Mbụlembu 11 - BAYỊBURU Izii

Ụlo-eli Babẹlu

¹ Ụnwu-eliphe l'ophu shi epfukọta opfu-alị lanụ, a nụ-dzuru.

² Noo ya; o be teke ndiphe kwasẹru ụzo ẹnyanwu-awawa; ẹphe je ahụma nsụda lẹ Shịna; ẹphe je ebukọbe l'ẹka ono.

³ Ẹphe sụ nwibe phẹ: “Unu bya g'anyi kpụa ẹja hụa ya l'ọku hụ-ghee ya ahụ-ghe.” Ọ bụru ẹja akpụkpu bẹ nọ-chiru phẹ ẹnya mkpuma; ẹphe wụa ya korota g'ọ bụru ọtu-paa.

⁴ Ẹphe sụ: “Unu bya g'anyi metaru onwanyi mkpụkpu; g'anyi kpụa ụlo-eli, e-je asupfuru l'igwe. Ọo ya bụ; g'anyi abụru ndu aa-maru ẹpha phẹ; g'anyi te je agbakashịhu dzuru mgboko.”

⁵ Tọbudu iya bụ; Chipfu bya enyizeta g'ọ hụma mkpụkpu ono; yẹe ụlo-eli ono, ụnwu-eliphe akpụ ono;

⁶ bya asụ: “Ndu-a bụkwa nanụ; bya epfukọta opfu-alị lanụ; ẹphe wata eme iphe, dụ ẹgube-a. O to nwekwa iphe, ẹphe chịru idzu ememe g'ẹphe te emegha iya.

⁷ Unu g'anyi nyizeta je aghaa phẹ olu-opfu; g'iphe, nwibe phẹ epfu te edojehẹ phẹ ẹnya.”

⁸ Ọo ya bụ; Chipfu bya achịkashia phẹ; ẹphe dzuru mgboko; ẹphe parụ akpụ mkpụkpu ono haa.

⁹ Noo iphe, meru g'o gude e kua ya Babẹlu; noo kẹle ọo ẹka ono bẹ Chipfu ghashịru opfu ụnwu-eliphe l'ophu. O shi l'ẹka ono chịkashia phẹ; ẹphe dzuru mgboko.

E shi lẹ Shemu jasụ lẹ Ebiramu

¹⁰ Waa oshilọkpa Shemu. A nọepho mgbarapha labọ g'utso byachaaru ono; Shemu nwụta Afakusadu. Teke ono bẹ Shemu nọwaru ụkporo apha ise tẹme ọ nwụta Afakusadu ono.

¹¹ Ọ nwụchaa Afakusadu; bya anọfua ụnu apha l'ụkporo apha ise. Ọ nwụshikwapho unwoke yẹe ụnwanyi tsobe Afakusadu.

¹² Afakusadu bya anọo ụkporo apha l'apha iri l'ise; bya abụru nna Shela.

¹³ Ọ nwụchaa Shela; bya anọfua ụnu apha l'apha ẹto. Ọ nwụshikwapho unwoke yẹe ụnwanyi tsobe Shela.

¹⁴ Shela bya anọo ụkporo apha l'apha iri; bya abụru nna Eba.

¹⁵ Ọ nwụchaa Eba; bya anọfua ụnu apha l'apha ẹto. Ọ nwụshikwapho unwoke yẹe ụnwanyi tsobe Eba.

¹⁶ Eba bya anọo ụkporo apha l'apha iri l'ẹno; bya abụru nna Pẹlegu.

¹⁷ Ọ nwụchaa Pẹlegu; bya anọfua ụnu apha l'ụkporo apha l'apha iri. Ọ nwụshikwapho unwoke yẹe ụnwanyi tsobe Pẹlegu.

¹⁸ Pẹlegu bya anọo ụkporo apha l'apha iri; bya abụru nna Rewu.

¹⁹ Ọ nwụchaa Rewu; bya anọfua ụkporo apha iri l'apha tete. Ọ nwụshikwapho unwoke yẹe ụnwanyi tsobe Rewu.

²⁰ Rewu bya anọo ụkporo apha l'apha iri l'ẹbo; bya abụru nna Sérugu.

²¹ Ọ nwụchaa Sérugu; bya anọfua ụkporo apha iri l'apha ẹsaa. Ọ nwụshikwapho unwoke yẹe ụnwanyi tsobe Sérugu.

²² Sérugu bya anọo ụkporo apha l'apha iri; bya abụru nna Nahọ.

²³ Ọ nwụchaa Nahọ; bya anọfua ụkporo apha iri. Ọ nwụshikwapho unwoke yẹe ụnwanyi tsobe Nahọ.

²⁴ Nahọ bya anọo ụkporo apha l'apha tete; bya abụru nna Tera.

²⁵ Ọ nwụchaa Tera; bya anọfua ụkporo apha ise l'apha iri lẹ tete. Ọ nwụshikwapho unwoke yẹe ụnwanyi tsobe Tera.

²⁶ Tera bya anọo ụkporo apha ẹto l'apha iri; bya abụru nna Ebiramu; waa Nahọ; waa Haranu.

²⁷ Waa oshilọkpa Tera. Tera bụ nna Ebiramu; waa Nahọ; waa Haranu. Haranu bụru nna Lọtu.

²⁸ Nna iya, bụ Tera nọdukwadu ndzụ; Haranu nwụhu lẹ mkpụkpu Uru l'alị Kaludiya, bụ ẹka a nwụru iya.

²⁹ Ebiramu yẹe Nahọ bya atụko lụa nwanyị. Ẹpha nyee Ebiramu bụ Serayi; ẹpha nyee kẹ Nahọ bụru Milika. Onye nwụru Milika bụ Haranu; ọ bụkwarupho Haranu ono nwụru Isuka.

³⁰ Ọphu Serayi anwụtaduru nwa; noo kẹle ọ tọo tsụdu ime.

³¹ Noo ya bụ; Tera duta nwa iya, bụ Ebiramu; waa nwanwa iya, bụ Lọtu, bụ nwatibe Haranu; bya edutakwaphọ nyee nwa iya, bụ Serayi; bụ iya, bụ nyee Ebiramu. Ẹphe tụko swịru shi lẹ Uru, nọ l'alị Bábilọnu jeshia Kénanu. Obenu l'ẹphe rwuẹrupho Haranu; ẹphe buru l'ẹka ono.

³² Tera nọepho ụkporo apha iri l'apha ise; ọ nwụhu lẹ Haranu.