Mbụlembu 49 - BAYỊBURU Izii

Jiékọpu agọ ọnu-ọma anụ ụnwu iya

¹ Noo ya; Jiékọpu bya ekua ụnwu iya; sụ phẹ: “Unu dzukọbe gẹ mu kọoru unu iphe, a-nwụru unu l'atatiphu!

² Unu dzukọbe bya angabẹ nchị; unubẹ ụnwu Jiékọpu! Unu ngabẹru nna unu, bụ Ízurẹlu nchị!

³ Rúbẹnu; ọo gụbedua bụ ọkpara mu; bya abụru ike mu; mbụ l'ị bụ nwa ivuzọ, mu nwụru teke ike dụ mu. Ọo ngu bẹ a kachaa akwabẹ ùbvù; bya abụru ngu bẹ kakọta ọkpehu.

⁴ Eshinu ịinoduje atụ kpereree g'akpara-mini l'eme iphe, erwubeduru ngu nụ; bẹ ị tịi kaẹdu ndu ọphuu shii; noo kẹle ị zẹru l'iphe-azẹe nna ngu; mbụ je eworu iphe, mu azẹje azẹe merwua.

⁵ Simiyọnu; waa Lívayi bụ unwune. Ẹphe egudeje ogu-echi phẹ emekpa ndu ọzo ẹhu.

⁶ Mu ta abyakwa ayịru l'ìdzù, ẹphe achị; ọphu mu abyakwa anọdu l'echilabọ phẹ; noo kẹle ẹphe gude ẹhu-eghu gbushia nemadzụ; bya egbubushia oke-eswi akwara azụ ọkpa k'iwashị.

⁷ G'ẹhu-eghu phẹ vuru ọnu; noo kẹle ooghughajẹru phẹ ẹka. G'obu-ọku phẹ vuru ọnu; noo kẹle ọopanukaje phẹ ẹka l'ẹhu. Mu a-chịkashi-dzuru phẹ l'alị Jiékọpu; mbụ dokashidzuru phẹ l'alị Ízurẹlu l'ophu.

⁸ Jiuda; ụnwunna ngu a-nọduje ekele ngu ekele. Ẹka ngu a-zụchaa ndu ọhogu ngu l'ẹkpiri kẹ pfụurii. Ụnwunna ngu g'ẹphe ha ephozeru ngu.

⁹ Gụbe Jiuda bụ nwa oduma ẹgbara. Gụbe nwa mu; i shiwaa l'ẹka i gbushiru iphe, i riru lwa. Nta-a bẹ o gbushiwaru ikpere zẹ azẹe g'oduma; mbụ g'akahụ oduma; ?bụ onye sụru iya ekute?

¹⁰ Jiuda ta abụ-buhuduru eze abụ-buhu; ọphu mgbọro-eze ono abyadụ alụfu iya alụfu lẹ mgbaka ọkpa; gbiriri jasụ teke onye ọ kụru ishi l'ẹka a-bya. Ọ -byaẹpho bẹ ọha l'ophu a-ngabẹru iya nchị.

¹¹ Nkapfụ-ịgara iya bẹ oo-libeje lẹ vayịnu. Nwa nkapfụ-ịgara iya bẹ oo-libeje l'ẹkali vayịnu ono ọphu mịshiru mebyi kẹ wọgalaa. Ọo-sajẹ uwe iya lẹ mini akpụru vayịnu. Akpụru vayịnu ono, enwuje kẹ pfụu gẹ mee ono bẹ oo-gudeje asa akpawuru-uwe iya.

¹² Mẹe e-me; ẹnya achaa ya vaa. Ẹra-eswi emee; eze acha iya phuuphuu.

¹³ Zebulọnu bẹ e-buru lẹ mgboru eze-ẹnyimu. Agụga ẹnyimu iya a-bụru ọdu ụgbo-mini. Oke alị iya e-jerwu Sayịdonu.

¹⁴ Isaka bụ nkapfụ-ịgara, ọkpehu dụ; mbụ gude ẹda labọ, a nmakoberu iya l'okpurukpu zẹ azẹe.

¹⁵ Ọ hụmaepho g'ẹka oodzu ike dụ-be ree; waa g'alị iya ono dụ-be guu; o phozeta nmakota ivu-ẹrwa iya jikoru l'ukuvu; bya ejeahaa ozi, e kebutaru iya g'o je.

¹⁶ Danu bẹ a-nọduje ekpe ndu nkiya ikpe, pfụru ọto; mbụ ẹgube ono, ọkpa-ipfu Ízurẹlu ndu ọphuu ekpeje iya phọ.

¹⁷ Danu a-dụ g'agwọ, nọ l'agụga ụzo; mbụ g'ogiji, nọ l'agụga gbororo, abụjeru: Ọ -taa ịnya l'ichirupfu ọkpa l'ọ tụfu onye agba iya nụ l'azụ.

¹⁸ Gụbe Chipfu; mu ele ẹnya teke ịi-dzọta mu.

¹⁹ Gadu bẹ ndu ọ-lwụa-ọlaa a-dapfu; ọle ọoghakobe chịpyabe phẹ.

²⁰ Asha bẹ a-nọdu akọ ọkpobe nri. Nri, ọo-nọdu akọ bụ nri, atsọ ụtso, gbaru ndu eze l'eriri.

²¹ Nafụtali bụ ele, agbaphe g'ọ dụ iya. Ọonwuje nwa, ama ntụmatu.

²² Jiósẹfu bụ vayịnu, amịje ntụmatu; ọ bụ vayịnu, nọ-kube mgboru ẹka mini dụ, amịje mebyi shii. Ẹkali iya baa ụba tụko igbulọ sweta.

²³ Ndu ọgba-apfụ gude ẹhu-eghu byapfuta iya ọgu. Ẹphe gbaru iya apfụ; shi nno mekpaa ya ẹhu.

²⁴ Ọle apfụ iya keẹrupho jịngujingu g'o keru; tẹme e mee ọkpu ẹka iya; o shihu ike. Ọ bụru shita l'ike k'onye bụ Ọkalibe kẹ Jiékọpu; mbụ onye ono, bụ onye-nche; waa onye mgbobuta kẹ Ízurẹlu.

²⁵ Onye ike ono shi l'ẹka bụ Chileke kẹ nna gụbe Jiósẹfu, bụ onye eyejeru ngu ẹka; mbụ onye ono, bụ Ọkwoolemkpa, bụ onye emejeru ngu iphe-ọma. Oomejeru ngu iphe-ọma ọphu shi l'imigwe; bya emejekwaru ngu phọ iphe-ọma ọphu shi lẹ mini ime-alị. Tẹme ọ bụru iya bụ onye egudeje nwa; waa eche nwa ẹra meeru ngu iphe-ọma.

²⁶ Ọnu-ọma ọphu nna ngu gọru ngu kakwa k'oke-úbvú ndiche shii; mbụ l'ọ kakwa iphe-ọma ọphu úbvú, shi teke ndiche nọduta anụje shii. G'iphe-ọma ono g'ọ hakọta bụkwaru kẹ Jiósẹfu; mbụ g'ọ bụkotakwaru kẹ yẹbe onye ono, a họfutaru l'echilabọ unwune iya dobe iche ono.

²⁷ Benjiaminu bụ ẹjo-nkụta-ọswa, ẹgu alabushi akụrepho. O -rwua l'ụtsu l'o gbua iphe taa. O -rwua l'ụzenyashi l'o kee iphe, ọ lwụtaru l'ọgu.”

²⁸ Ndu ono bụkota ọkpa-ipfu Ízurẹlu ẹphe n'iri l'ẹbo. Tẹme iphe ono bụkotaru iphe, nna phẹ pfuru yeru phẹ teke o gọru phẹ ọnu-ọma. Ọ gọerupho onyenọnu ọnu-ọma, rwuberu iya nụ.

Anwụhu Jiékọpu

²⁹ Noo ya; ọ bya ekeru ekpe nụ phẹ sụ: “Mu abyawaa alapfu ndiche mu phẹ. Unu likwa mu l'ẹka e liru nna mu phẹ l'ọgba, nọ l'alị Ẹfuronu, bụ onye Hetu.

³⁰ Ọgba ono yẹle alị ono nọ l'alị Makupela ono, nọ lẹ mgboru Mamure l'alị Kénanu; bẹ Ébirihamu zụtaru l'ẹka Ẹfuronu onye Hetu dobe; g'ọ bụru ẹka ee-lije odzu.

³¹ Ọ bụru ẹka ono bẹ e liru Ébirihamu; yẹe nyee ya, bụ Sera; tẹme e likwaphọ Áyizaku; yẹe nyee ya, bụ Ribeka l'ẹka ono; tẹme mu bya elia Lii l'ẹka ono.

³² Alị ono yẹe ọgba, nọ iya nụ bẹ a zụru ndu Hetu.”

³³ Jiékọpu keghechaẹpho ekpe nụ ụnwu iya; bya azẹ-zeta azẹe; tụa unme ikpazụ; ọ bụru iya alapfu ndiche iya phẹ.