Jiowẹlu 3 - BAYỊBURU Izii

Ikpe, ee-kpe ọhamoha

¹ “Kẹle-a; o -rwuẹpho lẹ mbọku ono, bụ teke mu e-dophu ndu Jiuda ẹphe lẹ ndu Jierúsalẹmu azụ l'ọnodu phẹ;

² bẹ mu a-chịkobe ọhamoha tụko g'ẹphe ha chịta jeshia lẹ nsụda Jiehoshafatu. Noo ẹka mu a-nọdu kpee phẹ ikpe; ikpe ẹhu ndu ono, bụ okiphe mu ono; mbụ ndibe mu, bụ ndu Ízurẹlu; kẹle ẹphe chịkaru ndibe mu; ẹphe dzuru ọhamoha; bya eworu alị mu kekashịa.

³ Ẹphe tụaru ndibe mu ono ido; bya achịta ụnwu phẹ ụnwu-okoro gude je agbanweta ụnwanyi-ụkpara; bya achịta ụnwu phẹ ụnwumgboko reshia gude gaa mẹe ngụa.

⁴ “Sụ-a; ?bụ gụnu bẹ unu a-gụru nụ mu; unubẹ ndu mkpụkpu Taya yẹe ndu mkpụkpu Sayịdonu; mẹkpoo unubẹ ndu bukọta l'alị ndu Filisitayinu l'ophu? ?Bụ iphe, mu meru bẹ unu apfụ mu ụgwo iya tọo? Ọ -bụru l'ọo ụgwo bẹ unu apfụ mu bẹ mu e-kwo-a gburumu mee ẹgwegwa woru iphe, unu meru tukobe unu l'ishi;

⁵ kẹle unu wotaru mkpọla-ọchaa mu; yẹe mkpọla-ododo mu bya atụko ẹku mu ndu ọphu kachaa ama mma vuta je akụbe l'ụlo nshi unu.

⁶ Unu woru ndu Jiuda yẹe ndu Jierúsalẹmu ree ndu Gurisu g'ee-shi g'unu mee g'ẹphe nọdu ẹnya l'oke alị ẹka ẹphe shi.

⁷ “Lekwa; mu e-mechakwaa je achịfuta phẹ l'ẹka ono, unu chịru phẹ je eree ono. Mu ewophutakwanụ iphe, unu meru azụ bya atukobe unu l'ishi.

⁸ Mu a-chịta ụnwu unu unwoke mẹ ụnwu unu ụnwanyi chịru reshia ndu Jiuda; ẹphe achịta phẹ ree ndu Seba; mbụ ọha kwata dụkpoo ẹnya ọkpobe adụdu.” Ọ kwa Chipfu bẹ pfuru iphe ono.

⁹ Unu woru iphe-a pfuaru ọhamoha: Unu kwakọbekwa k'ọgu! Unu mekwaa gẹ ndu ike ọgu dụ tsulihu! G'iphe, bụkpoo ndu alwụje ọgu kpịritakwaru ntse bya awata alwụ ọgu!

¹⁰ Unu kpụkwaa ọ́gù unu g'ọ bụgbaaru ogu-echi! Unu akpụa nwọkarara unu g'ọ bụru arwa! G'onye ike bvụru pfukwaa sụ: “Mu bụakwaa onye ọkpehu dụshi ike!”

¹¹ Unu dzukọbe ẹgwegwa; unubẹ ọhamoha l'ophu! Unu shikpọo l'ẹkameka bya edzukọbe l'ẹka ono! Gụbe Chipfu; menaa gẹ ndibe ngu, bụ ndu ike dụ shi l'imigwe lwazeta l'alị!

¹² “G'ọhamoha tsulihunu! G'ẹphe zenuru jeshia lẹ nsụda Jiehoshafatu; kẹle ọo l'ẹka ono bẹ mu a-nọdu kpee ọhamoha mgburugburu ikpe.

¹³ Unu watanụ egbu mma unu swịiswiiswii; kẹle iphe, a kụru l'opfu chawaru. Unu bya azọshia akpụru vayịnu ọbu; kẹle ẹka aakụje mẹe jiwaru. Nsụkutu iya jiwaru ejiji; kẹle ẹjo-ememe, phẹ parụ ẹka.”

¹⁴ “Igwe-ọha; igwe-ọha kụru lẹ nsụda, aanọduje pfua opfu pfukaha; kẹle mbọku kẹ Chipfu dụkwaa ntse lẹ nsụda, aanọduje pfua opfu pfukaha.

¹⁵ Ẹnyanwu yẹe ọnwa bẹ ee-me g'ọ gbaa ọchii. Ọphu kpokpode ekehẹdu paapaapa.

¹⁶ Chipfu a-gbẹ l'úbvú Zayọnu sụa ekiri; nọdukwapho lẹ Jierúsalẹmu dee ririri. Eliphe yẹe akpaminigwe anmaa jiijiijii. Obenu lẹ Chipfu a-bụru onye ndibe iya a-gbabẹje lẹ mkpula je anọdu zee ndzụ. Mbụ l'ọo-bụru ụlo, a kpụshiru ike doberu ụnwu Ízurẹlu.”

Iphe-ọma ndu kẹ Chileke

¹⁷ Noo teke unu a-maru l'ọo mbẹdua bụ Chipfu bya abụru Chileke unu; lẹ mu bu ebubu l'úbvú Zayọnu; mbụ úbvú ono, dụru mu nsọ ono. Noo teke Jierúsalẹmu a-dụ nsọ; ọphu ndu ọhozo agbabaẹdu iya ophorokpo.

¹⁸ “O -rwua mbọku ono bẹ úbvú úbvú a-nọdu asọshi mẹe ọ̀phúú. Eli obvu obvu asọshi mini-ẹra-eswi. Mini atụko asọshigbaa l'iphe, bụkpoo nggele, dụkota l'alị Jiuda. Ọgba-mini agbafuhu shi l'eze-ụlo Chipfu wata asọ gborogboro je agbaa mini lẹ nsụda Shitimu.

¹⁹ Obenu l'alị ndu Ijiputu a-bụru ochobu. Alị ndu Edọmu abụru echiẹgu, dabyiru kẹ mmanụ. Ọ bụru iphe, a-kpa iya nụ bụ iwashị, ẹphe weru ndu Jiuda, bụ ndu ẹphe nọ l'alị phẹ gbushia ndu adụdu iphe, ẹphe meru.

²⁰ Obenu lẹ ndu Jiuda e-buru l'alị phẹ jasụ l'ojejoje. L'e buru lẹ Jierúsalẹmu; e -shi l'ọgbo sweru ọgbo.

²¹ Noo teke mu a-gụru phẹ nvụ l'ikpe-ọchi ọphu mu te eshidu gụhawaru phẹ nvụ iya.” “Chipfu bu l'úbvú Zayọnu!”