Jieremaya 9 - BAYỊBURU Izii

¹ Ọ dụ g'a sụ l'ishi mu bụ nggele, mini shi asọshihu. Ẹnya mu bụru ẹka ẹnya-mini futaru! Mu gege anọduepho ara ẹkwa eswe l'ẹnyashi k'egbushi, eegbushi ndibe anyi.

² Ọ dụ g'a sụ lẹ mu nweru ẹka ndu ije akwajẹ l'echiẹgu; mẹ mu ahaẹpho ndibe anyi; mbụ tụgbukpoepho lụfuru phẹ; kẹle ẹphe erikọta ogori g'ẹphe ha; ndu kụru l'ẹka ono bụkota ndu egudedu ire phẹ ẹka.

³ Ẹphe ekweje ire phẹ g'onye kweru apfụ gude agba ụka agbagba. Ọ tọ bụdu ire-lanụ bẹ ẹphe gude atụ okoo l'alị-a. “Ẹphe eshije l'eme iphe-ẹji ọwa-a daba l'eme ọzo; ọphu ẹphe amadụ onye mu bụ.” Nokwa iphe, Chipfu eepfu bụ ono.

⁴ Sụ-a; onyenọnu kpakwaru ndu ẹphe l'iya eshi ọ̀nyà l'aphara! Ọphu unu akpọkwaru obu yeru unwune unu unwoke; kẹle nwoke, yẹle nwibe iya bụ nwune agbakwarụ iya ẹregede. Tẹme iphe, bụkpoo onye unu l'iya eshi ọ̀nyà bụru onye mgbamu.

⁵ Ọ̀nyà nọdu agbarụ onye yẹle iya eshi ẹregede. Ọphu ọ dụedu onye epfuje ire-lanụ. Ẹphe tụkowaru zia ire phẹ adzụ ụka. Ẹphe mewaru iphe-ẹji jasụ ẹphe tụhu onwophẹ ayị.

⁶ Ọ bụepho l'unu bu l'echilabọ ẹregede. “Ẹphe gude agba ẹregede ono jịka amaru onye mu bụ.” Nokwa iphe, Chipfu eepfu.

⁷ Ọo ya bụ lẹ-a; wakwa iphe, Chipfu, bụ Ọkalibe-Kakọta-Ike eepfu baa: “Lekwa; mu a-hụkwa phẹ ama; nụchaa phẹ anụcha; kẹle-a; ?bụbaa gụnu ọzo bẹ mu e-meba lẹ k'iphe-ẹji, ndibe mu eme?

⁸ Ire phẹ bụ apfụ, egbu egbugbu. Ẹphe anọduje epfu opfu l'ẹregede. Onyemonye nọdu egudeje ire mecha-mecha epfu eyeru nwibe iya; o bekwanụ l'o gude obu iya agbaru iya ọ́nyà.

⁹ ?Mu ta ahụ̀shi phẹ ahụ̀hù iphe ono, ẹphe eme ono tọo? ?Mu te emelatashị phẹ iphe, ẹphe meru mu; mbụ ndu alị-a tọo?” Nokwa iphe, Chipfu eepfu bụ ono.

¹⁰ “Mu a-kwashị ẹnya-mini; kpọo mkpu-ẹkwa l'opfu-ẹhu úbvú úbvú. Mu abya agụa aphụ irwu ẹswa, dụ l'echiẹgu; kẹle ọ kpọshihuwaru nkụ; ọphu ọ dụdu ndu eshiswetajẹkwadu iya nụ; ọphu ọ dụedu onye anụmaje ọ́rà eswi l'ẹka ono. Ụnwenu, ephe l'eli phekashịhuwaru; ụnwanu gbakashịhu.”

¹¹ Wakwa iphe, Chipfu epfu baa: “Jierúsalẹmu bẹ mu e-me g'ọ bụru ikpọzu; ẹka nkụta-ọswa e-buru. Mu jekwa e-mekwaphọ gẹ mkpụkpu lẹ mkpụkpu, nọgbaa l'alị ndu Jiuda bụru ochobu; k'ọphu bụ l'ọ tọ dụdu onye ebu iya ebubu.”

¹² ?Dẹnu onye bụ nwoke, maru iphe kẹ g'iphe-a doo ya ẹnya? ?Bụ onye bẹ Chipfu ziru iphe k'ọphu bụ l'ọo-dụ ike kọo ya g'o doo ẹnya? ?Bụ gụnu meru g'o gude e mebyishia alị-a woru iya tọgbo ophorokpo g'echiẹgu, a ta adụdu onye aghajẹ iya aghagha?

¹³ Wakwa iphe, Chipfu epfu baa: “Ọ kwa iphe, kparụ iya nụ bụ l'ẹphe gbadoru eme iphe, mu tụru l'ekemu, bụ ọphu mu tụru doberu phẹ. Ẹphe te emeduru iphe, mu sụru g'ẹphe meje; ọphu ẹphe angaduru nchị l'ekemu mu.

¹⁴ Ọ bụ-chiaru iphe, ẹphe jeru etsoru bụ ẹjo ọkpoma phẹ. Ẹphe jeru awata agwọ nshi, bụ Balụ, bụ iphe, ndiche phẹ ziru phẹ.

¹⁵ Ọo ya bụ lẹ-a; wakwa iphe, Chipfu, bụ Ọkalibe-Kakọta-Ike eepfu baa; mbụ Chileke kẹ ndu Ízurẹlu: Lekwa; mu e-me ndu-a g'ẹphe ria nri, atsọ ilu. Mu emee phẹ; ẹphe angụa mini, e yeru iphe, egbu egbugbu.

¹⁶ Mu a-chịkashi phẹ g'ẹphe dzuru ọhamoha, bụ ẹka ẹphe ta majẹduru; ọphu ndiche phẹ amajẹduru iya. Ọzo bụ l'ọo ogu-echi bẹ mu e-gude chịa phẹ jasụ mu emebyishibẹbe phẹ.”

¹⁷ Wakwa iphe, Chipfu, bụ Ọkalibe-Kakọta-Ike eepfu baa: “Unu rịnaa ya arịri nta! Unu kunaa ụnwanyi, ákàjẹ́ àkàkà ẹkwa g'ẹphe bya! Unu zikwaa g'e kua ndu ọphu kachaa ara ẹkwa ẹrengete g'ẹphe byakwaphọ!”

¹⁸ “G'ẹphe bya ẹgwegwa bya akarụ anyi àkàkà ẹkwa jasụ ẹnya-mini awata anyi asọ gborogboro l'ẹnya; mbụ g'ẹnya-mini nọdu awụ anyi gbụkugbuku l'ishishi ẹnya.”

¹⁹ Aanụkwa àkàkà-ẹkwa, aaka lẹ Zayọnu ẹka ẹphe ara sụ: “Waa g'e mebyishiru anyi! Waa g'iphere anyi habe shii! Anyi hafụtajekwa alị anyi-a kẹle ụlo anyi bẹ e mebyishichawaru.”

²⁰ Nta-a bụ lẹ-a; unubẹ ụnwanyi; unu nụmakwa Opfu Chipfu! Unu saa nchị nụma opfu, shi iya l'ọnu! Unu zikwa ụnwada unu g'aakajẹ àkàkà ẹkwa! G'onyenọnu zia nwibe iya g'eechije mkpu ẹkwa!

²¹ Ọnwu shiwaa lẹ windo-ụlo anyi pyobata bya abahụ l'ẹka anyi meru; ọ ngụru angụru. Ọ bapfu ụnwegirima l'etsuzọ; bya emee ọphu ụnwokorobya edzukọedu l'edupfu-ọha.

²² Pfua sụ: “Wakwa iphe, Chipfu epfu: Odzu ụnwu-eliphe l'a-daka gẹ nshị l'ọma-ẹgu; g'ẹka e gburu ereshi; ẹswa iya wụshiru; ọphu ọ dụdu onye achịkobe iya nụ.”

²³ Wakwa iphe, Chipfu epfu baa: “G'onye maru iphe te egudekwa mmamiphe iya kua onwiya! Ọphu onye ọkpehu dụ egudekwa ọkpehu iya kua onwiya! Ọphu onye nweru iphe egudekwa iphe, o nweru kua onwiya!”

²⁴ Ọchia l'onye achọ aba abaa; bụ iphe, oo-gude aba abaa bụ; lẹ mu doru iya ẹnya; tẹme ọ maru mu ree; mbụ maru lẹ mu bụ Chipfu; lẹ mu emeje iphe-ọma; bya ekpe ikpe, pfụru ọto; bya egoshi lẹ mu pfụberekoto. Ọ bụru l'eliphe bẹ mu emekọta iphe ono; kẹle ọ bụkota iphe, ememe iya adụje mu ree. Nokwa iphe, Chipfu eepfu.

²⁵ Wakwa iphe, Chipfu epfu baa: “Lekwa; mbọku abyakwa, bụ mbọku, mu a-nụ phẹ aphụ; mbụ ndu e buru úbvú l'ẹhu kpoloko;

²⁶ mbụ ndu Ijiputu; yẹe ndu Jiuda; waa ndu Edọmu; waa ndu Amọnu; waa ndu Mówabu; mẹkpoo iphe, bụkpoo ndu bukọta l'echiẹgu; mbụ ndu akpụje ishi dabunụka iya adabu. Kẹle ọhamoha ono g'ẹphe ha te ebuduru úbvù ililekpọo; tẹme je akpaa lẹ ndu Ízurẹlu l'ọphu te ebukwarụpho úbvù l'ime obu phẹ.”