Jiobu 9 - BAYỊBURU Izii

Ọnu, Jiobu eye

¹ Tọbudu iya bụ; Jiobu bya eyee ọnu sụ:

² Tororo bụ ishi opfu bụ lẹ mu maru l'ọo eviya. Obenu lẹ-a; ?dẹnu gẹ gwọpya-gwọpya iphe-a, bụ nemadzụ-a e-me pfụbe-ẹka-ọto l'iphu Chileke?

³ Onye ọ dụ gẹ yẹe Chileke tụa ya bẹ ọo-jịkwa ụnu-kụru-ụnu ajị; ọ tọo zadụ g'ọ ka mma l'ọo nanụ.

⁴ Ọ maru iphe maghee ya amaghe; bya adụ ọkpehu dụ-ghee ya adụ-ghe. ?Bụ onye kwefujeru iya ike; e mechaa; ọ dụru iya lẹ ree?

⁵ Úbvú bẹ oonwuribẹjeru; úbvú ta amakpọdanu l'e nwuribẹru iya; ọ nọdu egudeje ẹhu-eghu ghaa ya ịgharaphu.

⁶ Mgboko l'ophu bẹ ọonmaghuje anmaghu mee itso, e gude kpọbe iya g'o tee kpaakpaakpaa.

⁷ Ẹnyanwu bẹ oopfujeru opfu yeru; l'o chibuhu; ìphóró, dụ lẹ kpokpode bụ iya byanyịbotaru iya.

⁸ Ọ bụru yẹbedua kpoloko sụsaru akpaminigwe g'ọ sụsaru ono; bya abụru iya bụ onye ahajẹ ọkpa l'eli akparamini, atụ l'echi eze-ẹnyimu.

⁹ Ọo ya meshiru oke kpokpode kpokpode, dụgbaa nụ; mbụ kpokpode, bụ bịye; yẹe orayọnu; waa peleyadesu; mẹwaro eze kpokpode kpokpode, nọgbaa l'ụzo ndọhali.

¹⁰ Oomeje iphe, dụ biribiri, adụdu ẹtu, iya dụ nụ; tẹme iphe-ọhumalenya nkiya bụru agụta agụta.

¹¹ Ọobujeru; a -nọnyaa l'ọ bya aghata mu; mu ta ahụmadu iya; teke ooje l'iphu l'iphu mu ta amadụ.

¹² Ọ -nata nemadzụ iphe; ?bụ onye a-sụ iya g'o to meshi? ?Bụ onye sụru g'ọo-jị iya sụ: ?Bụ gụnu bẹ iime ẹgube ono?

¹³ Ẹhu -nọdu eghu Chileke eghu bẹ o too selajẹkwa ẹka azụ; mbụ lẹ ndu ojọgu Réhabu daru kpurumu lẹ mgboru ọkpa iya.

¹⁴ ?Dẹnu gẹ mu e-jeje gẹ mu l'iya je eme opfu? ?Mu doberu ọnu l'awe kẹ gẹ mu l'iya bya awata atụ ẹgo opfu?

¹⁵ O -betakpọnu ọphu ọ dụdu iphe, mu meru; mu te ejekwa iya asarụ opfu. Iphe, mu a-nọduekwapho eme bụkwa gẹ mu rwọnupho yẹbe onye-ikpe mu ono g'ọ phụaru mu obu-imemini.

¹⁶ Mu -kukpọo ya nụ oku; ọ -za mu ẹnu bẹ mu ta arịkpokwanu l'oo-yeru mu ọnu.

¹⁷ Ọo oke phẹrephere bẹ oo-gude bya bya egwee mu arakabya; bya emee ọ́nyá, tụkoru mu ẹhu-a ka shii l'ẹbe adụ iphe, mu meru.

¹⁸ O too kwedu g'unme rwua mu ọhu-ẹpho. Ọ chia mkpawere bẹ oo-gude tsụa ndzụ mu ntsụgiji.

¹⁹ Ọ -bụru l'iphe, eepfu bụ k'ọkpehu; ọ bụ onye ike dụ shii. Teke ọ bụ k'ikpe; ?bụ onye sụru iya eku ikpe?

²⁰ O -betakpọnu ọphu ọ dụdu iphe, mu meru bẹ opfu, shi mu l'ọnu anmalẹ mu-a ikpe. Iswi -dụkpoo mu nụ mma; l'ọ sụle-a l'ikpe nmarụ mu.

²¹ A makwarụ-a l'ọ tọ dụdu iphe, mu meru; ọle mu ta ayọdu ọshi onwomu. Ndzụ mu dụwaa mu ashị.

²² Mbụ l'ọ tụkoru bụru iphe lanụ; ọ bụru iphe ono meru g'o gude mu sụ: “Oomebyishije ndu adụdu iphe, ẹphe meru; yẹe ndu bụ ndu ẹjo-iphe.”

²³ Eze-iphe-ẹhuka -dapfuta ndu adụdu iphe, ẹphe meru; meahaa g'ọ pyị-gbua phẹ; k'ọphu meji tọfuaharu phẹ atọfu; bụle-a ọchi bẹ ọonoduje achị phẹ.

²⁴ Mgboko dabarụ l'ẹka ndu ẹjo-iphe. O gude ẹka pyị-chishia ndu-ikpe iya ẹnya. Ọ -bụdu iya eme iya ?bụhunu onye bẹ eme iya nụ?

²⁵ “Eswe ndzụ mu kakwa onye maru ọso eme ẹgwa. Oophegbaẹpho phaaphaaphaa epheghashị; ọphu ọ dụdu g'ọ ka mma l'ọo nwa ẹhu-ụtso, ha nwanshịi, dụ iya nụ.

²⁶ Oochikọtaje bụruru chighaa g'ụgbo, e meru l'ọwa-ụda; zia phaa zighaa g'ugo, ephe ejepfu iphe, oo-ri.

²⁷ Mu -sụ gẹ mu zọhaa k'agụ aphụ bụ iphe, mu e-me bụ gẹ mu gbanwee iphu wata anwụja ọnu-ọchi.

²⁸ Obenu l'iphe-ẹhuka, mu eje bẹ mu atsụkwadu-a ebvu; kẹle mu maru l'ị tị byadu ekwe l'ọ tọ dụdu iphe, mu meru.

²⁹ Eshinu a nmawaru mu ikpe; ?mu a-yọbahunaa ọshi k'ole?

³⁰ Ọ tọ dụkwa m'obeta mu saa onwomu dụ g'eberugo; bya egude ncha kwọo ẹka mu; ọ nọdu ama mma

³¹ bẹ ịi-patalẹkwa mu-a chie wuu l'ime iduma, echi bụruru bụtubu; k'ọphu bụ l'uwe, mu yeru l'ẹhu bẹ mu a-dụchaa ashị.

³² Chileke ta bụkwa nemadzụ gẹ mu bụ-a; mẹ mu eyekwaaru iya-a ọnu; mẹ mu l'iya eje edogbabẹ iya l'ụlo-ikpe.

³³ Ọphu ọ dụkwanu onye egbogbo g'o gbokahụ anyi, bụ onye e-seta anyi l'ẹka doshiaru anyi opfu;

³⁴ mbụ onye a-nafụ Chileke ẹchachi ono, ọowa mu l'ẹhu g'ọowa mu iya-a; k'ọphu ebvu, ooye mu a-kabẹ lwa mu alị l'ẹhu.

³⁵ Noo teke mu e-pfu g'ọnu ha mu; mu ta atsụhedu iya ebvu. Obenu g'ọ dụ nta-a bẹ mu ta adụkwa ike epfugbu g'ọnu ha mu.