Jiobu 3 - BAYỊBURU Izii

Opfu, shi Jiobu l'ọnu

¹ Tọbudu iya bụ; e mechaẹpho; Jiobu saa ọnu wata epfu opfu; bya awata ephu eswe, a nwụru iya iphu.

² O pfushiahaa sụ:

³ “G'eswe, a nwụru mu bụkwaru ọla-l'iswi! G'ẹnyashi, a tsụru ime mu bụkwarupho ẹnyashi, larụ l'iswi!

⁴ Gẹ mbọku ono gbahụkwa ọchii! Gẹ Chileke ọphu bu l'eli ta agụbehekwa iya iphe; ọphu ọ dụkwa iphe, dụ g'ìphóró, adụkwadu mbọku ono!

⁵ G'ọchii yẹe tsụkiribaa tsụnyikwaa eswe ono ẹnya! G'urwukpu sọpyabekwa iya! G'eswe mbọku ono gbahụkotakwa tsụrikitiki!

⁶ Mbụ-a; g'ẹjo dadishi tụkwa ẹnyashi mbọku ono gburumu swịswia! G'a ta gụhekwaru iya ye l'eswe, nwụru l'apha! Ọphu a gụkwaru iya ye l'eswe lanụ l'ọnwa!

⁷ Mu sụru-a; g'ẹnyashi mbọku ono bụkwaru mbọku, gba ẹka nwa! G'ọ tọ dụkwa olu ẹmereme, aa-nụma iya l'ime!

⁸ Gẹ ndu atụje mbọku ọnu tụkwaa mbọku ono ọnu; mbụ ndu kwakọberu akwakọbe emete ẹjo-oke-agiyi.

⁹ Gẹ kpokpode nchi-abọhu iya gbahụkwa ọchii. G'o lekwaa ẹnya l'ìphóró abya adụdu; e -mechaa l'ọ bụru kẹ mmanụ; ọphu ọ hụmakwa gẹregere ụtsu ẹnya ahụma ophu.

¹⁰ Noo kẹle o to mechiduru ẹpho ne mu g'a ta nwụ mu mbọku ono; k'ọphu aphụ ọwa ata atsọduru mu.

¹¹ Mbụ-a; ?bụnaa gụnu meru g'o gude ọphu ọ bụdu teke aanwụ mu; mbụ l'ọo teke ono, mu shi l'ẹpho afụta ono bẹ mu gege atụ-buhu unme nwụhu?

¹² ?Bụnaa gụnu meru g'o gude ụtapfu hee mu hefuta? Mbụ; ?dẹnuanu g'o gude ẹra dụ k'ọphu mu ngụru iya angụngu ophu?

¹³ Kẹle nta-a bẹ mu gege azẹkpooro nwadoo. Mu gege anọro gẹ mu zẹ lẹ mgbẹnya. Ọo ya bụ mẹ mu anọduro pyakọo onwomu nwa nggujingguji;

¹⁴ mu lẹ ndu eze mẹ ndu mgbazi ụnwu-eliphe; ndu kwashịru unuphu doberu onwophẹ l'eliphe-a; ọle nta-a bẹ ọ bụkotawa ochobu.

¹⁵ Mu lẹ ndu-ishi, bụ ndu shi nweru mkpọla-ododo; ndu shi doo mkpọla-ọchaa dojia ụlo phẹ godogodo.

¹⁶ Ọzokwanu lẹ-a; ?bụnaa gụnu kparụ iphe, mu adụdu gẹ nwa, a byaru anwụ; ọ nwụhuwaa ne iya l'ẹpho; e woru iya je elia; mbụ gẹ nwaswa, asakpọdarunu ẹnya asasa ophu.

¹⁷ Ẹka ono bẹ ndu ẹjo-iphe a-babuhu hanyịhanyi. Ndu ike bvụru a-nọdu iya tụtaahaa unme.

¹⁸ Alị-maa ono bẹ ndu mkpọro yịchaa lẹ ndu nọ iya atụta unme. Ẹphe ta anụhedu olu ndu anọduje achị phẹ g'ohu.

¹⁹ Ndu ha nwanshịi nọ l'ẹka ono; ndu ha shii nọdu iya. Ọphu ndu shi bụru ohu anọedu l'ẹka nnajịuphu phẹ.

²⁰ ?Dẹnu g'o gude ìphóró nọdu adụjeru ndu ejegbu onwophẹ l'iphe-ẹhuka. A nọdu ahajẹkwadu ndu aphụ tsọru g'ẹphe dzụkwaduru ndzụ;

²¹ mbụ ndu anwụhu agụ ẹgu; ọphu o kwedu phẹ egbugbu; ndu anọduje achọ iya gẹ ndu achọ ẹku, ere ire, e domiru edomi.

²² Ndu eteje ẹswa ntụmatu; mbụ kwata mee ẹmereme m'ẹphe bahụ l'ime ilu.

²³ ?Dẹnuanu g'o gude ìphóró nọdu adụjekwarupho onye e domiru ụzo iya edomi; tẹme Chileke gude ọkpokuu kpọ-phee ya mgburugburu; ọ kwaa l'ime iya?

²⁴ Noo kẹle ọ bụwaa atsụ ude bụ nri, epyoje mu ọnu. Mgbede, mu ata dụepho g'ẹka mini asọ gborogboro.

²⁵ Iphe, mu atsụshi ebvu ike bụepho iphe, mechaarụ byaru mu nụ. Ọ bụru iphe ono, mu anmarụ pyaapyaapyaa mechaarụ mee l'ẹhu mu.

²⁶ Ẹhu ta adụjeduru mu guu; ọphu mu atụtajeduru unme; ọphu ẹhu ebvujeduru mu ebvuru. Ọo ẹpho iphe-ẹhuka bẹ mu l'iya anọduje eme.”