Nahumu 3 - BAYỊBURU Izii

¹ Aphụ a-tsọru gụbe mkpụkpu mee ono, bụ iphe, jiru iya nụ bụ adzụ ụka; yẹle iphe, a natarụ lẹ nfụ; ọphu ọ dụdu teke ịinoduje g'i ti nweru iphe, a kwatarụ l'ọkwata.

² Ngabẹnu nchị nụma g'ẹchachi ada swịiswiiswii. Tẹme ọkpa ụgbo-ịnya nọdu ezekwapho igiji nkiya. Ịnya nọdu apfụ karagidimu karagidimu karagidimu. Ụgbo-ịnya nọdu agbagbaa kẹ kwaakwaakwaa.

³ Ndu ojọgu, agba l'ịnya agbaakwa abya k'ọgu. Ogu-echi nọdu aha swooswooswoo; arwa nọdu ezigbaa phaaphaaphaa. Ndu e gburu l'ọgu dụ igwerigwe; ndu nwụhuru anwụhu kụru l'ikpo l'ikpo. Odzu nemadzụ bụru agụta agụta; ndiphe nọdu evuko odzu evuko.

⁴ Ọ bụru iphe, kparụ iphemiphe ono bụ lẹ nwanyị-ovuọba ono menụkaru kẹ nwoke; kẹle ọomashi mma ike; tẹme ọ bụru nwanyị, agwọshi nshi ike; onye egudeje eme kẹ nwoke ree ọha, dụ iche iche; mbụ gude nshi, ọogwo ree ipfu, dụ igwerigwe.

⁵ Chipfu, bụ Ọkalibe-Kakọta-Ike epfukwa sụ: “Hụmanu! Mu nọkwaru ngu lẹ njọ! Mu a-jịkwa ngu uwele; chịta igburọnu uwe ngu wụshi ngu l'atatiphu. Mbụ lẹ mu e-me g'ọha l'ophu hụma ngu l'ẹka ị gba ọto. Alị-eze ndiphe l'ophu ahụma ngu l'ẹka iphere guderu ngu.

⁶ Mu e-woru iphe, dụ ẹjo-adụdu tụa ngu. Mu eworu ngu mee iphe, a-dụ ẹhu-eswe ẹhu-eswe; woru ngu mee iphe, aa-byajẹ ahụma ahụma.

⁷ Iphe, bụkpoo ndu hụmaru ngu nụ a-nọdu agbaru ngu ọso. Ẹphe atụko epfu sụ: ‘Ninive bụakwaa ochobu! ?Bụ onye a-gụ aphụ iya? ?Bụ awe bẹ mu a-hụma onye a-nọdu adụ ngu obu?’ ”

⁸ ?Ị ka mkpụkpu Tebẹsu ọkpehu; mbụ mkpụkpu ono, nọ l'agụga ẹnyimu Nayịlu; mini nọ-phee ya mgburugburu? Ọ bụru eze-ẹnyimu bẹ o shi egudeje gbobuta onwiya; mini, nọ l'ẹnyimu ono bụru igbulọ nọ-phee ya mgburugburu.

⁹ Ndu Kushi yẹle ndu Ijiputu bụru phẹ bụ agbarike iya; ọphu ike abvụjedu phẹ abvụbvu. Ndu Putu ẹphe lẹ ndu Libiya yịru lẹ ndu eyeru iya ẹka.

¹⁰ Ọle e mechalẹru-a kpụa ya lẹ ndzụ; ẹphe je eburu l'alị ndu ọzo. Ụnwu phẹ, a nwụru k'ọphuu bẹ e gburu pyaapyaa tụkaa lẹ mgbakata-ụzo. A tụa ido gude kee ndibe phẹ, bụ ndu a maru ẹpha phẹ. Unwoke phọ, shi bụru ndu parụ ẹka apaa bụkotaru ndu e mechaarụ tụshia ẹgbirigba.

¹¹ Gụbedua kwaphọ bẹ mẹe e-mechakwaa tsụahaa. Ii-mechakwaa wata edomi onwongu edomi; mbụ wata achọ ẹka ịi-nọdu zee ndzụ gẹ ndu ọhogu ngu ta adụ iphe, ẹphe e-me ngu.

¹² Iphe, bụkpoo ụlo, ị kpụshiru ike a-dụkotakwa g'oshi figu, mịgbaaru mebyi mbụ, vuru ụzo chashịa. A -nmaa ya yigayiga; mebyi iya ono esweshihu dalahụchaa l'ọnu ndu e-ri iya nụ.

¹³ Lewarọ ndu ojọgu ngu g'ẹphe dụgbaa g'ụnwanyi! Ọnu-abata alị ngu gheru karaphoo gẹ ndu ọhogu ngu wụbata. Ọku tsuwaru mgbọrígwè, e shi gude tụ-chia ya atụ-chi.

¹⁴ Kukwaa mini kukọbe m'ọbvu teke ndu ọhogu ngu a-bya anọ-phee ngu mgburugburu! L'i mee g'ụlo ngu, a kpụshiru ike kabaa eshihu ike! Ghaa ẹja-ụlo; yọo bụloku; l'i mekwaa iphe, e gude ayọ bụloku!

¹⁵ Ọ kwa ẹka ono bẹ ọku a-nọdu tsua ngu; ogu-echi asụa ngu pyaapyaa g'ẹka igube ata iphe pyaapyaa. Zakwaa igwerigwe g'ogu; zakwaa g'igube!

¹⁶ I mewaru gẹ ndu azụru ngu aswa akabaa igwerigwe jasụ ẹphe ka kpokpode, nọ l'igwe igwerigwe; obenu l'ẹphebedua zebataru g'igube bya agbabẹ alị ono l'ophu ẹka ọto; ọ bụru phẹ eje iphe, ẹphe eje.

¹⁷ Ndu-ishi ngu dụepho g'igube; mbụ lẹ ndu ederu ngu ẹkwo dụepho g'igube, etsu gbiigbiigbi, jeru je ebegbaaru l'eli igbulọ mbọku, oyi atsụ; anwụ -chifuẹpho; ẹphe phekashịhu; ọphu ọ dụdu onye maru ibiya ọphu ẹphe ephe ala.

¹⁸ Gụbe eze ndu Asiriya; ndu echeru ngu atụru ngu bẹ mgbẹnya tụru; ọphu ndu nweru ẹnya l'alị-eze ngu adụdu iphe, ẹphe meru. Ndibe ngu bẹ a chịakwaru; ẹphe gbaa nanụ nanụ l'eli úbvú úbvú; ọphu ọ dụdu onye jeru achịkobe phẹ.

¹⁹ Ọ́nyá, aba ngu nụ ta adụkwa iphe, adụ ike eme g'ọ kpọhu. Iphe, e mekarụ ngu bẹ ọ́nyá iya atụkwa rikarika. Iphe, bụkpoo onye nụmaru g'ọonwuru ngu akụjekwa ẹka kpaa l'ọo gụbedua daru adada; kẹle-a; ?bụ onye bẹ ẹjo-ememe, ịinoduje eme ebutaadaru?