Jiona 2 - BAYỊBURU Izii

Jiona epfu anụ Chileke

¹ Tọbudu iya bụ; Jiona bya anọdu l'ime ẹpho okazụ l'ẹka ono wata epfu anụ Chipfu, bụ Chileke iya.

² O pfua sụ: Teke mu eje eze iphe-ẹhuka bẹ mu rakuru Chipfu. Ọ nụma olu mu. Ọ bụru l'ime alị-maa bẹ mu chiru g'a gbaaru mu mkpu. Ị nụma mkpu, mu echi.

³ Ị parụ mu chie l'ime ogbu-mini; mbụ l'ọhu-alị eze-ẹnyimu. Utso gbaa gbapyabẹ mu. Akparamini ngu mẹ gborogboro, ọoso nọdukota awụ mu awụwu.

⁴ Mu pfua sụ: A chịfuakwaru mu l'atatiphu ngu. Ọle mu a-dabẹkwa-a ẹnya l'ụzo eze-ụlo ngu, dụ nsọ ọzo.

⁵ Gẹ mini meru g'o ria mu rimia; ogbu-mini lwee mu kawọmu. Ẹlwubara mini kwechia mu ishi.

⁶ Mu dalahụkpoepho l'ọhu l'ọhu eze úbvú. Ọhu alị woru mu tụa mkpọro ojejoje. Obenu l'ị gụtaru ndzụ mu l'iduma; mbụ gụbe Chipfu, bụ Chileke mu.

⁷ Teke mu shi abyawaa atụ-buhu unme bẹ mu nyatarụ gụbe Chipfu. Mu pfuahaa opfu nụahaa ngu; opfu mu rwua ẹka ị nọ l'eze-ụlo ngu, dụ nsọ.

⁸ “Ndu bụ mkpọkoro ntẹkpe bẹ ẹphe tụru swịswia bẹ o too rwuẹdu ẹka; mbụ eze-iphe-ọma ono, e gege meru phẹ ono.

⁹ Obenu lẹ mbẹdua a-nọduepho agụ ebvu-ekele gude agwa ngu. Iphe, mu kweru ukwe ememe bẹ mu e-mekọta. Ndzọta bụkwa onye ooshije l'ẹka bụ Chipfu!”

¹⁰ Tọbudu iya bụ; Chipfu bya atụaru okazụ ono ekemu; o je agbọfu Jiona l'alị ọkponku.