Jiowẹlu 1 - BAYỊBURU Izii

¹ Ọwaa bụ ozi, Chipfu ziru Jiowẹlu, bụ nwa Petuwẹlu.

Igube, byaru mkpu-danyi-ọku

² Unu nụmakwa iphe-a; unubẹ ndu bụ ọgerenya! Unu ngabẹkwa nchị; iphe, bụkpoo ndu bu l'alị-a l'ophu! Iphe, dụ ẹgube-a; ?o mejekpọoru eshinu unu shi nọduta ndzụ? Tọo ?o mejeru lẹ teke kẹ nna unu oche phẹ?

³ Unu pfukwaaru iya ụnwegirima unu! G'ụnwu unu pfukwaru iya phọ ụnwu nkephẹ. Ụnwu nkephẹ epfuaru iya ọgbo ọphu abya nụ.

⁴ L'iphe, otsu-gbiigbiigbi igube tarụ taphodo bẹ oke-igube wụbataru bya ataa. Ọphu oke-igube tarụ taphodo bẹ ụnwu ọgbolanu igube wụbataru bya ataa. Ọphu ụnwu ọgbolanu igube taphodoru bẹ mgbagbaramatsụ byaru bya atachafụ.

⁵ Unu tehu etehu; unubẹ ndu angụnukaje mẹe. Unu wata ara ẹkwa! Unu chia mkpu; unubẹ ndu angụje mẹe ngụgharu iya ẹka! Unu kpọo mkpu mẹe ọ̀phúú ono; kele a nyịchatawaru iya unu l'ọnu!

⁶ Ọ dụru ọha, byaru bya eripyabẹ alị mu-a. Ndu ono bẹ ọkpehu dụ shii; tẹme ọphu aagụtadu phẹ l'ọgu. Eze, dụ phẹ l'ọnu dụ gẹ k'oduma; mbụ l'ọ dụ g'ẹpyii, nọ l'ọnu ne oduma.

⁷ Ọ tapyashịchawaru vayịnu mu; bya emee oshi figu mu; ọ bụkotaru ọla-l'iswi. Ọ swachacharu iya ụgbo woru iya tọgbo. Ẹkali iya nọdu achagbaa ụcha.

⁸ Unu gụa aphụ gẹ nwamgbọko, yẹe nwoke teke akwaswee, yeru uwe-aphụ, agụ aphụ kẹ ọnwu gburu nwoke eje iya alụlu.

⁹ Ngwẹja-nri; waa ngwẹja-mẹe chịhuwaru l'ụlo Chipfu. Ndu bụ uke nọ l'aphụ; mbụ ndu ono, ejeru Chipfu ozi ono.

¹⁰ Opfu, a kọru akọko bẹ bụwaa ọla-l'iswi. Alị kpọhu nkụ; ereshi, a kụru iya mebyishihu. Mẹe ọ̀phúú tashịhu; tẹme manụ nọdu atahụwa atahụ.

¹¹ “G'iphere gudekwa unubẹ ndu akọ opfu! Unu rashịa ẹkwa ike; unubẹ ndu akọ opfu-vayịnu! Unu gụa aphụ witi unu; yẹe balị unu; kẹle iphe, a kụru l'opfu bẹ e mebyishiwaru.

¹² Ome vayịnu kpọshihuwaru nkụ; tẹme oshi figu nwụkotawaa lwaa. Oshi itorokuma; yẹe mpfụ; waa oshi ụdara; mẹwaro iphe, bụkpoo oshi, nọkota l'ẹgu l'ophu kpọhukotawaru nkụ; kẹle iphe, emeje g'ẹhu tsọo ụnwu-eliphe ụtso chịhuwaru.”

Oku izimanụ alwa azụ

¹³ Unu yekwaa uwe-aphụ wata agụ aphụ; unubẹ ndu bụ uke! Unu watakwa echi mkpu; unubẹ ndu ono, anọduje eje ozi l'ọru-ngwẹja ono! Unubẹ ndu ono, nọ l'iphu Chileke mu eje ozi ono; unu byakwa eyee uwe-aphụ nọkota ẹnyashi l'ophu; kẹle ngwẹja-nri yẹe ngwẹja-mẹe bẹ e buchiwaru l'ụlo Chileke unu.

¹⁴ Unu raa ya arara g'a swịaru Chileke ẹgu! Unu tụa ndzukọ, a-dụru Chileke iche! Unu kua ndu bụ ọgerenya ndzukọ; mẹkpoo iphe, bụ ndu bu l'alị-a l'ophu; g'ẹphe dzukọ l'ụlo Chipfu, bụ Chileke unu raku Chipfu ono l'ẹkwa.

¹⁵ Ha-o! Ẹgube mbọku ono; kẹle eswe Chipfu dụkwaa ntse. Ọo-bụru eswe, Ọkalibe-kangokọtaru-nụ e-mebyishi iphemiphe.

¹⁶ “?Tọbudu l'iphu anyi gẹdegede bẹ e meru; nri chịhu; bya emee; ẹhu-ụtso yẹe ete ẹswa bvụkwapho l'ụlo Chileke anyi?

¹⁷ Akpụru iphe, a kụru akụku gbapyashịhuchawaru l'ime igbo, a kụru iya. Iphe, bụkota ụlo, aakụbeje nri dabyikọtaru iphoro. Ọba ereshi tụko dakashịhu; kẹle ereshi ọbu l'onwiya mebyishihuru l'ẹgu.

¹⁸ Lewarọ g'anụ-ụlo atsụgbaa ude! Eswi bẹ ọ tụgbaru ẹberebete; kẹle ẹphe te enwedu nri, ẹphe a-ta; mbụ l'atụru tụkoru eje iphe-ẹhuka.

¹⁹ Ọ kwa gụbe Chipfu bẹ mu araku; kẹle ọku tsuakwaru ẹka iphe-edobe atajẹ nri, dụ l'echiẹgu; mbụ l'iphe, bụ oshi, dụ l'ẹgbudu nwukọtawaru phuruphuru nwufu l'ọku;

²⁰ anụ-ẹgbudu nọdu atụchaa hẹehee agba achọ ngu. Nggele nggele bẹ mini tashịhuwaru. Tẹme ọku tsufuwaa ẹka iphe-edobe atajẹ nri, dụ l'echiẹgu.”