Oziphe 3 - BAYỊBURU Izii

Iphemiphe nweru teke emeje iya

¹ Iphemiphe nwekwarụ teke eemeje iya; mbụ l'iphemiphe, eeme ememe nweru teke eemeje iya lẹ mkpula igwe-a.

² Teke aanwụ nemadzụ anwụnwu dụ; teke aanwụhu anwụhu dụkwapho. Teke eemebe iphe l'alị dụ; teke aakpata iphe, e meberu l'alị akpata dụkwapho.

³ Teke eeme g'a nwụhu anwụhu dụ; teke eeme g'a ka mma l'iphe-ememe dụkwapho. Teke eetsukpọshi etsukpọshi dụ; teke aakpụ-li akpụ-li dụkwapho.

⁴ Teke aara ẹkwa dụ; teke aachị ọchi dụkwapho. Teke aagụ aphụ dụ; teke eete ebvu dụkwapho.

⁵ Teke eetuphashị mkpuma etuphashị dụ; teke aatụtukobe mkpuma atụtukobe dụkwapho. Teke aanma akpa dụ; teke eesela onwonye azụ dụkwapho.

⁶ Teke aachọ iphe achọcho dụ; teke aamị ẹnya l'iphe dụkwapho. Teke aakwakọbe iphe akwakọbe dụ; teke eetupha iphe etupha dụkwapho.

⁷ Teke aalajashị iphe alajashị dụ; teke aagbakwa iphe agbakwa dụkwapho. Teke aanọdu nggujingguji dụ; teke eeye ọnu l'opfu dụkwapho.

⁸ Teke eeye obu dụ; teke aadụ ashị dụkwapho. Teke aalwụ ọgu dụ; teke nchị-adụ-doo dụkwapho.

⁹ ?Bụ gụnu bẹ onye akanya erita l'akanya, oose?

¹⁰ Mu hụmawaru ivu, Chileke boru ndiphe.

¹¹ O deru ẹnya lẹ mini mee iphemiphe; ọ nọdu l'ògè iya. Ọ bya emee amadụ g'ọ rịje k'ojejoje. Ọle amadụ ta adụdu ike maẹberu iphe, Chileke meru e -shi l'ishi jeye l'ẹka ọ bvụru.

¹² Ọphu mu maru bụ l'ọ tọ dụdu iphe, kabarụ amadụ ree; abụdu g'ẹhu tsọje iya ụtso; l'oome iphe, dụ ree teke ọ nọ ndzụ.

¹³ G'onyemonye rije g'ọ dụ iya ngụje g'ọ dụ iya; akanya, oose eji iya ẹpho. Ọo ono bụ iphe-ọma, Chileke eme.

¹⁴ Iphe, mu maru bụ l'iphemiphe, Chileke eme a-nọ ojejoje. Ọ tọ dụdu iphe, ee-yekwa iya eyekwa; ọphu ọ dụdu iphe, ee-wofu iya ewofu. Iphe, o gude mee ya nno bụ g'amadụ hụmaje iya tsụa yẹbe Chileke ebvu.

¹⁵ L'iphemiphe, dụ nụ shikpọo dụhawaa. Iphe, l'e-mechaa dụ nụ shikwaphọ dụhawaa. Ọ bụru Chileke e-me g'a nyata iphe, a zọharu azọha.

Ẹjo-ememe, jiru mgboko

¹⁶ Mu byakwa ahụma iphe ọzo lẹ mkpula ẹnyanwu-a: L'ẹka e gege anọdu kpee ikpe, pfụru nhamụnha bẹ a gbẹ nọdu eme ẹjo-iphe; ẹka e gege anọdu eme iphe, pfụru ọto bẹ a nọkwapho eme ẹjo-iphe.

¹⁷ Mu bya arịa l'ime obu mu sụ: “Chileke e-mechakwaa tụko ndu pfụberekoto mẹ ndu ẹjo-iphe kpee ikpe; kẹle iphemiphe nweru ògè; mbụ l'iphemiphe, eeme ememe nweru ògè teke eemeje iya.”

¹⁸ Mu byakwa arịa ọzo sụ: “Chileke ahụjekwa nemadzụ ama gude goshi phẹ l'ẹphe l'anụ-ẹgbudu bụ iphe lanụ.

¹⁹ Ọo iphe, eme nemadzụ emekwaphọ anụ-ẹgbudu; mbụ l'ọo iphe, swiru anụ-ẹgbudu swiru nemadzụ. Ọo g'ọnwu egbu ọphuu bụ g'oogbu ọphuu; ọ bụru g'ọphuu atụ unme bụ g'ọphuu atụ. Ọ tọ dụdu iphe, nemadzụ nweru gude ka anụ-ẹgbudu. Iphemiphe tụkoru bụru iphe-mmanụ.

²⁰ G'ẹphe ha tụkoru ala ẹka lanụ. G'ẹphe ha tụko shi l'ẹja; ọ bụru l'ẹja bẹ ẹphe tụkoru ala.

²¹ ?Bụ onye maru mẹ maa nemadzụ alajẹepho l'eli eviya; k'anụ-ẹgbudu nọdu alajẹ l'alị?”

²² Mu hụma l'ọ tọ dụdu iphe, kabarụ nemadzụ ree, abụdu g'akanya, oose tsọ iya ụtso; kẹle ọwa iya bụ okiphe iya. Kẹle-a; ?bụ onye sụru iya eduphu azụ g'ọ bya ahụma iphe, l'e-mechaa nwụa l'okotazụ iya?