Jiowẹlu 2 - BAYỊBURU Izii

Igube, etsu gbiigbiigbi

¹ Unu gbua opu-ọgu l'úbvú Zayọnu! Unu echia mkpu-ọgu l'úbvú mu ono, dụ nsọ ono! G'iphe, bụkpoo ndu bu l'alị-a nmakwaa pyaapyaapyaa; kẹle eswe kẹ Chipfu abyaakwaa; mbụ l'o rwuakwaru erwurwu;

² mbụ mbọku, a-bụru mbọku, agba ọchii agba kẹ tsụkiribaa; mbọku, urwukpu a-sọpyabe; ẹkameka ejihu hụduu. Ikpoto ndu ojọgu, ike dụ awụ gbiigbiigbi asọ abya g'ẹka ọchii nchi-abọhu asọpyabe asọpyabe l'eli eze úbvú; ụdu iya ọphu eteke adụ-swe teke ndiche; ọphu ọ byadu adụ l'ọgbo ọphu abya nụ.

³ Ọku nọ phẹ l'ụzo iphu ekepyashị iphe ekepyashị. Ọku nọdukwa phẹ phọ l'azụ enwu phoophoophoo. L'iphu phẹ bẹ alị dụepho gẹ mgbabu Édẹnu. Ẹka ẹphe ghawarụ ye l'azụ bụru echiẹgu, dabyiru kẹ mmanụ; ọphu ọ dụdu iphe, anahụje phẹ nụ.

⁴ Ẹphe gbaru ụgbugba g'ịnya. Tẹme ẹphe nọdu awụ kẹ wugelengu wugelengu g'ịnya-ọgu.

⁵ Igiji, ẹphe ede gude awụ gbiigbiigbi l'eli úbvú eje abya dụepho g'ẹka ụgbo-inya awụ. Mbụ l'ẹphe dụepho g'ẹka ọku alwa wọowoowoo etsu ekperema ọkponku; g'ikpoto ndu ojọgu, a chịkoberu gude eje ọgu.

⁶ Ọha, hụmaru phẹ nụ evujeru ụzo rwushihu. Iphu adụkota onyemonye ẹji.

⁷ Ẹphe abyajẹ ẹnari g'ojọgu, ike dụ. Ẹphe nọdu enyije igbulọ gẹ ndu ojọgu. G'ẹphe ha nọdu egbuje giriri azọ eje; ọphu ọ dụdu onye ọphu egbeje egbegbe l'ụzo, ẹphe eshi;

⁸ ọphu ọ dụdu onye ọphu akwajẹ nwibe iya ǹkù. Onyemonye apfụjeerupho kẹkereke azọ eje l'iphu l'iphu. Ẹphe anọdujeepho apfụ shọoshoo apfụda l'iphu ọgu. Ọphu ẹphe aladu azụ azụ.

⁹ Ẹphe nọdu ezehuje zeba lẹ mkpụkpu; tụko igbulọ gbaa gorogoro; nyichaa enyinyi nyibachaa l'ime ụlo l'ime ụlo. Ẹphe nọdu eshijechaa windo abahụ l'ụlo gẹ ndu-oshi.

¹⁰ “Eliphe l'ophu anmakọta jiijiijii l'iphu phẹ. Akpaminigwe nọdu anma yigayiga. Ẹnyanwu yẹe ọnwa gbahụ ọchii. Ọphu kpokpode ekeẹdu paapaapa.

¹¹ Chipfu nọdu l'iphu ndu ojọgu iya ede ririri. Ndu alwụru iya ọgu bụ agụta agụta. Tẹme ndu ono, emeje iphe, ọ sụru g'e mee ono paa ọkpehu. Mbọku kẹ Chipfu pakwarụ ẹka bya adụ ebvu. ?Bụ onye a-dụ ike tapyabẹ iya lẹ nshi?”

Alaja ọkpoma haa uwe

¹² Wakwa iphe, Chipfu epfu baa: Ntaakpọnu; unu gudenụ ọkpoma unu g'ọ ha lwapfuta mu! Unu gude aswi ẹgu; mẹ ara ẹkwa; mẹ agụ aphụ gude lwa!

¹³ Unu lajaa ọkpoma unu; ọ tọ bụdu alaja uwe! Unu lwapfuta Chipfu, bụ Chileke unu; kẹle oomeje eze-iphe-ọma; tẹme ọ nọdu aphụje obu-imemini! Ẹhu te eghujedu iya eghu ẹgwegwa; tẹme n-yemobu iya dụ shii. Tẹme ọphu oohejedu iya ihee eme gẹ nemadzụ jee iphe-ẹhuka.

¹⁴ ?A maru ?l'ọo-ghakọbe phụaru unu obu-imemini meeru unu iphe-ọma; mbụ nụ unu nri; waa mẹe; k'ọphu bụ l'unu e-gude iya gweeru Chipfu, bụ Chileke unu ngwẹja-nri; waa ngwẹja-mẹe.

¹⁵ “Unu gbua opu-ọgu ọbu l'úbvú Zayọnu! Unu raa ya arara g'a swịaru Chileke ẹgu, dụ nsọ! Unu tụa ndzukọ, a-dụru Chileke iche.

¹⁶ Unu chịkobe ndu Ízurẹlu l'ẹka lanụ! Unu emee gẹ ndu byaru ndzukọ ono dụ nsọ! Unu chịkobe ndu bụ ọgerenya! Unu achịkobe ụnwegirima; mẹ ndu ọphu eechekwadu ẹra! G'onye lụru nwanyị ọ̀phúú hakwaa erwu iya fụta! Nwanyị, alụru k'ọ̀phúú ahaa ụlo-epfu iya!

¹⁷ Gẹ ndu bụ uke, bụ ndu ejeru Chipfu ozi nọdukwa raa ẹkwa lẹ mgbaka nwụlo, eeshije abahụ l'eze-ụlo Chipfu yẹle ọru-ngwẹja. G'ẹphe pfukwaa sụ: ‘Gụbe Chipfu; phụnaaru ndu nkengu obu-imemini! Be mekwa gẹ ndu ono, bụ okiphe ngu ono bụru iphe, ee-gude achị ọchi! G'ẹphe ta abụkwaru iphe, ọhamoha e-gude agba mgbọnu; kẹle-a; ?dẹnu g'o gude ndiphe je l'anọdu epfuru ndu Ízurẹlu asụje phẹ: ?Bụ awe bẹ Chileke unu nọ?’ ”

Ọnu, Chipfu e-ye

¹⁸ Noo teke Chipfu a-wata eko okophoo l'ẹhu ndu alị ono, bụ ndu nkiya ono; bya aphụaru ndibe iya obu-imemini.

¹⁹ Chipfu eyeeru ndu nkiya ono ọnu sụ phẹ-a: “Unu lekwa-a; mu anụakwa unu ereshi; yẹe mẹe ọ̀phúú; yẹe manụ olivu; nụkpoo ya unu shii; k'ọphu oo-ji unu ẹpho rengurengu. Mu tee mebaẹdu unu g'unu bụru iphe, ọhamoha e-gude achị ọchi.

²⁰ Mu a-chị ndu ojọgu ono, shi l'ụzo isheli ono chị-mihu g'ẹphe nọdu unu ụzenya. Mu a-chịru phẹ jeye lẹ mkpọkoro alị, adụdu iphe, b eemetajẹ iya. Ọgbo ivuzọ ọgu phẹ bẹ mu a-chịru ye l'eze-ẹnyimu ụzo ẹnyanwu-awawa. Mu achịru ndu ikpazụ ọgu phẹ ye l'eze-ẹnyimu ụzo ẹnyanwu-arịba. Ẹ́wó, ẹphe a-nọdu ekpo etsulihuẹpho etsulihu. Mbụ l'ishishi phẹ a-tụkoepho ẹkameka. Ire-lanụ, bụ lẹ Chipfu mewaru iphe, parụ ẹka.

²¹ Gẹ ndzụ ba agụshi ngu gụbe alị! Ọ chia g'ẹhu tsọo ngu ụtso; g'i techia ẹswa! Ire-lanụ bụ lẹ Chipfu mewaru iphe, parụ ẹka.

²² Gẹ ndzụ ta agụshi unubẹ anụ, bu l'ime ẹgbudu; kẹle ẹka unu atajẹ nri, dụ l'echiẹgu abyawaa erwu irwu. Oshi abyawaa amị mebyi. Oshi figu yẹe vayịnu abyawaa eme ike phẹ.

²³ G'ẹhu tsọje unu ụtso; unubẹ ụnwu Zayọnu! Unu nọdu l'ẹka Chipfu, bụ Chileke unu tee ẹswa; kẹle ọ watawarụ edzeru unu mini ishi-apha ono g'ọ gbaru. Ọ watawarụ edzeru unu mini ono edzeshi iya ike; edzeru unu mini ishi-apha bya edzekwaphọ mini ụla-apha; g'o shi edzejehawaru iya unu.

²⁴ Ẹka eechije balị bẹ balị e-mechaa ji ejiji. Ẹka aakụje mẹe eji kụdumu lẹ mẹe ọ̀phúú; yẹe manụ olivu.

²⁵ Mu a-pfụ unu ụgwo iya k'apha g'apha phọ, igube tapyashịru iphe unu phọ; mbụ ụnwu ọgbolanu igube; mẹ mgbagbaramatsụ iya; mẹkpoo otsu-gbiigbiigbi iya; mbụ ojọgu mu, ike dụ ono, mu yeru unu ono.

²⁶ Unu e-nwekpọoru ikpoto iphe, unu a-nọdu eri jasụ l'ooji unu. Tẹme ọ bụru mbẹdua, bụ Chipfu, bụ Chileke unu bẹ unu a-nọdu etu ẹpha; mbụ onye ono, meru iphe, dụ biribiri l'ẹhu unu ono. Sụ-a; ndu ono, bụ nkemu ono; bẹ e tee mebaẹkwa iphe-iphere.

²⁷ Noo teke unu a-maru lẹ mu nọ-a lẹ Ízurẹlu; maru l'ọo mu bụ Chipfu bya abụru Chileke unu; l'ọ tọ dụedu onye ọzo, dụbaa nụ. Ọphu a byadu emebaa ndu bụ ndibe mu iphe-iphere ọzo.

Eswe kẹ Chipfu

²⁸ E -mechaa bẹ mu a-wụ Unme mu l'ẹhu nemadzụ mgburugburu. Ụnwu unu unwoke mẹ kẹ nwanyị e-pfuchiru Chileke. Ndu bụ ọgerenya unu arwọo nrwọ. Ụnwokorobya unu aphụa ọphulenya.

²⁹ Lẹ mbọku ono bẹ mu a-wụ Unme mu ono l'ẹhu ndu bụ ohu; unwoke phẹ m'ụnwanyi phẹ.

³⁰ Mu e-goshi iphe-ọhumalenya l'akpaminigwe mẹ l'eliphe l'ophu. Ọ bụru iphe, mu e-gude mee ya bụ mee; yẹle ọku; yẹe ọkpu-tụutuutuu ẹnwuru-ọku.

³¹ Ẹnyanwu bẹ ee-me g'ọ gbaahaa ọchii. L'e mee g'ọnwa bụru mee. Tẹme l'o rwua oke mbọku kẹ Chipfu ono, bụ eswe, a-dụ ebvu onoya.

³² Mbụ l'aa-dzọta iphe, bụkpoo ndu araku ẹpha Chipfu; kẹle oo-nweru ndu a-nahụ nụ, a-nọdu l'úbvú Zayọnu yẹfua lẹ mkpụkpu Jierúsalẹmu; mbụ l'oo-nweru ndu Chipfu e-ku l'echilabọ nwa ndu ono, warụ nụ ono; bụ iya bụ iphe, Chipfu pfuru.”