Mayịka 4 - BAYỊBURU Izii

Ẹhu-guu ojejoje

¹ Sụ-a; o -rwua teke ikpazụ bẹ ee-me g'eli úbvú ono, a kpụru eze-ụlo Chileke ono ngụru angụru; mee ya l'ọ bụru iya a-kachaa shii l'iphe, bụkpoo úbvú ọzo nọgbaa nụ. Mbụ l'ee-me iya g'ọ kakọta úbvú ọzo l'eli. Noo teke ndiphe a-nọdu awụ awụ-pfu iya.

² Ikpoto ọha a-bya bya asụ: “Unu bya g'anyi je l'eli úbvú kẹ Chipfu! Unu g'anyi je l'ụlo kẹ Chileke kẹ Jiékọpu. Ọo ya e-zi anyi ụzo iya; k'ọphu anyi a-wata etso ụzo, ọ tọru.” Noo kẹle ekemu e-shi l'úbvú Zayọnu fụta; mbụ l'opfu Chipfu e-shi lẹ mkpụkpu Jierúsalẹmu.

³ Ọo ya e-doshi opfu, dụgbaaru ikpoto nemadzụ. L'ọ bya edoshiaru ọha, ike dụgbaa, bugbaa ụzenya ụzenya opfu, dụru phẹ nụ. Ẹphe e-woru ogu-echi phẹ kpụkwaa l'ọ bụru ọgu; woru arwa phẹ kpụa l'ọ bụru mma nshịi, e gude akọcha iphe. Ọ tọ dụedu ọha, a-patakwadu ogu-echi ejepfu ọhozo ọgu; ọphu ẹphe anwụedu alwụ ọgu ọzobaa.

⁴ Onyemonye a-nọduje lẹ mkpula vayịnu nkiya; mẹkwapho lẹ mkpula oshi figu nkiya; ọphu ọ dụdu onye byaru eye phẹ ebvu; kẹle ọ kwa Chipfu, bụ Ọkalibe-Kakọta-Ike eepfu iya.

⁵ Ọhamoha ọzo g'ẹphe ha a-nọdukwaro ejegbaa l'ọbvu; agwa nshi phẹ; obenu l'anyịbedua bụ onye anyi e-gude ẹpha iya eje bụ Chipfu, bụ Chileke anyi jasụ l'ojejoje.

Iphe, Chipfu chiru k'ememe

⁶ Wakwa iphe, Chipfu epfu baa: “O -rwua mbọku ono bẹ mu a-chịkobe ndu ẹniyeni; mu achịkobe ndu a chịfuru l'alị phẹ; yẹe ndu mu meru; ẹphe je iphe-ẹhuka.

⁷ Ndu ẹniyeni bẹ mu e-me g'ẹphe bụru ndu warụ nụ. Mu emee ndu a chịfuru l'alị phẹ g'ẹphe bụru ọha, ike dụ. Ọ bụru Chipfu a-bụru eze phẹ l'eli úbvú Zayọnu e -shi mbọku ono jasụ l'ojejoje.

⁸ “A -bya lẹ gụbe nwada Zayọnu, bụ ẹka a nọ eche ndu Ízurẹlu g'onye eche atụru-a; bya abụru ẹka ndu Ízurẹlu agbabajẹ je ezeeru ndzụ; ii-mechaa bụru ishi g'i shi bụru teke ndiche; mbụ l'abụru eze e-mechaa rwubebaa gụbe nwada Jierúsalẹmu ọzobaa.

⁹ ?Bụ gụnu kparụ iphe, ịira ẹkwa? ?Ti nwehẹdu onye eze tọo? Onye akpọ-ziru ngu ụzo; ?ọ lawarụ l'iswi tọo? mbụkwanu meru g'o gude iphe-ẹhuka gudeshia ngu gẹ nwanyị, ime eme.

¹⁰ Gụbe nwada Zayọnu; nọdunu chi gburugburu gẹ nwanyị, ime eme; kẹle nta-a bẹ ịibyakwa aha ọma mkpụkpu-a je akwaa l'ọma ẹgu. Ii-je alị ndu Bábilọnu. Ọ bụru ẹka ono bẹ aa-nafụta ngu. Ọo l'ẹka ono bẹ Chipfu a-gbata ngu l'ẹka ndu ọhogu ngu.

¹¹ Nta-a bẹ ikpoto ọha, dụ igwerigwe chịkoberu onwophẹ bya etsoo ngu ọgu. Ẹphe nọdu epfu sụ: ‘G'a tụrwua ya! G'anyi chịru ẹnya yeru Zayọnu!’

¹² Obenu l'ẹphe ta amadụ iphe, bụ ọriri Chipfu. Iphe, ọ chịru idzu k'ememe te edoduru phẹ ẹnya; mbụ onye ono, chịkoberu phẹ g'onye chịkoberu balị eje echichi ono.

¹³ “Gbalihu chia balị; gụbe nwada Zayọnu; kẹle mu e-me g'i fua mpu-ígwè. Ichirupfu-ọkpa ngu abụru onyirubvu. L'ị zọo ikpoto ọha tọlitoli. L'i woru urwu ono, ẹphe ritaru l'ẹregede ono woru ye Chipfu l'ẹka; mbụ woru ẹku phẹ ono nụ Nnajịuphu ono, nwe mgboko l'ophu.”