Jiobu 4 - BAYỊBURU Izii

Ọnu, Elifazu yeru

¹ Tọbudu iya bụ; Elifazu onye Temanu bya eyee ọnu sụ:

² Nemadzụ -sụkwanu gẹ ya yee nwọnu nwilile; ?tọo kpatsudu ngu nụ iwe? Ọlobu ?bụ g'iphe adụje baa nemadzụ edobe ọnu doo?

³ Leanarọya; gụbe onye ziwaru ikpoto nemadzụ iphe. Ndu dahụwaru adzụlakpa bẹ i meru; ẹphe gbakerehu.

⁴ Onye ada adada bẹ i pfuru opfu yeru; opfu ngu kwolia ya. Mbụ l'ikpere ngwọkinaki bẹ i meru; ọ pfụru kẹkereke.

⁵ Nta-a bẹ iphe-ẹhuka byapfutaru gụbedua l'ishi onwongu. Aphụ ji ngu obu ẹgube ọwa-a; mbụ l'ọ tụru ngu gbaa l'ẹhu; meji tọfu ngu.

⁶ Eshinu ị bụ onye atsụ Chileke ebvu; dakobenụ iya! L'ị chịru ẹnya yeru abụbu, ị bụ onye ụta adụdu lẹ ndzụ iya.

⁷ Rịnaa ya arịri; ?bụ onye bẹ ị makpọoru, bụ onye iswi dụ mma, lajẹru l'iyi? ?Bụ awe bẹ ị hụmajeru l'onye pfụberekoto chịhuru lẹ mgboko?

⁸ Ọ chikwaa iphe, mu ahụmaje bụ lẹ ndu woru ẹjo-ememe akọ g'onye akọ opfu; bya eworu iphe-ẹhuka anma iya bụkwapho iphe ono bẹ ẹphe akpatajẹ iya.

⁹ Chileke -zikwadaa unme fuu; ẹphe ephukashịhu. Teke ẹhu eghu iya swọlihuru; ẹphe abụru ọla-l'iswi.

¹⁰ Oduma asụjekwa ekiri; baa hanyịhanyi; byaa ẹnari; obenu l'oduma, dafụru ibogolo bẹ eekwoshijeẹle-a eze.

¹¹ Oduma, ahụmaduru iphe, oo-ri alajẹ l'iswi; ụnwu oduma agbaa nanụ nanụ.

¹² “Mbụ-a; o nwekwarụ iphe, e pfujeru mu lẹ mpya. Ọ bụru-a nwiphiphe bẹ mu nụmabutaru iya.

¹³ Mu nọdu arwọ ẹjo nrwọ l'ẹnyashi; lẹ teke ono, ndiphe adajẹwa ọdamgbenya ono.

¹⁴ Ndzụ gụahaa mu; ẹhu nmaahaa mu pyaapyaapyaa; k'ọphu ọkpu, nọ mu l'ẹhu nmakọtaru yilayila.

¹⁵ A nọnyaepho; nwamaa bya eshiẹ mu phọ l'atatiphu ghata. Ẹdzu swịe mu phọ l'ẹhu; ishi nyịa mu kẹ kpalaa.

¹⁶ Maa ono bya apfụerupho kẹkereke; ọphu mu adụkwanu ike akọ g'ọ gbaru. Ọ bụepho l'o nweru iphe, pfụru mu l'iphu. Ẹkameka dakọtaepho nyọnyoronyo. A nọnyaa; mu nụma olu-opfu onye sụru mu:

¹⁷ ?O nweru g'ọo-dụnaa nemadzụ mmanụ abya aka Chileke apfụbekoto? ?O nwenụru-a g'ọo-dụ nemadzụ abya aka onye meru iya nụ adụebe ree?

¹⁸ Eshinu Chileke te egudedu ire ndu ejeru iya ozi ẹka; tẹme ọ nọdu abajẹru ụnwu-ojozi-imigwe iya mba l'iphe, ẹphe mesweru;

¹⁹ ?bụchia nemadzụ bẹ ọo-ha; mbụ nemadzụ ono, bu l'ụlo ẹpuchi, a tụru ọkpa iya l'alị; ndu azọ-gbu phẹ ka nphe eme l'azọ-gbu mbeberibe!

²⁰ A -bya eshi l'ụtsu nọo jasụ gẹ nchi jihu bẹ e gwewaru phẹ uji. Ẹphe alaa l'iyi jeye lẹ tuutuutuu lẹ mịimiimii; ọ tọ dụdu onye ẹnya erwu l'ẹka ono.

²¹ Ọ -bụru l'a gbabufuru eri, gude ndzụ phẹ; ?ẹphe ta anwụhudu l'ẹbe enwe egomunggo?”