mẹ mu tege emebyishikwa ẹka unu bu; ọphu mu tege anụ-beẹduru unu aphụ gẹ mu tụberu. Obenu l'ọoguele phẹ-a anọdu eme mkparwụ mkparwụ l'iphemiphe, ẹphe eme.

⁸ “Ọo ya bụ lẹ-a; wakwa iphe, Chipfu epfu baa: Ngabẹnuru mu jasụ mbọku ono, mu a-gbalihu gbaa ngu ekebe. Mu pfuakwaru iya hoo haa lẹ mu e-kukọbe ọha, dụ iche iche l'ẹka lanụ; mu achịkobe alị-eze, dụ iche iche; tụ-koshi phẹ oke ẹhu-eghu mu l'ophu. Mbụ l'okophoo, mu eko e-tsufu mgboko l'ophu g'ọku, etsu etsutsu.

⁹ “Noo teke mu e-me g'olu-opfu ndiphe gee asa; k'ọphu iphe, bụ g'ẹphe ha a-wata araku ẹpha Chipfu; tụgba nanụ baaharụ iya ẹja.

¹⁰ Ee-shijechaa l'azụ ẹnyimu Kushi abya mu agwagwa; mbụ ndu epfu anụ mu, bụ ndibe mu, tụkaru nanụ nanụ.

¹¹ O -rwua mbọku ono bẹ e tee meẹdu ngu iphe-iphere k'iphe, i meru gude kwefuru mu ike; kẹle mu a-tụkokpoo iphe, bụkpoo ndu gude eku-onwonye ete ẹswa l'echilabọ unu ono woshichaa g'ẹphe ha. Ọphu unu abyadụ ekubaa onwunu ekuku l'úbvú nsọ mu.

¹² Ọ bụchia lẹ mu a-harụ unu ndu dụ àgù bya ewoze onwophẹ alị; mbụ ndu kpọru obu yeru ẹpha Chipfu.

¹³ Nwa ndu ono, phọduru lẹ Ízurẹlu ono tee mebaẹkwa iphe, apfụduru-ọto; ọphu ẹphe abyadụ adzụ ụka; ọphu ọ dụdu onye anụma phẹ opfu ẹregede l'ọnu. Mbụ l'ẹphe e-rije nri zẹe pyakọo; ọphu ọ dụdu onye byaru eye phẹ ebvu.”

Ebvu ẹhu-ụtso

¹⁴ Gụa ebvu ẹhu-ụtso; gụbe nwada Zayọnu! Gụbe Ízurẹlu; tụa ụzu ẹhu-ụtso! G'ẹhu tsọje ngu ụtso; l'iigude obu ngu g'ọ ha tee ẹswa; gụbe nwada Jierúsalẹmu.

¹⁵ Kẹle Chipfu nafụwaru ngu aphụ ono, o shi anụ ngu ono. Ọ chị-phuwaru ndu ọhogu ngu azụ. Chipfu; mbụ eze ndu Ízurẹlu nọkwa swiru ngu eswiru; ọphu ọ dụdu ẹjo-iphe, ị byaru atsụbaa ebvu ọzo.

¹⁶ O -rwua mbọku ono bẹ aa-sụ Jierúsalẹmu: “Gụbe Zayọnu; ta atsụkwa ebvu! G'ẹka ta atụhukwa ngu lwakpalwakpa!

¹⁷ Chipfu, bụ Chileke ngu nọkwa swiru ngu eswiru. Ọ bụ onye ike dụ l'ọgu; ọ sụru ngu adzọdzo. Oo-teru ẹswa kpua opfu ẹhu ngu. Oo-gude n-yemobu mee g'ị nọdu nggujingguji. Ọo-gụru ebvu teru ẹswa kpua ngu.”

¹⁸ “Mbụ l'iphe-aphụ e meru ngu l'ọbo-iphe ono; bẹ mu e-wofu unu l'ẹhu; kẹle ọ bụ unu ivu-ẹrwa bya abụru unu iphe-iphere.

¹⁹ Lekwa; iphe, bụkpoo ndu eme unu ewere bẹ o -rwua teke ono bẹ mu e-mekwa phẹ iphe. Ndu ẹniyeni bẹ mu a-dzọta; mu abya achịkobe iphe, bụkpoo ndu e shi chịkaa nanụnanu. Mu e-me g'a jaa phẹ ajaja kwabẹ phẹ ùbvù l'iphe, bụkpoo alị ono, bụ ẹka e shi mee phẹ iphe-iphere ono.

²⁰ O -rwua teke ono bẹ mu a-chịkobe unu. Mbụ l'o -rwua teke ono bẹ mu a-chịlata unu unuphu. Mu emee g'a kwabẹ unu ùbvù jaa unu ajaja l'echilabọ ndu nọkota lẹ mgboko l'ophu; mbụ teke ono, mu e-dophu unu azụ l'ọnodu unu ono; mbụ lẹ mu e-me iya l'ọ gbaa unu l'iphu gẹdegede.” Nokwa iphe, Chipfu l'epfu.