Luku 1 - BAYỊBURU Izii

¹ Eshi ọphu a dụwaa igwe wata ede akọ k'iphe, meẹbekpooru l'echilabọ anyi ono l'ẹkwo;

² ọ bụerupho g'a kọru iya anyi; mbụ ndu shi lẹ mbụ bụru ndu hụmaru l'ẹnya mechaa bya abụru ndu ejeru opfu Chileke ozi; bụ gẹ ndu ono edegbaa;

³ bẹ ọ dụkwa mu phọ ree; onye ẹguru, bụ Tiyọ́filosu; gẹ mu tọoru ngu iphe, meru nụ l'ọkpa iya l'ọkpa iya; eshinu mu tọru nwẹhu nwụkota iphemiphe ono, daru nụ ono eshikpọo lẹ mbụ.

⁴ Iphe, mu ede bụ g'ị kwatakpọo maru ọkpobe-opfu ono, e gude ọnu zia ngu ono.

Ozi kẹ l'aa-nwụ Jiọnu, onye emeje baputizimu

⁵ Teke Herọdu bụ eze ndu Jiudiya bẹ ọ dụru onye ẹpha iya bụ Zakaráya, onye uke Chileke. O shi l'ẹkali ọgbo uke kẹ Abáyijia. Ọ lụru nwanyị, shi l'ọkpa-ipfu Erọnu, bụkwapho ọkpa-ipfu ndu-uke Chileke. Ẹpha nwanyị ono bụ Elízabetu.

⁶ Ẹphenebo tụkoru bụru ndu pfụberekoto l'iphu Chileke; emeẹbekota ekemu Chileke g'ọ ha bya etsokọtakwapho nsọ Chileke g'ọ ha. Ẹphe te emejeduru iphe, a tarụ phẹ ụta.

⁷ Ọ bụepho l'ẹphe lụru kahụ; ọphu ẹphe anwụtaduru nwa; kẹle Elízabetu ta atsụdu ime.

⁸ Tọbudu iya bụ; Zakaráya nọdu eje ozi uke iya l'iphu Chileke; kẹle ozi uke rwuberu ẹkali ọgbo uke nkephẹ.

⁹ A tụru ido, bụ nsọ, dụru phẹ nụ; ọ daaru iya l'abahụ lẹ mkpuru l'ẹka ẹnya ẹka eegwejeru Chileke ngwẹja nọ je egwee ngwẹja ụ̀nwù-isẹnsu, ẹnwuru iya eshi kwẹekweekwee.

¹⁰ Ikpoto ndu ono l'ophu tụko kụru l'etezi epfu anụ Chileke g'ọ gbaru teke eeyeje ọku l'ụ̀nwù-isẹnsu ono.

¹¹ Ojozi-imigwe, shi l'ẹka Nnajịuphu chaa Zakaráya l'iphu bya anọdu l'ẹkutara ọru-ngwẹja ono.

¹² Meji tsukaha Zakaráya g'ọ hụmaru iya. Ndzụ wata iya agụgu.

¹³ Ojozi ono sụ iya: “Gẹ ndzụ ba agụshi ngu Zakaráya; kẹle opfu, i pfuru nụ Chileke tụbawaru iya lẹ nchị. Nta-a bẹ Elízabetu, bụ nyee ngu l'a-nwụtaru ngu nwa-nwoke. Iphe, ịi-gụ iya bụ Jiọnu.

¹⁴ Ọo ya bụ g'ẹhu atsọo ngu; l'i tee ẹswa; l'a-dụ igwerigwe tee ẹswa mẹ a -nwụe ya phọ.

¹⁵ Kẹle ọo-bụru onye nweru ẹnya l'iphu Nnajịuphu, bụ Chileke; tẹme ọ tọo ngụkwa mẹe; ọzoo iphe, aangụ angụngu, bụ iphe, atsụ atsụtsu. Unme Chileke bẹ e-shi l'ẹpho ne iya buru iya l'ẹhu.

¹⁶ Igwerigwe ụnwu Ízurẹlu bẹ oo-me g'ẹphe dakọbe jepfu Nnajịuphu, bụ Chileke phẹ.

¹⁷ Ọo ya bụ onye e-gude Unme Chileke; gude ike, dụ gẹ kẹ Elayịjia, onye mpfuchiru Chileke vuru Kéreshi ọbu ụzo je akwakọberu iya ẹka. Ọo-gọ-zetaru ụnwegirima obu nna phẹ. Ọo-gọta ndu bụ 'anụ-lẹ-nchị gọru ye l'ụzo ọkwa-ẹnya, ọphu ndu pfụberekoto etso; g'ee-shi g'oo-dozikwarụpho Nnajịuphu ono ndu bụ ndu a-kwakọberu abyabya iya.”

¹⁸ Zakaráya sụ ojozi-imigwe ono: “?Dẹnu gẹ mu e-shi maru l'iphemiphe-a bụ ọkpobe-opfu; l'ẹka mu kahụwaru; tẹme nyee mu kahụakwapho?”

¹⁹ Ojozi-imigwe ono sụ iya: “Ọ kwa mbẹdua bụ Geburẹlu; onye anọje l'iphu Chileke. Ọ kwa Chileke ziru mu gẹ mu bya epfuru yeru ngu; zia ngu ozi-ọma-a;

²⁰ ọphu i kwetadụru l'opfu, mu pfuru bẹ a-vụ gẹ mu pfuru iya. Hụma ahụma; lẹ nta-a bẹ ọnu a-bụru ngu kpụrukudukuu. I tii pfubaẹdu opfu jasụ mbọku, iphemiphe-a a-vụkota. Opfu mu a-vụkotakwa l'o rwuberu iya.”

²¹ Igwe ọha kụru eche Zakaráya; ọphu ẹphe amadụ iphe, meru iphe, ọono ọdu l'ime eze-ụlo Chileke ono.

²² Ọ fụtashia; ọphu ọ dụedu ike pfuru opfu yeru phẹ; ẹphe maru l'ọ phụru ọphulenya l'ime eze-ụlo Chileke; ọphu o pfuẹdu opfu. Ọ bụwaru ẹka bẹ oogudeje epfu opfu.

²³ Eswe ozi uke iya -bvụepho; ọ lashịa ibe iya.

²⁴ A nọnya; nyee ya, bụ Elízabetu tsụta ime. Ọ nọkota l'ụlo mkpụrumkpuru ọnwa ise.

²⁵ Ọ sụ: “Nta-a bẹ Nnajịuphu lecharu mu ẹnya bya eshia ụzo, dụ ẹgube-a nafụ mu iphere l'iphu ndiphe.”

Ozi, eezi; l'aa-nwụ Jizọsu

²⁶ O be l'ọnwa, kwe Elízabetu ọnwa ishii, ọ tsụtaru ime; Chileke byakwa ezia ojozi-imigwe, bụ Geburẹlu g'o je Nazaretu l'alị Gálili

²⁷ je ezia nwamgbọko ozi. Ẹpha nwamgbọko ono bụ Meri. Nwamgbọko ono bẹ yẹe nwoke teke akwaswee. Onye eje iya alụlu bụ nwoke, ẹpha iya bụ Jiósẹfu. Nwoke ono bụ onye ọnu-ụlo onye eze ndiche ono, bụ Dévidi.

²⁸ Geburẹlu byapfuta Meri bya sụ iya: “?Ị dụpho ya? Onye Chileke kwabẹru oke ùbvù! Nnajịuphu swikwaru ngu eswiru. Ị bụ onye Chileke gọru ọnu-ọma nụ l'echilabọ ụnwanyi l'ophu.”

²⁹ Meri nụma ekele ono; obu tsukahụ iya. Ọ rịa l'egomunggo iya sụ: “?Bụ ẹgube ekele gụnu bụ ọwa?”

³⁰ Ojozi-imigwe ono sụ iya: “Gẹ ndzụ ba agụshi ngu Meri; lẹ Chileke mewaru ngu eze-iphe-ọma.

³¹ Hụma l'ịi-tsụta ime; nwụa nwa-nwoke; iphe, ịi-gụ iya bụ Jizọsu.

³² Ọo-bụru onye nweru ẹnya. Ee-ku iya Nwa Ọkalibe-kangokọtaru-nụ. Nnajịuphu, bụ Chileke e-dobe iya l'aba-eze onye-iche iya ono, bụ Dévidi.

³³ Ọo-bụru eze ndu ọnu-ụlo Jiékọpu jasụwaruro ya; ọphu ọ bubuhuduru eze abubuhu jasụ lẹ tuutuutuu lẹ mịimiimii.”

³⁴ Meri sụ ojozi-imigwe ono: “?Dẹnu gẹ mu e-shi tsụta ime l'ẹka mu lẹ nwoke eteke akwaswee?”

³⁵ Ojozi-imigwe ono sụ iya: “Unme Chileke l'a-bya asọpyabe ngu; tẹme ike kẹ Ọkalibe-kangokọtaru-nụ l'a-bya bya emee ngu ire l'ẹhu. Ọo ya bụ; nwa ono, ịi-nwụ ono, bụ onye dụ nsọ ono bẹ ee-ku Nwatibe Chileke.

³⁶ Tẹme; lekwa abụbu ngu, bụ Elízabetu tsụtafuakwaru ime nwoke lẹ nka-a. Ọnwa ọwa kweakwaa ya ọnwa ishii; mbụ onye ono, e shi eku onye ata tsụdu ime ono;

³⁷ kẹle Chileke ta adụdu iphe, nyịru iya ẹka ememe.”

³⁸ Meri sụ: “Mu nọana-a! ?Ọ kwa lẹ mu nọwa Chileke l'ẹka. G'ọ dụnuru mu g'i pfuru.” Ojozi-imigwe ono phuhu.

Meri eje ibe Elízabetu phẹ

³⁹ E mechaa; Meri jịkobe gude ọso jeshia mkpụkpu lanụ, nọ l'alị Jiuda ẹka úbvú jiru ejiji

⁴⁰ bya abahụ l'ụlo Zakaráya bya ekele Elízabetu ekele.

⁴¹ Elízabetu nụmaepho ekele Meri; nwaswa ono mee ya ụkporo l'ẹpho. Unme Chileke kparwuta Elízabetu l'ẹhu.

⁴² Ọ raa ya arara sụ: “Onye Chileke gọru ọnu-ọma nụ bẹ ị bụ l'ụnwanyi mgburugburu; tẹme nwa ono, nọ ngu l'ẹpho ono bẹ Chileke gọkwarupho ọnu-ọma nụ.

⁴³ ?Bụ gụnu bẹ e kweru gẹ gụbedua, bụ ne Nnajịuphu mu bya ibe mu?

⁴⁴ Kẹle teke olu ekele ngu rwuru mu lẹ nchị bẹ nwaswa, nọ mu l'ẹpho pfulihuru tee ẹswa.

⁴⁵ Gụbe nwanyị; g'ẹhu tsọ ngu ụtso; kẹle i kweru l'opfu ono, shi Nnajịuphu l'ẹka rwua ngu nchị ono l'a-vụ.”

Ebvu, Meri agụ gude aja Chileke

⁴⁶ Meri sụ: “Obu mu l'ekutse Nnajịuphu.

⁴⁷ Mu nọdu ete ẹswa lẹ Onye-Ndzọta mu, bụ Chileke.

⁴⁸ Ọ gụberu mụbe nwanyị, nọ iya l'ẹka iphe; lẹ mụbe nwanyị ọphu bụ mu bẹ ẹnya kachaa alwalwa. Ọgbomogbo e-shi nta-a wata mu eku onye a gọru ọnu-ọma nụ.

⁴⁹ Ọkalibe, bụ Chileke meshiwaru mu iphe, nweru ẹpha. Ẹpha Chileke dụ nsọ.

⁵⁰ Obu-imemini, ọophujeru ndu atsụ iya ebvu eshije l'ọgbo sweru ọgbo.

⁵¹ O gudewaa ẹka iya egoshije ọkpehu iya. Ndu gude etsetse arị ọriri l'obu phẹ bẹ ọochikashije.

⁵² Ọolo-zetajẹ ndu-ishi, ike dụ l'aba-eze phẹ. Ọ nọdu ekulije ndu wozeru onwophẹ alị.

⁵³ Ndu ẹgu agụ bẹ oogudeje iphe, dụ ree zụ-jia ẹpho; l'ọ sụ ndu nweru iphe g'ẹphe gbaru ẹka laa.

⁵⁴ Ọ gbaru ndu-ozi iya, bụ Ízurẹlu mkpu; mbụ l'ọ nyatarụ phẹ; phụaru phẹ obu-imemini.

⁵⁵ Ono bụru iphe, o pfuru nna anyi oche phẹ, bụ iya bụ iphe, o pfuru Ébirihamu yẹe oshilọkpa iya g'ẹphe ha.”

⁵⁶ Meri nọ-rwua iphe, rwuru ọnwa ẹto l'ibe Elízabetu phẹ; tẹme ọ lashịa.

Anwụnwu Jiọnu, onye emeje baputizimu

⁵⁷ O rwua Elízabetu l'ezeda; ọ bya ezeda; nwụa nwa-nwoke.

⁵⁸ Obutobu iya mẹ abụbu iya phẹ; nụma ẹgube gẹ Chileke phụ-beru iya obu-imemini; ẹphe bya; ẹphe l'iya tee ẹswa.

⁵⁹ Nwaswa ono nọepho abalị ẹsaa; o rwua lẹ k'ẹsato; ẹphe bya ebua ya úbvù. Ẹphe meahaa g'ẹphe gụbe iya ẹpha nna iya, bụ Zakaráya.

⁶⁰ Ne iya sụ: “Awa-o. Ọ tọ bụkwa iya-o. Ọ kwa iphe, aa-gụ iya bụ Jiọnu.”

⁶¹ Ẹphe sụ iya: “?Ị hụmajeru abụbu unu, zarụ ẹgube ẹpha ono?”

⁶² Ẹphe bya atụaru nna iya ẹka ẹba gude jịa ya iphe, ọ dụ iya g'a gụa nwata ono.

⁶³ Ọ maa ẹka g'a nụ iya okwekpu, eedeje iphe. A nụ iya ya; o dee sụ: “Ẹpha iya bụ Jiọnu.” Ọ dụkota phẹ biribiri.

⁶⁴ Teke ono teke ono; ọnu kụhaa ya; ire tụshihu iya. O pfuahaa opfu gude jaahaa Chileke ajaja.

⁶⁵ Ndzụ rwuta iphe, bụkpoo obutobu phẹ, nụmaru iphe ono. E pfudzuru iphe ono l'úbvú úbvú ono, dụ l'alị Jiudiya.

⁶⁶ Iphe, bụkpoo ndu nụmaru iya nụ dobeẹ ya phọ l'ọkpoma phẹ; tụko epfugbaa sụ: “?Bụ gụnu bẹ nwata ọwa-a l'a-bụkpooru?” kẹle o doru ẹnya lẹ Chileke tụru iya ẹka; g'ọ bụru onye dụ iche.

Zakaráya epfuchiru Chileke

⁶⁷ Unme Chileke kparwuta nna iya ono, bụ Zakaráya l'ẹhu; ọ wata epfuchiru Chileke sụ:

⁶⁸ G'a gọru ọnu-ọma nụ Nnajịuphu, bụ Chileke Ízurẹlu; kẹle ọ kpapfutaru ndu nkiya bya agbata phẹ.

⁶⁹ O meru gẹ Onye-Ndzọta, nyịberu anyịbe fụtaru anyi l'oshilọkpa onye nọ iya l'ẹka, bụ Dévidi.

⁷⁰ Ono bụru iphe, yẹbe Chileke gbẹ l'ọnu ndu mpfuchiru iya, dụru iya nsọ lẹ teke ndiche pfua sụ

⁷¹ l'aa-dzọta anyi l'ẹka ndu ọhogu anyi waa l'ẹka ndu anyi dụ ashị;

⁷² g'ọo-phụa obu-imemini ono, ọ sụru ndiche anyi phẹ lẹ ya a-phụ ono; wafụa g'ọo-nyata ukwe-iphe, dụ nsọ, o kweru ndu nkiya.

⁷³ O rihakpọwaruro onye-iche, bụ nna anyi Ébirihamu angụ

⁷⁴ l'ọo-nafụta anyi l'ẹka ndu ọhogu anyi; g'anyi ejeahaaru iya ozi; ndzụ taa gụdu anyi;

⁷⁵ anyi abụru ndu dụ nsọ; bụru ndu pfụberekoto l'iphu iya jasụ g'anyi a-nọ-beru.

⁷⁶ “Gụbe nwata ọwa-a; Iphe, ee-ku ngu bụ onye epfuchiru Ọkalibe-kangokọtaru-nụ; kẹle ii-vuru Nnajịuphu ụzo je abọoru iya ụzo;

⁷⁷ je emee gẹ ndu nkiya maru lẹ Chileke e-shi l'agụ nvụ l'iphe-ẹji dzọo phẹ;

⁷⁸ kẹle oogudeje eme odoo phụaru anyi obu-imemini. Oo-me gẹ ndzọta ọphu echi echichi g'ẹnyanwu wapfuta anyi

⁷⁹ g'ọo-bụru ìphóró, dụru ndu nọ l'ọchii mẹ ndu ọnwu heru gabala asọ-kputa; waa g'oo-duru anyi bahụ l'ụzo ẹhu-guu.”

⁸⁰ Tọbudu iya bụ; nwata ono nọdu evu; bya aka enweru egomunggo. Ọ nọo l'echiẹgu jasụ teke ọ fụtaru l'edzudzu-ọha ndu Ízurẹlu.